ಮಾನವ ಮಲ ತ್ಯಾಜ್ಯದಿಂದ ರೂಪುಗೊಂಡ 'ಬಯೋ ಬಸ್' ಮೊದಲ ಪಯಣ

40 ಸೀಟು ಸಾಮರ್ಥ್ಯದ ಈ ಬಸ್ ಕೇವಲ ಮಾನವ ಮಲ ತ್ಯಾಜ್ಯ ಮಾತ್ರವಲ್ಲದೆ ಆಹಾರ ತ್ಯಾಜ್ಯದಿಂದಲೂ ಚೈತನ್ಯ ಉತ್ಪಾದಿಸುತ್ತಿದೆ.

ಸಂಪೂರ್ಣ ಪರಿಸರ ಸ್ನೇಹಿ ಈ ಬಯೋ ಬಸ್ ಫುಲ್ ಟ್ಯಾಂಕ್‌ ಅನಿಲದಲ್ಲಿ 300 ಕೀ.ಮೀ. (186 ಮೈಲ್) ವರೆಗೆ ಓಡುವ ಸಾಮರ್ಥ್ಯ ಹೊಂದಿದೆ. ಇದು ವಾರ್ಷಿಕವಾಗಿ ಐದು ಮಂದಿ ಉತ್ಪಾದಿಸುವ ತ್ಯಾಜ್ಯಕ್ಕೆ ಸಮಾನವಾಗಿದೆ.

ಬಾತ್ ಬಸ್ ಸಂಸ್ಥೆ ಕಾರ್ಯ ನಿರ್ವಹಿಸುತ್ತಿರುವ ಬಯೋ ಬಸ್ ಬ್ರಿಸ್ಟಾಲ್ ವಿಮಾನ ನಿಲ್ದಾಣದಿಂದ ಬಾತ್ ಸಿಟಿ ಸೆಂಟರ್‌ ವರೆಗೆ ಪಯಣ ಆರಂಭಿಸಿದೆ.

ಅವೊನ್‌ಮೌತ್‌ನಲ್ಲಿರುವ (Avonmouth) ವೆಸ್ಸೆಕ್ಸ್ ವಾಟರ್ (Wessex Water) ಅಂಗಸಂಸ್ಥೆಯಾಗಿರುವ ಜೆನಿಕೊ (GENeco) ಕಾರ್ಯಾಚರಣೆಯಲ್ಲಿರುವ ಬ್ರಿಸ್ಟಲ್ ಸೇವೆಜ್ ಟ್ರೀಟ್‌ಮೆಂಟ್ ವರ್ಕ್ಸ್‌ನ ಬೃಹತ್ ಕೈಗಾರಿಕೆಯಲ್ಲಿ ಮಾನವ ಮಲ ಹಾಗೂ ಆಹಾರ ತ್ಯಾಜ್ಯಗಳನ್ನು ಬಯೋಮಿಥೇನ್ ಗ್ಯಾಸ್ ಆಗಿ ಪರಿವರ್ತಿಸಲಾಗುತ್ತಿದೆ.

ಇದು ಸಾಂಪ್ರದಾಯಿಕ ಡೀಸೆಲ್ ಎಂಜಿನ್‌ಗಿಂತಲೂ ಶೇಕಡಾ 30ರಷ್ಟು ಕಡಿಮೆ ಕಾರ್ಬನ್ ಡೈಓಕ್ಸೈಡ್ ಹೊರ ಸೂಸುತ್ತಿದ್ದು, ಹೆಚ್ಚು ಪರಿಸರ ಸ್ನೇಹಿ ಎನಿಸಿಕೊಳ್ಳಲಿದೆ.