ಮಾಡಿಫೈ ಜಿಪ್ಸಿಯಲ್ಲಿ ಕಾಣಿಸಿಕೊಂಡ ನಟ ಸಲ್ಮಾನ್‍‍ಖಾನ್

ಇತ್ತೀಚಿಗಷ್ಟೇ ಅವರು ಲ್ಯಾಂಡ್ ರೋವರ್ ರೇಂಜ್ ರೋವರ್ ಎಲ್‍‍ಡಬ್ಲ್ಯು‍‍ಬಿ ಎಸ್‍‍ಯುವಿಯನ್ನು ಖರೀದಿಸಿದ್ದಾರೆ. ಈ ಹಿಂದೆ ಮಾರುತಿ ಸುಜುಕಿ ಕಂಪನಿಯ ಜಿಪ್ಸಿ ಕಾರು ಹೆಚ್ಚು ಜನಪ್ರಿಯತೆಯನ್ನು ಪಡೆದಿತ್ತು. ಈಗ ಸಲ್ಮಾನ್‍‍ಖಾನ್‍‍ರವರು ಮಾಡಿಫೈ ಮಾಡಲಾದ ಜಿಪ್ಸಿ ಕಾರಿನಲ್ಲಿ ಬಾಂದ್ರಾದ ಬಳಿ ಕಾಣಿಸಿಕೊಂಡಿದ್ದಾರೆ.

ಈ ಜಿಪ್ಸಿ ಕಾರ್ ಅನ್ನು ಹೆಚ್ಚಿನ ಪ್ರಮಾಣದಲ್ಲಿ ಮಾಡಿಫೈಗೊಳಿಸಲಾಗಿದೆ. ಈ ಕಾರಿನ ಮಾಲೀಕರು ಯಾರು ಎಂಬುದು ತಿಳಿದು ಬಂದಿಲ್ಲ. ಬಿಳಿ ಬಣ್ಣದ ಈ ಜಿಪ್ಸಿ ಕಾರಿನಲ್ಲಿ ಆಫ್ ರೋಡ್ ಬಂಪರ್, ಆಫ್ ರೋಡ್ ಬುಲ್‍‍ಬಾರ್, ಮುಂಭಾಗದಲ್ಲಿ ಟೋ ಹುಕ್, ಎಲೆಕ್ಟ್ರಿಕ್ ವಿಂಚ್, ಎಲ್‍ಇಡಿ ಆಕ್ಸಿಲರಿ ಲ್ಯಾಂಪ್, ಆಫ್ಟರ್ ಮಾರ್ಕೆಟ್ ಹೆಡ್‍‍‍ಲ್ಯಾಂಪ್‍‍ಗಳಿವೆ.

ಈ ಕಾರಿನಲ್ಲಿ ಅಳವಡಿಸಲಾಗಿರುವ ಮಡ್ ಟೆರೇನ್ ಟಯರ್‍‍ಗಳು ಯಾವುದೇ ರೀತಿಯ ಆಫ್ ರೋಡ್‍‍ನಲ್ಲಿ ಚಲಿಸುವ ಸಾಮರ್ಥ್ಯವನ್ನು ಹೊಂದಿವೆ. ಟಯರ್‌ಗಳಲ್ಲಿ ಡೀಪ್ ಡಿಶ್ ಆಫ್-ರೋಡ್ ಸ್ಪೆಕ್ ರಿಮ್‌ಗಳನ್ನು ಜೋಡಿಸಲಾಗಿದ್ದು ಅವು ರೆಗ್ಯುಲರ್ ವ್ಹೀಲ್‍‍ಗಳಿಗಿಂತ ಹೆಚ್ಚು ಬಲಶಾಲಿಯಾಗಿವೆ.

ಇದರಿಂದ ರಫ್ ರಸ್ತೆಗಳಲ್ಲಿ ಕಾರು ಆರಾಮವಾಗಿ ಚಲಿಸುತ್ತದೆ. ಡ್ರೈವರ್ ಬಳಿ ಸ್ನಾರ್ಕೆಲ್ ಅಳವಡಿಸಲಾಗಿದೆ. ಇದರಿಂದಾಗಿ ಈ ಕಾರು ನೀರಿನಲ್ಲಿ ಯಾವುದೇ ತೊಂದರೆಯಿಲ್ಲದಂತೆ ಚಲಿಸಲಿದೆ. ಆಳವಾದ ನದಿಗಳಲ್ಲಿ ಹಾಗೂ ನೀರು ನಿಂತಿರುವ ಸ್ಥಳಗಳಲ್ಲಿ ಎಂಜಿನ್‍‍ಗೆ ಯಾವುದೇ ತೊಂದರೆಯಾಗದಂತೆ ಚಲಿಸುತ್ತದೆ.

ಈ ಜಿಪ್ಸಿಯ ಹಿಂಭಾಗವು ಹಾರ್ಡ್ ಟಾಪ್ ಅನ್ನು ಹೊಂದಿದೆ. ಫ್ಲೇರ್ಡ್ ವ್ಹೀಲ್ ಆರ್ಕ್ ಸೇರಿದಂತೆ ಹಲವಾರು ಮಾಡಿಫಿಕೇಶನ್‍‍ಗಳನ್ನು ಮಾಡಲಾಗಿದೆ. ಈ ಕಾರ್ ಅನ್ನು ಮಾಲೀಕರ ಅಭಿರುಚಿಗೆ ತಕ್ಕಂತೆ ಮಾಡಿಫೈಗೊಳಿಸಲಾಗಿದೆ. ನಟ ಜಾನ್ ಅಬ್ರಹಾಂ ಸಹ ಮಾರುತಿ ಸುಜುಕಿ ಜಿಪ್ಸಿ ಕಾರ್ ಅನ್ನು ಹೊಂದಿದ್ದಾರೆ. ಈ ಕಾರಿನಲ್ಲಿ ಹಲವು ಬಾರಿ ಕಾಣಿಸಿಕೊಂಡಿದ್ದಾರೆ.

ಮಾರುತಿ ಸುಜುಕಿ ಕಂಪನಿಯು ಜಿಪ್ಸಿ ಕಾರ್ ಅನ್ನು ಕಳೆದ ವರ್ಷ ಅಧಿಕೃತವಾಗಿ ಸ್ಥಗಿತಗೊಳಿಸಿತ್ತು. ಕೇಂದ್ರ ಸರ್ಕಾರವು ನಿಗದಿಪಡಿಸಿರುವ ಸುರಕ್ಷತಾ ಮಾನದಂಡಗಳನ್ನು ಪಾಲಿಸಲು ವಿಫಲವಾದ ಕಾರಣಕ್ಕೆ ಈ ಕಾರ್ ಅನ್ನು ಸ್ಥಗಿತಗೊಳಿಸಲಾಯಿತು.

ಈ ಕಾರು ಭಾರತದಲ್ಲಿ ಹೆಚ್ಚಿನ ಸಂಖ್ಯೆಯ ಅಭಿಮಾನಿಗಳನ್ನು ಹೊಂದಿದೆ. ಜಿಪ್ಸಿ ಕಡಿಮೆ ತೂಕವನ್ನು ಹೊಂದಿರುವ 4x4ನ ಪೆಟ್ರೋಲ್ ಪವರ್ ಎಸ್‍‍ಯುವಿಯಾಗಿದೆ. ಇದು ಯಾವುದೇ ರಸ್ತೆಯಲ್ಲಿಯೂ ಸರಾಗವಾಗಿ ಚಲಿಸುತ್ತದೆ. ಈ ಕಾರ್ ಅನ್ನು ಸುಲಭವಾಗಿ ಮಾಡಿಫೈಗೊಳಿಸಬಹುದಾಗಿದೆ.

ಈ ಕಾರಣಕ್ಕೆ ಭಾರತದಲ್ಲಿರುವ ಪ್ಯಾರಾ ಮಿಲಿಟರಿ ಪಡೆಗಳು ಈ ಕಾರ್ ಅನ್ನು ಹೆಚ್ಚು ಬಳಸುತ್ತವೆ. ಮಾರುತಿ ಸುಜುಕಿ ಕಂಪನಿಯು ಜಿಪ್ಸಿ ಕಾರಿನ ಬದಲಿಗೆ ಬೇರೆ ಕಾರ್ ಅನ್ನು ಬಿಡುಗಡೆಗೊಳಿಸಿಲ್ಲ. ಆದರೆ ಮುಂದಿನ ವರ್ಷ ಜಿಪ್ಸಿ ಕಾರಿನಂತಿರುವ ಹೊಸ ಜಿಮ್ನಿ ಕಾರ್ ಅನ್ನು ದೇಶಿಯ ಮಾರುಕಟ್ಟೆಯಲ್ಲಿ ಬಿಡುಗಡೆಗೊಳಿಸಲಿದೆ.