ಪುನೀತ್ ಅಣ್ಣಾ ಬಾಂಡ್ 'ಸ್ಕೆಲಿಟನ್' ಬೈಕ್ ನಿಮ್ಮದಾಗಿಸಿ!

ಸದ್ಯ ಪುನೀತ್ ಅವರ ಸ್ಕೆಲಿಟನ್ ಬೈಕ್ ತಮ್ಮದಾಗಿಸುವ ಅವಕಾಶ ನಿಮ್ಮದು. ಹೌದು, ಟೈಮ್ಸ್ ಮೊಬೈಲ್ಸ್ ಇಂತಹದೊಂದು ಅವಕಾಶ ಒದಗಿಸುತ್ತದೆ.

ಟೈಮ್ಸ್ ಮೊಬೈಲ್ ಲಿಮಿಟೆಡ್‌ನ ಅಂತರ್ಜಾಲ ಸೇವೆಯಾದ ಫಾಲೊ ಸ್ಟಾರ್ ಆಕ್ಷನ್ಸ್‌ನಲ್ಲಿ ಈಗಾಗಲೇ ಹರಾಜು ಪ್ರಕ್ರಿಯೆ ಆರಂಭಗೊಂಡಿದ್ದು, ಆಸಕ್ತರು ಬಿಡ್ ಸಲ್ಲಿಸಬಹುದಾಗಿದೆ.

ಪುನೀತ್ ಅವರ ಸ್ಕೆಲಿಟನ್ ಬೈಕ್‌ಗೆ ಒಂದು ಲಕ್ಷ ರು.ಗಳ ಮೂಲಧನದಿಂದ ಹರಾಜು ಆರಂಭಗೊಂಡಿದೆ. ಸದ್ಯ ಲಭ್ಯವಾಗಿರುವ ಮಾಹಿತಿಗಳ ಪ್ರಕಾರ 20 ಬಿಡ್‌ಗಳು ಈಗಾಗಲೇ ಸಲ್ಲಿಸಲಾಗಿದ್ದು, ಹರಾಜು ದರ ಮೂರು ವರೆ ಲಕ್ಷ ರು.ಗಳನ್ನು ದಾಟಿದೆ.

ಹಾಗಿದ್ದರೂ ಬೆಳ್ಳಿ ಹಾಗೂ ಕಪ್ಪು ವರ್ಣ ಮಿಶ್ರಿತ ಈ ಪೆಟ್ರೋಲ್ ಚಾಲಿತ ರಾಯಲ್ ಎನ್‌ಫೀಲ್ಡ್ ಬೈಕ್ ಅನ್ನು ರಸ್ತೆಯಲ್ಲಿ ಓಡಿಸುವಂತಿಲ್ಲ. ಯಾಕೆಂದರೆ ಇದಕ್ಕೆ ಆರ್‌ಟಿಒ ನಿಯಮದ ತೊಡಕು ಎದುರಾಗಲಿದೆ.

ನಿಮ್ಮ ಮಾಹಿತಿಗಾಗಿ, ಸೆಲೆಬ್ರಿಟಿಗಳು ಬಳಕೆ ಮಾಡಿದ ವಸ್ತುಗಳನ್ನು ಫಾಲೊ ಸ್ಟಾರ್ ಮುಖಾಂತರ ಹರಾಜಿಗಿಡಲಾಗುತ್ತದೆ. ಇದರಂತೆ ಪುನೀತ್ ರಾಜ್‌ಕುಮಾರ್ ಸಹ ತಮ್ಮ ಸ್ಕೆಲಿಟನ್ ಬೈಕ್ ಹರಾಜಿಗಿಟ್ಟಿದ್ದಾರೆ.

ಇಲ್ಲಿ ಸಂಗ್ರಹವಾಗುವ ಮೊತ್ತದ ಸ್ವಲ್ಪ ದುಡ್ಡು ಸಹಾಯಾರ್ಥ ಸಂಸ್ಥೆಗಳಿಗೆ ನೀಡಲಾಗುತ್ತದೆ. ಈ ಮೂಲಕ ಅಭಿಮಾನಿಗಳು ಹಾಗೂ ನಟರಿಗೆ ಸಂವಹನ ನಡೆಸಲು ಸಾಧ್ಯವಾಗುತ್ತದೆ.

ಇತ್ತೀಚೆಗಷ್ಟೇ ಓಬೇರಾಯ್ ಹೋಟೆಲ್‌ನಲ್ಲಿ ನಡೆದ ಸಮಾರಂಭದಲ್ಲಿ ಪುನೀತ್ ನೂತನ ಫಾಲೋ ಸ್ಟಾರ್ ಆಕ್ಷನ್ಸ್‌ಗೆ ಚಾಲನೆ ನೀಡಿದ್ದರು. ಇದೇ ಸಂದರ್ಭದಲ್ಲಿ ಆಂಡ್ರಾಯ್ಡ್, ಐಫೋನ್‌ಗಳಿಗೆ ಡೌನ್‌ಲೋಡ್ ಮಾಡಬಲ್ಲ ಫಾಲೋ ಆಪ್ ಅನ್ನು ಸಹ ಅನಾವರಣಗೊಳಿಸಲಾಗಿತ್ತು.

ಅಷ್ಟಕ್ಕೂ ನೀವು ಪುನೀತ್ ಅವರ ಸ್ಕೆಲಿಟನ್ ಬೈಕ್ ಪಡೆಯಲು ಬಯುಸುತ್ತೀರಾ? ಹಾಗಿದ್ದರೆ ಇನ್ಯಾಕೆ ತಡ ಈಗಲೇ ಕೆಳಕಂಡ ವೆಬ್‌ಸೈಟ್‌ಗೆ ಭೇಟಿ ಕೊಟ್ಟು ನಿಮ್ಮ ಬಿಡ್ ಸಲ್ಲಿಸಿ...ಇನ್ನು ಏಳು ದಿನಗಳಲ್ಲಿ ಹರಾಜು ಕೊನೆಗೊಳ್ಳಲಿದೆ.