ಭಾರತದ ರಸ್ತೆಗಿಳಿಯಲಿದೆ ವಿನ್‌ಫಾಸ್ಟ್ ಇ-ಸ್ಕೂಟರ್: ಓಲಾ, ಅಥರ್‌ಗೆ ಬಿಗ್ ಶಾಕ್ ನೀಡಲು ಸಜ್ಜು!

ವಿನ್‌ಫಾಸ್ಟ್ (VinFast) ಕಂಪನಿ ಭಾರತದ ಎಲೆಕ್ಟ್ರಿಕ್ ಸ್ಕೂಟರ್ ಮಾರುಕಟ್ಟೆಗೆ ಧುಮುಕಲು ಸಂಪೂರ್ಣವಾಗಿ ಸಜ್ಜಾಗಿದೆ. 2026ರ ಅಕ್ಟೋಬರ್ 8ರಂದು ಕಂಪನಿಯು 50ಕ್ಕೂ ಹೆಚ್ಚು ಡೀಲರ್ ಪಾಲುದಾರರೊಂದಿಗೆ ಒಪ್ಪಂದಕ್ಕೆ (Letters of Intent) ಸಹಿ ಹಾಕಿದೆ. 15 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಒಟ್ಟು 34 ನಗರಗಳಲ್ಲಿ ತನ್ನ ನೆಟ್‌ವರ್ಕ್ ವಿಸ್ತರಿಸಲು ಯೋಜನೆ ರೂಪಿಸಿದೆ. ಪ್ರಮುಖ ಮೆಟ್ರೋ ನಗರಗಳಲ್ಲಿ ಹಬ್ಬದ ಸಂಭ್ರಮದ ವೇಳೆಗೆ ಶೋರೂಂಗಳನ್ನು ಆರಂಭಿಸಿ, ಸ್ಕೂಟರ್‌ಗಳನ್ನು ರಸ್ತೆಗಿಳಿಸಲು ಈ ವಿಯೆಟ್ನಾಂ ಮೂಲದ ಕಂಪನಿ ಬೃಹತ್ ಮಟ್ಟದಲ್ಲೇ ಸಿದ್ಧತೆ ನಡೆಸುತ್ತಿದೆ.

ಭಾರತಕ್ಕೆ ತರಲಿರುವ ನಿರ್ದಿಷ್ಟ ಮಾಡೆಲ್‌ಗಳು ಅಥವಾ ಅವುಗಳ ಬೆಲೆಯನ್ನು ವಿನ್‌ಫಾಸ್ಟ್ ಇನ್ನು ಅಧಿಕೃತವಾಗಿ ಪ್ರಕಟಿಸಿಲ್ಲ. ಆದಾಗ್ಯೂ, ಆರಂಭದಲ್ಲಿ ಇವೊ (Evo), ಫೆಲಿಜ್ (Feliz) ಮತ್ತು ವೈಪರ್ (Viper) ಸ್ಕೂಟರ್‌ಗಳನ್ನು ಬಿಡುಗಡೆ ಮಾಡುವ ಸಾಧ್ಯತೆಯಿದೆ ಎಂದು ಮಾಧ್ಯಮ ವರದಿಗಳು ಹೇಳುತ್ತಿವೆ. ಇವುಗಳನ್ನು ತಮಿಳುನಾಡಿನ ತೂತುಕುಡಿಯಲ್ಲಿರುವ ಘಟಕದಲ್ಲಿ ಅಸೆಂಬಲ್ ಮಾಡಲಾಗುತ್ತದೆ. ಇಷ್ಟೇ ಅಲ್ಲದೆ, ಸ್ಪೋರ್ಟಿ ಲುಕ್‌ನ ವೈಪರ್ ಮತ್ತು ಮ್ಯಾಕ್ಸಿ-ಸ್ಟೈಲ್‌ನ ರಸಾದ್ (Rasad) ಸ್ಕೂಟರ್‌ಗಳ ವಿನ್ಯಾಸ ಪೇಟೆಂಟ್ ಕೂಡ ಭಾರತದಲ್ಲಿ ಇತ್ತೀಚೆಗೆ ಕಾಣಿಸಿಕೊಂಡಿದೆ. ಆದರೆ, ಪ್ರಸ್ತುತ ಯಾವೆಲ್ಲಾ ನಗರಗಳಲ್ಲಿ ಡೀಲರ್‌ಶಿಪ್ ಆರಂಭವಾಗಲಿದೆ ಎಂಬ ಪಟ್ಟಿಯನ್ನು ಕಂಪನಿ ಇನ್ನೂ ಹೊರಹಾಕಿಲ್ಲ.

ವಿನ್‌ಫಾಸ್ಟ್ ಇ-ಸ್ಕೂಟರ್ ಶೋರೂಂಗಳು ಎಲ್ಲೆಲ್ಲಿ ಬರಲಿವೆ? ಇಲ್ಲಿದೆ ಡೀಲರ್‌ಗಳು ಮತ್ತು ನಗರಗಳ ವಿವರ

ಆರಂಭಿಕ 50ಕ್ಕೂ ಹೆಚ್ಚು ಶೋರೂಂಗಳು ಉತ್ತರ, ಪಶ್ಚಿಮ, ಮಧ್ಯ, ದಕ್ಷಿಣ ಮತ್ತು ಪೂರ್ವ ಭಾರತದ ಪ್ರದೇಶಗಳಲ್ಲಿ ತಲೆಯೆತ್ತಲಿವೆ ಎಂದು ವಿನ್‌ಫಾಸ್ಟ್ ತಿಳಿಸಿದೆ. ದೆಹಲಿ ಎನ್‌ಸಿಆರ್, ರಾಜಸ್ಥಾನ, ಪಂಜಾಬ್, ಮಹಾರಾಷ್ಟ್ರ, ಗುಜರಾತ್ ಜೊತೆಗೆ ಕರ್ನಾಟಕ, ತೆಲಂಗಾಣ, ತಮಿಳುನಾಡು, ಕೇರಳ, ಆಂಧ್ರಪ್ರದೇಶ, ಪಶ್ಚಿಮ ಬಂಗಾಳ ಮತ್ತು ಒಡಿಶಾ ರಾಜ್ಯಗಳಲ್ಲಿ ಶೋರೂಂಗಳನ್ನು ನಿರೀಕ್ಷಿಸಬಹುದು. "ಭಾರತ ನಮಗೆ ಅತ್ಯಂತ ಪ್ರಮುಖ ಮಾರುಕಟ್ಟೆಯಾಗಿದೆ" ಎಂದು ಕಂಪನಿ ಹೇಳಿದ್ದು, ಸೂಕ್ತ ಚಾರ್ಜಿಂಗ್ ವ್ಯವಸ್ಥೆ ಮತ್ತು ಮಾರಾಟದ ನಂತರದ ಅತ್ಯುತ್ತಮ ಸೇವೆ ನೀಡುವುದಾಗಿ ಭರವಸೆ ನೀಡಿದೆ.

ಓಲಾ, ಅಥರ್, ಟಿವಿಎಸ್, ಬಜಾಜ್‌ಗೆ ಪೈಪೋಟಿ: ವಿನ್‌ಫಾಸ್ಟ್ ಇ-ಸ್ಕೂಟರ್ ಬೆಲೆ ಎಷ್ಟಿರಬಹುದು?

ಮಾಡೆಲ್	ಬೆಂಗಳೂರು ಎಕ್ಸ್-ಶೋರೂಂ ಬೆಲೆ
Ola S1 X 2 kWh	₹84,999
Ather Rizta (S–Z)	₹1,21,999–₹1,57,000
TVS iQube (base)	₹1,16,310
Bajaj Chetak C25	₹91,399
Bajaj Chetak C3501	₹1,52,140

ಈ ಸ್ಪರ್ಧಿಗಳ ಬೆಲೆಯು ವಿನ್‌ಫಾಸ್ಟ್ ಸಂಸ್ಥೆಗೆ ಭಾರತದಲ್ಲಿ ತಕ್ಕಮಟ್ಟಿನ ಸವಾಲು ನೀಡಲಿದೆ. ಬೆಂಗಳೂರಿನಲ್ಲಿ ಓಲಾ ಎಸ್1 ಎಕ್ಸ್ (2 kWh) ಬೆಲೆ ₹84,999 ಇದ್ದರೆ, ಅಥರ್ ರಿಜ್ಟಾ ₹1.22 ಲಕ್ಷದಿಂದ ₹1.57 ಲಕ್ಷದ ವ್ಯಾಪ್ತಿಯಲ್ಲಿದೆ. ಟಿವಿಎಸ್ ಐಕ್ಯೂಬ್ ಆರಂಭಿಕ ಬೆಲೆ ₹1.16 ಲಕ್ಷ ಹಾಗೂ ಬಜಾಜ್ ಚೇತಕ್ ಬೆಲೆ ರೂಪಾಂತರಗಳಿಗೆ ಅನುಗುಣವಾಗಿ ₹91,399 ರಿಂದ ₹1.52 ಲಕ್ಷದವರೆಗೆ ಇದೆ. ವಿನ್‌ಫಾಸ್ಟ್ ತನ್ನ ಸ್ಕೂಟರ್‌ಗಳ ಬೆಲೆಯನ್ನು ಇದೇ ಆಸುಪಾಸಿನಲ್ಲಿ ನಿರ್ಧರಿಸಬೇಕಾದ ಅಗತ್ಯವಿದೆ.

ಮೈಲೇಜ್, ಚಾರ್ಜಿಂಗ್ ಮತ್ತು ವಾರಂಟಿ: ವಿನ್‌ಫಾಸ್ಟ್ ಇ-ಸ್ಕೂಟರ್‌ಗಳಿಂದ ಏನೆಲ್ಲಾ ನಿರೀಕ್ಷಿಸಬಹುದು?

ಭಾರತೀಯ ಪ್ರಮಾಣೀಕರಣ (Certification) ಕೊಂಚ ಭಿನ್ನವಾಗಿರಬಹುದಾದರೂ, ವಿಯೆಟ್ನಾಂನಲ್ಲಿರುವ ಮಾಡೆಲ್‌ಗಳ ಅಂಕಿ-ಅಂಶಗಳು ನಮಗೆ ಪ್ರಮುಖ ಸೂಚನೆಗಳನ್ನು ನೀಡುತ್ತವೆ. ಉದಾಹರಣೆಗೆ, ಇವೊ ಗ್ರಾಂಡ್ ಸ್ಕೂಟರ್ ಎರಡು ಬ್ಯಾಟರಿಗಳೊಂದಿಗೆ (ಗಂಟೆಗೆ 30 ಕಿ.ಮೀ ವೇಗದಲ್ಲಿ) 262 ಕಿ.ಮೀ ವರೆಗೆ ಚಲಿಸುತ್ತದೆ ಎಂದು ಹೇಳಲಾಗಿದೆ. ಫೆಲಿಜ್ ಎಸ್ ಸ್ಕೂಟರ್ 198 ಕಿ.ಮೀ ಮೈಲೇಜ್ ನೀಡುತ್ತದೆ. ವಿಯೆಟ್ನಾಂನಲ್ಲಿ ವಿನ್‌ಫಾಸ್ಟ್ 3 ವರ್ಷಗಳ ಅನಿಯಮಿತ ಕಿಲೋಮೀಟರ್ ವಾರಂಟಿ ನೀಡುತ್ತಿದ್ದು, ಹೊಸ ಬ್ಯಾಟರಿ ಪ್ಯಾಕ್‌ಗಳಿಗೆ 8 ವರ್ಷಗಳ ವಾರಂಟಿ ನೀಡುವುದಾಗಿ ಜಾಹೀರಾತು ಮಾಡುತ್ತಿದೆ. ಇನ್ನು ಭಾರತದಲ್ಲಿ ಕೇಂದ್ರ ಸರ್ಕಾರದ ಸಬ್ಸಿಡಿ ಪ್ರೋತ್ಸಾಹಕಗಳು 2026ರ ಮಾರ್ಚ್ 31ಕ್ಕೆ ಮುಕ್ತಾಯಗೊಂಡಿವೆ. ಆದರೂ ರಾಜ್ಯಮಟ್ಟದ ವಿನಾಯಿತಿಗಳು ಬದಲಾಗಲಿದ್ದು, ಕರ್ನಾಟಕದಲ್ಲಿ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳಿಗೆ ಜೀವಿತಾವಧಿ ತೆರಿಗೆಯಿಂದ (Lifetime tax) ಇನ್ನೂ ವಿನಾಯಿತಿ ಮುಂದುವರಿದಿದೆ.

ಬುಕಿಂಗ್ ಮಾಡುವ ಮುನ್ನ ಗ್ರಾಹಕರು ಮುಖ್ಯವಾಗಿ ಗಮನಿಸಬೇಕಾದ ಸಂಗತಿಗಳೆಂದರೆ: ಭಾರತದಲ್ಲಿ ಬಿಡುಗಡೆಯಾಗುವ ಅಧಿಕೃತ ಮಾಡೆಲ್‌ಗಳ ಹೆಸರು, ಧೃಢೀಕರಿಸಿದ ಮೈಲೇಜ್ (Certified range), ಬ್ಯಾಟರಿ ಆಯ್ಕೆಗಳು ಮತ್ತು ಚಾರ್ಜರ್ ಹೊಂದಾಣಿಕೆ. ಇದರ ಜೊತೆಗೆ ರೋಡ್‌ಸೈಡ್ ಅಸಿಸ್ಟೆನ್ಸ್, ಬೈಬ್ಯಾಕ್/ರೀಸೇಲ್ ಆಫರ್‌ಗಳು ಮತ್ತು ಬ್ಯಾಟರಿ ವಾರಂಟಿಯ ಅವಧಿಯ ಬಗ್ಗೆ ಡೀಲರ್‌ಗಳಿಂದ ಸ್ಪಷ್ಟ ಮಾಹಿತಿ ಪಡೆಯಿರಿ. ಒಂದು ವೇಳೆ ಈ ತಿಂಗಳಿನಿಂದ ಟೆಸ್ಟ್ ರೈಡ್ ಆರಂಭವಾದರೆ, ವಿನ್‌ಫಾಸ್ಟ್ ಬಜಾಜ್ ಚೇತಕ್ C25 ಮತ್ತು ಟಿವಿಎಸ್ ಐಕ್ಯೂಬ್ ನಡುವೆ ಜಾಗ ಗಿಟ್ಟಿಸಿಕೊಳ್ಳಬಹುದು. ಇದರಿಂದ ಅಥರ್ ರಿಜ್ಟಾ ಗ್ರಾಹಕರನ್ನು ಕೂಡ ಸೆಳೆಯಲು ಸಾಧ್ಯವಾಗಲಿದ್ದು, ದಕ್ಷಿಣ, ಪಶ್ಚಿಮ ಹಾಗೂ ಉತ್ತರ ಭಾರತದ ಗ್ರಾಹಕರಿಗೆ ಮತ್ತಷ್ಟು ಉತ್ತಮ ಆಯ್ಕೆ ಸಿಕ್ಕಂತಾಗುತ್ತದೆ.