ಚಾಲಕನ ಆಚಾತುರ್ಯದಿಂದ ಮೇಲಕ್ಕೆ ಹಾರಿದ ಟೊಯೊಟಾ ಫಾರ್ಚೂನರ್

ಭಾರತದ ರಸ್ತೆ ಅಪಘಾತಗಳಿಗೆ ಪ್ರಮುಖ ಕಾರಣ ಸಂಚಾರಿ ನಿಯಮಗಳ ಉಲ್ಲಂಘನೆ. ಇದರ ಜೊತೆಗೆ ಕುಡಿದು ವಾಹನ ಚಲಾಯಿಸುವುದು ಹಾಗೂ ರಸ್ತೆಗಳಲ್ಲಿ ರೇಸ್ ಟ್ರಾಕ್‍‍ಗಳಂತೆ ವಾಹನ ಚಲಾಯಿಸುವುದು ಸಹ ಕಾರಣವಾಗಿವೆ. ಸಾರ್ವಜನಿಕರಲ್ಲಿ ಎಷ್ಟೇ ಪ್ರಮಾಣದ ಜಾಗೃತಿಯನ್ನು ಮೂಡಿಸಿದರೂ ಅಪಘಾತಗಳು ಸಂಭವಿಸುತ್ತಲೇ ಇವೆ.

ಭಾರೀ ಪ್ರಮಾಣದ ದಂಡಕ್ಕೆ ಹೆದರಿಯಾದರೂ ಸಂಚಾರಿ ನಿಯಮಗಳ ಉಲ್ಲಂಘನೆಯ ಪ್ರಮಾಣವು ಕಡಿಮೆಯಾಗಬಹುದು ಎಂಬ ಕಾರಣಕ್ಕೆ ಕೇಂದ್ರ ಸರ್ಕಾರವು ದಂಡದ ಮೊತ್ತವನ್ನು ಭಾರೀ ಪ್ರಮಾಣದಲ್ಲಿ ಏರಿಸಿ ಹೊಸ ಮೋಟಾರು ವಾಹನ ಕಾಯ್ದೆಯನ್ನು ಜಾರಿಗೆ ತಂದಿದೆ.

ರಸ್ತೆ ಅಪಘಾತಗಳು ದಿನನಿತ್ಯ ಸಂಭವಿಸುತ್ತಲೇ ಇರುತ್ತವೆ. ಕೆಲವು ಅಪಘಾತಗಳ ವೀಡಿಯೊಗಳು ವೈರಲ್ ಆಗುತ್ತವೆ. ಈಗ ಮತ್ತೊಂದು ಅಪಘಾತದ ವೀಡಿಯೊ ವೈರಲ್ ಆಗಿದೆ. ಈ ಅಪಘಾತ ನಡೆದಿರುವುದು ಚಂಡೀಗಢದಲ್ಲಿ.

ಈ ಅಪಘಾತದ ವೀಡಿಯೊದಲ್ಲಿ ಟೊಯೊಟಾ ಫಾರ್ಚೂನರ್ ಎಸ್‍‍ಯುವಿ ಅಪಘಾತಕ್ಕೆ ಒಳಗಾಗುವುದನ್ನು ಕಾಣಬಹುದು. ಅಪಘಾತವಾದ ಸಮಯದಲ್ಲಿ ಫಾರ್ಚೂನರ್ ನಿಧಾನವಾದ ವೇಗದಲ್ಲಿಯೇ ಚಲಿಸುತ್ತಿದೆ. ಆಗ ಟಿ ಜಂಕ್ಷನ್ ಎದುರಾಗುತ್ತದೆ.

ಆದರೆ ಈ ಜಂಕ್ಷನ್‍‍ನಲ್ಲಿಯೂ ಫಾರ್ಚೂನರ್ ಎಸ್‍‍ಯುವಿಯ ಚಾಲಕನು ತನ್ನ ವಾಹನವನ್ನು ನಿಧಾನಗೊಳಿಸುವುದಿಲ್ಲ. ಫಾರ್ಚೂನರ್ ಕಾರಿನ ಎಡಗಡೆಯಿಂದ ಬರುವ ಸೆಡಾನ್ ಕಾರು ಫಾರ್ಚೂನರ್ ಎಸ್‍‍ಯುವಿಗೆ ಗುದಿಯುತ್ತದೆ.

ತಕ್ಷಣವೇ ಟೊಯೊಟಾ ಫಾರ್ಚೂನರ್ ಎಸ್‍‍ಯುವಿಯು ಸಿನಿಮಾಗಳಲ್ಲಿ ಕಾರುಗಳು ಮೇಲಕ್ಕೆರುವಂತೆ ಹಾರಿ, ಎದುರುಗಡೆಯ ಪಾರ್ಕಿಂಗ್‍‍ನಲ್ಲಿ ನಿಲ್ಲಿಸಿದ್ದ ಎರಡು ವಾಹನಗಳ ಮೇಲೆ ಬೀಳುತ್ತದೆ.

ಇದರಿಂದಾಗಿ ಪಾರ್ಕಿಂಗ್ ಸ್ಥಳದಲ್ಲಿದ್ದ ಹೋಂಡಾ ಸಿಟಿ ಹಾಗೂ ಹ್ಯುಂಡೈ ವರ್ನಾ ಕಾರುಗಳಿಗೆ ಹಾನಿಯಾಗುತ್ತದೆ. ವರದಿಗಳ ಪ್ರಕಾರ, ಫಾರ್ಚೂನರ್ ಎಸ್‍‍ಯುವಿಗೆ ಅಪಘಾತವಾದಾಗ 23 ವರ್ಷದ ವ್ಯಕ್ತಿಯೊಬ್ಬ ಈ ಕಾರ್ ಅನ್ನು ಚಲಾಯಿಸುತ್ತಿದ್ದ ಎಂದು ಹೇಳಲಾಗಿದೆ.

ಈ ಅಪಘಾತದಲ್ಲಿ ಆತನಿಗೆ ಗಾಯಗಳಾಗಿವೆ. ಇದರ ಜೊತೆಗೆ ಆತನಿಗೆ ಆರೋಗ್ಯದ ಸಮಸ್ಯೆ ಇರುವುದು ತಿಳಿದು ಬಂದಿದೆ. ಅನಾರೋಗ್ಯದ ಕಾರಣದಿಂದಾಗಿ ಆತನಿಗೆ ತನ್ನ ಕಾರ್ ಅನ್ನು ನಿಧಾನಗೊಳಿಸಲು ಸಾಧ್ಯವಾಗಿಲ್ಲ.

ಮೇಲಕ್ಕೆ ಹಾರಿದ್ದ ಫಾರ್ಚೂನರ್ ಕಾರಿಗೆ ಹೆಚ್ಚಿನ ಹಾನಿಯಾಗಿಲ್ಲ. ಇದರಲ್ಲಿದ್ದ ಚಾಲಕನು ಅಪಘಾತದ ನಂತರ ಪ್ರಜ್ಞೆ ಕಳೆದುಕೊಂಡಿದ್ದಾನೆ. ಸ್ಥಳದಲ್ಲಿದ್ದವರು ಕಾರಿನ ವಿಂಡೊಗಳನ್ನು ಹೊಡೆದು ಆತನನ್ನು ಹೊರಕ್ಕೆ ಎಳೆದಿದ್ದಾರೆ.

ಯಾವುದೇ ಜಂಕ್ಷನ್‍‍ಗಳಲ್ಲಿ ವಾಹನ ಚಲಾಯಿಸುವಾಗ ನಿಧಾನವಾಗಿ ಚಲಿಸುವುದು ಒಳ್ಳೆಯದು. ಅನಾರೋಗ್ಯವಿದ್ದಲ್ಲಿ ವಾಹನ ಚಲಾಯಿಸದಿರುವುದು ಉತ್ತಮ.