ದೆಹಲಿ ರಸ್ತೆಯಲ್ಲಿ ಫೆರಾರಿ ಕಾರುಗಳ ಅಬ್ಬರ: 'ಯುನಿವರ್ಸೋ ಫೆರಾರಿ' ಶೋಗೆ ಟಿಕೆಟ್ ಬುಕ್ ಮಾಡುವುದು ಹೇಗೆ?

ದೆಹಲಿಯ ರಸ್ತೆಗಳಲ್ಲಿ ಟ್ರಾಂನ್ಸ್‌ಪೋರ್ಟರ್‌ಗಳ ಮೇಲೆ ತೆರೆದಿಟ್ಟ ಸ್ಥಿತಿಯಲ್ಲಿ ಸಾಗುತ್ತಿದ್ದ ಫೆರಾರಿ ಸೂಪರ್‌ಕಾರ್‌ಗಳ ವೀಡಿಯೊಗಳು ಇಂದು ಸೋಷಿಯಲ್ ಮೀಡಿಯಾ ರೀಲ್ಸ್‌ಗಳಲ್ಲಿ ಭಾರಿ ಸದ್ದು ಮಾಡುತ್ತಿವೆ. ಯಶೋಭೂಮಿಯತ್ತ ಸಾಗುತ್ತಿರುವ ಈ ಐಷಾರಾಮಿ ಕಾರುಗಳು ಪ್ರಸಿದ್ಧ 'ಯುನಿವರ್ಸೋ ಫೆರಾರಿ' (Universo Ferrari) ಪ್ರದರ್ಶನದ ಭಾಗವಾಗಿವೆ. ದೆಹಲಿಯಲ್ಲಿ ಅಕ್ಟೋಬರ್ 17 ರಿಂದ ನವೆಂಬರ್ 1 ರವರೆಗೆ ಈ ಈವೆಂಟ್ ನಡೆಯಲಿದೆ. ಅಕ್ಟೋಬರ್ 17-18 ರಂದು ವಿಶೇಷ ಆಹ್ವಾನಿತರಿಗಷ್ಟೇ ಪ್ರವೇಶವಿದ್ದು, ಅಕ್ಟೋಬರ್ 19 ರಿಂದ ಸಾರ್ವಜನಿಕರಿಗೆ ಮುಕ್ತವಾಗಲಿದೆ. ಈಗಾಗಲೇ ಟಿಕೆಟ್ ಬುಕಿಂಗ್ ಶುರುವಾಗಿದ್ದು, ದ್ವಾರಕಾದಲ್ಲಿ ಈ ಸೂಪರ್ ಕಾರುಗಳನ್ನು ಕಣ್ಣುಂಬಿಕೊಳ್ಳಲು ಆಟೋಮೊಬೈಲ್ ಪ್ರಿಯರು ಸಜ್ಜಾಗುತ್ತಿದ್ದಾರೆ.

ಡಿಸ್ಟ್ರಿಕ್ಟ್ (District) ಆ್ಯಪ್‌ನಲ್ಲಿ ಟಿಕೆಟ್‌ಗಳನ್ನು ಬುಕ್ ಮಾಡಬಹುದಾಗಿದ್ದು, ಪ್ರತಿದಿನ ಹಲವು ಟೈಮ್ ಸ್ಲಾಟ್‌ಗಳು ಲಭ್ಯವಿವೆ. ಆರಂಭಿಕ ಟಿಕೆಟ್ ದರ ₹2,125 ಆಗಿದೆ. ವೀಕೆಂಡ್ ಹಾಗೂ ಸಂಜೆಯ ಸ್ಲಾಟ್‌ಗಳಿಗೆ ಬೇಡಿಕೆ ಹೆಚ್ಚಿದ್ದು, ದರವೂ ಜಾಸ್ತಿ ಇರಬಹುದು. ಹಾಗಾಗಿ ವಾರದ ಕೆಲಸದ ದಿನಗಳಲ್ಲೇ ಬೇಗ ಟಿಕೆಟ್ ಕಾಯ್ದಿರಿಸುವುದು ಜಾಣತನ. ಅಕ್ಟೋಬರ್ 19 ರಿಂದ ನವೆಂಬರ್ 1 ರವರೆಗೆ ದ್ವಾರಕಾದ ಯಶೋಭೂಮಿಯಲ್ಲಿ ಪ್ರದರ್ಶನ ನಡೆಯಲಿದೆ. ಯಾವುದೇ ಅನಧಿಕೃತ ಟಿಕೆಟ್ ಮಾರಾಟಗಾರರನ್ನು ನಂಬಬೇಡಿ, ಆಫಿಷಿಯಲ್ ಪ್ಲಾಟ್‌ಫಾರ್ಮ್ ಮೂಲಕವೇ ಟಿಕೆಟ್ ಪಡೆದುಕೊಳ್ಳಿ.

ಟಿಕೆಟ್ ದರ	ಸಾರ್ವಜನಿಕ ಪ್ರವೇಶ ದಿನಾಂಕ	ಆಹ್ವಾನಿತರಿಗೆ ಮಾತ್ರ	ಟೈಮ್ ಸ್ಲಾಟ್‌ಗಳು	ಬುಕಿಂಗ್ ಪ್ಲಾಟ್‌ಫಾರ್ಮ್
₹2,125 ರಿಂದ ಆರಂಭ (ದಿನ ಮತ್ತು ಸ್ಲಾಟ್‌ಗೆ ತಕ್ಕಂತೆ ಬದಲಾಗಲಿದೆ)	ಅಕ್ಟೋಬರ್ 19–ನವೆಂಬರ್ 1, 2026	ಅಕ್ಟೋಬರ್ 17–18, 2026	ಪ್ರತಿದಿನ ಹಲವು ಸ್ಲಾಟ್‌ಗಳು ಲಭ್ಯ	ಡಿಸ್ಟ್ರಿಕ್ಟ್ ಈವೆಂಟ್ ಪೇಜ್

ಯುನಿವರ್ಸೋ ಫೆರಾರಿಯಲ್ಲಿ ಕಣ್ಮನ ಸೆಳೆಯಲಿರುವ ಕಾರುಗಳು

ಈ ಬಾರಿಯ ಶೋನಲ್ಲಿ ಎಫ್80 ಹೈಪರ್‌ಕಾರ್, 12ಸಿಲಿಂಡ್ರಿ ವಿ12 ಬರ್ಲಿನೆಟ್ಟಾ, ಫೋರ್‌-ಡೋರ್ ಪುರೋಸಂಗ್ಯೂ, ಅಮಲ್ಫಿ ಸ್ಪೈಡರ್ ಮತ್ತು 849 ಟೆಸ್ಟಾರೊಸ್ಸಾ ಪ್ರಮುಖ ಆಕರ್ಷಣೆಯಾಗಿರಲಿವೆ. ಇದರ ಜೊತೆಗೆ ಲೂಚೆ ಮತ್ತು ಹೈಪರ್‌ಸೇಲ್ ಪ್ರಾಜೆಕ್ಟ್, ರೇಸಿಂಗ್ ಹಾಗೂ ಕ್ಲಾಸಿಕ್ ಝೋನ್‌ಗಳು ಸಹ ವೀಕ್ಷಕರನ್ನು ಸೆಳೆಯಲಿವೆ. ಭಾರತೀಯ ಗ್ರಾಹಕರಿಗೆ 830 cv V12 ಎಂಜಿನ್‌ನ 12ಸಿಲಿಂಡ್ರಿ ಮತ್ತು ವಿ12 ಫೋರ್-ಡೋರ್ ಮಾದರಿಯ ಪುರೋಸಂಗ್ಯೂ ಪ್ರಮುಖ ಹೈಲೈಟ್ಸ್ ಆಗಿರಲಿವೆ.

ಯುನಿವರ್ಸೋ ಫೆರಾರಿ: ವೀಡಿಯೊ-ಫೋಟೋ ಶೂಟ್ ಮಾಡುವಾಗ ಈ ಸುರಕ್ಷತಾ ನಿಯಮ ಪಾಲಿಸಿ

ಶೋ ಶುರುವಾಗುವ ಮುನ್ನವೇ ಕಾರುಗಳ ಝಲಕ್ ನೋಡಬೇಕೆ? ಹಾಗಿದ್ದರೆ ಕಾಲುದಾರಿ (ಫುಟ್‌ಪಾತ್) ಅಥವಾ ಸುರಕ್ಷಿತ ಸಾರ್ವಜನಿಕ ಸ್ಥಳಗಳಿಂದ ಮಾತ್ರ ವೀಡಿಯೊ ಮಾಡಿ. ಚಾಲನೆ ಮಾಡುವಾಗ ಮೊಬೈಲ್ ಬಳಸಬೇಡಿ; ದೆಹಲಿಯಲ್ಲಿ ಇದಕ್ಕೆ ₹5,000 ದಂಡವಿದೆ! ಎಕ್ಸ್‌ಪ್ರೆಸ್‌ವೇಗಳಲ್ಲಿ ಕಾರು ನಿಲ್ಲಿಸಿ ಫೋಟೋ-ವೀಡಿಯೊ ತೆಗೆಯುವುದು ಅಪಾಯಕಾರಿ, ಪೊಲೀಸರು ದಂಡ ವಿಧಿಸುತ್ತಿದ್ದಾರೆ. ಈವೆಂಟ್ ಗೇಟ್‌ಗಳ ಬಳಿ ಮೆಟ್ರೋ ಕಾಂಕೋರ್ಸ್‌ಗಳನ್ನು ಬಳಸಿ. ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡುವಾಗ ಕಾರಿನ ನಂಬರ್-ಪ್ಲೇಟ್ ಮಾಸ್ಕ್ ಮಾಡಲು (ಬ್ಲರ್ ಮಾಡಲು) ಮರೆಯದಿರಿ.

ಯಶೋಭೂಮಿಗೆ ತಲುಪುವುದು ಹೇಗೆ? ಪಾರ್ಕಿಂಗ್ ವ್ಯವಸ್ಥೆ ಹೇಗಿದೆ?

ಯಶೋಭೂಮಿ ದ್ವಾರಕಾ ಸೆಕ್ಟರ್-25 ಮೆಟ್ರೋ ನಿಲ್ದಾಣವು (ಏರ್‌ಪೋರ್ಟ್ ಎಕ್ಸ್‌ಪ್ರೆಸ್) ಕನ್ವೆನ್ಷನ್ ಸೆಂಟರ್‌ಗೆ ನೇರವಾಗಿ ಸಂಪರ್ಕ ಕಲ್ಪಿಸುತ್ತದೆ. ಟ್ರಾಫಿಕ್ ಡೈವರ್ಷನ್ ಇರುವುದರಿಂದ ಮೆಟ್ರೋ ಪ್ರಯಾಣವೇ ಅತ್ಯಂತ ವೇಗ ಮತ್ತು ಸುಲಭ. ಸ್ಥಳದಲ್ಲೇ ಉಚಿತ ಪಾರ್ಕಿಂಗ್ ಲಭ್ಯವಿದೆ ಎಂದು ಡಿಸ್ಟ್ರಿಕ್ಟ್ ತಿಳಿಸಿದೆ. ಸ್ವಂತ ವಾಹನದಲ್ಲಿ ಬರುವವರು ಬೇಗನೆ ತಲುಪುವುದು ಒಳಿತು. ಕ್ಯಾಬ್‌ನಲ್ಲಿ ಬರುವವರು ಗುರುತಿಸಲಾದ ಪ್ರತ್ಯೇಕ ಡ್ರಾಪ್-ಆಫ್ ಝೋನ್ ಬಳಸಿ. ಜನದಟ್ಟಣೆ ತಪ್ಪಿಸಲು ಮೆಟ್ರೋ ಗೇಟ್ ಹೆಸರುಗಳಂತಹ ಸ್ಪಷ್ಟ ಪಿಕ್‌ಅಪ್ ಪಾಯಿಂಟ್‌ಗಳನ್ನು ಶೇರ್ ಮಾಡಿಕೊಳ್ಳಿ.