ಎಕ್ಸ್‌ಪ್ರೆಸ್‌ವೇ ನಡುರಸ್ತೆಯಲ್ಲೇ ಪಿಕ್ನಿಕ್! ಜೀವದ ಜೊತೆ ಚೆಲ್ಲಾಟವಾಡಿದ ಕುಟುಂಬಕ್ಕೆ ನೆಟ್ಟಿಗರ ತರಾಟೆ, ದಂಡದ ಬಿಸಿ ಗ್ಯಾರಂಟಿ!

ರಾಜಸ್ಥಾನದಲ್ಲಿ ಹೊಸದಾಗಿ ಉದ್ಘಾಟನೆಗೊಂಡ ಎಕ್ಸ್‌ಪ್ರೆಸ್‌ವೇಯ ನಡುರಸ್ತೆಯಲ್ಲೇ ಕುಟುಂಬವೊಂದು ಕುಳಿತು ಊಟ ಮಾಡುತ್ತಿರುವ ವಿಡಿಯೋ ಇನ್‌ಸ್ಟಾಗ್ರಾಮ್‌ನಲ್ಲಿ ತೀವ್ರ ವೈರಲ್ ಆಗಿದೆ. ಶಿವ ಮಹೇಶ್ವರಿ ಎಂಬ ಬಳಕೆದಾರರು ಹಂಚಿಕೊಂಡಿರುವ ಈ ಕ್ಲಿಪ್ ಜನರಲ್ಲಿ ಆಕ್ರೋಶಕ್ಕೆ ಕಾರಣವಾಗಿದ್ದು, ಹೈವೇ ಸುರಕ್ಷತೆಯ ಬಗ್ಗೆ ದೊಡ್ಡ ಮಟ್ಟದ ಆತಂಕ ಮೂಡಿಸಿದೆ. ಹಬ್ಬದ ಸಾಲಿನಲ್ಲಿ ಹೈವೇ ಟ್ರಿಪ್‌ಗಳಿಗೆ ಜನ ಸಜ್ಜಾಗುತ್ತಿರುವ ಬೆನ್ನಲ್ಲೇ, ರಸ್ತೆ ಸುರಕ್ಷತಾ ನಿಯಮಗಳು ಮತ್ತು ಇಂತಹ ಘಟನೆಗಳಿಗೆ ವಿಧಿಸುವ ದಂಡದ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಚರ್ಚೆ ಶುರುವಾಗಿದೆ.

ಎಕ್ಸ್‌ಪ್ರೆಸ್‌ವೇಗಳಲ್ಲಿ ವಾಹನಗಳು ವೇಗವಾಗಿ, ಯಾವುದೇ ಅಡಚಣೆಯಿಲ್ಲದೆ ಸಾಗಬೇಕಿರುತ್ತದೆ. ಹೀಗಿರುವಾಗ ಸಾಗುವ ಹಾದಿಯಲ್ಲಿ ವಾಹನ ನಿಲ್ಲಿಸುವುದು ಅಥವಾ ಕುಳಿತುಕೊಳ್ಳುವುದು ತೀವ್ರ ಅಪಾಯಕಾರಿ ಅಷ್ಟೇ ಅಲ್ಲ, ಕಾನೂನುಬಾಹಿರವೂ ಹೌದು. ಭಾರತದ ಮೋಟಾರು ವಾಹನ (ಚಾಲನಾ) ನಿಯಮಾವಳಿಗಳ ಪ್ರಕಾರ, ಹೈ-ಸ್ಪೀಡ್ ಮುಖ್ಯ ರಸ್ತೆಗಳಲ್ಲಿ ವಾಹನ ನಿಲ್ಲಿಸುವುದು ಅಥವಾ ಪಾರ್ಕಿಂಗ್ ಮಾಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಮೋಟಾರು ವಾಹನ ಕಾಯ್ದೆಯಡಿ, ಸಾರಿಗೆ ಸಂಚಾರಕ್ಕೆ ಅಡ್ಡಿಪಡಿಸುವುದು ಮತ್ತು ಅಪಾಯಕಾರಿ ರೀತಿಯಲ್ಲಿ ವಾಹನ ಬಿಟ್ಟು ಹೋಗುವುದು ದಂಡನೀಯ ಅಪರಾಧ. ರಸ್ತೆಯ ಮಧ್ಯೆ ಕುಳಿತುಕೊಳ್ಳುವುದು ಸಂಚಾರಕ್ಕೆ ತಡೆಯೊಡ್ಡುವ ಮತ್ತು ಪ್ರಾಣಕ್ಕೆ ಕಂಟಕ ತರುವ ಕೃತ್ಯವಾಗಿದೆ.

ಎಕ್ಸ್‌ಪ್ರೆಸ್‌ವೇಯಲ್ಲಿ ವಾಹನ ನಿಲ್ಲಿಸಿದರೆ ಎಷ್ಟು ದಂಡ? ಕಾನೂನು ಏನು ಹೇಳುತ್ತೆ?

ನಿಯಮ ಉಲ್ಲಂಘಿಸಿದರೆ ಸಾಮಾನ್ಯವಾಗಿ ಮೂರು ಮುಖ್ಯ ಸೆಕ್ಷನ್‌ಗಳ ಅಡಿಯಲ್ಲಿ ಕ್ರಮ ಕೈಗೊಳ್ಳಲಾಗುತ್ತದೆ. ಮೊದಲನೆಯದಾಗಿ, ಇತರರಿಗೆ ಅಪಾಯ ಅಥವಾ ತೊಂದರೆ ಉಂಟುಮಾಡುವ ರೀತಿಯಲ್ಲಿ ವಾಹನ ಬಿಟ್ಟು ತೆರಳಿದರೆ ಸೆಕ್ಷನ್ 122 ರ ಜೊತೆಗೆ ಸೆಕ್ಷನ್ 177 ಅನ್ವಯಿಸುತ್ತದೆ. ಎರಡನೆಯದಾಗಿ, ಸಂಚಾರಕ್ಕೆ ಅಡ್ಡಿಪಡಿಸಿದರೆ ಸೆಕ್ಷನ್ 201 ಅಡಿಯಲ್ಲಿ ಗಂಟೆಯ ಆಧಾರದಲ್ಲಿ ದಂಡ ಹಾಗೂ ಟೋವಿಂಗ್ ಚಾರ್ಜ್ ವಿಧಿಸಲಾಗುತ್ತದೆ. ಮೂರನೆಯದಾಗಿ, ರಸ್ತೆ ಸಂಚಾರ ನಿಯಮಗಳನ್ನು ಉಲ್ಲಂಘಿಸಿದರೆ ಸೆಕ್ಷನ್ 177A ಅಡಿಯಲ್ಲಿ ದಂಡ ತೆರಬೇಕಾಗುತ್ತದೆ. 2019 ರ ತಿದ್ದುಪಡಿ ಕಾಯ್ದೆಯ ಪ್ರಕಾರ ರಾಜ್ಯ ಸರ್ಕಾರಗಳು ಈ ದಂಡದ ಪ್ರಮಾಣವನ್ನು ಮತ್ತಷ್ಟು ಹೆಚ್ಚಿಸುವ ಅಧಿಕಾರ ಹೊಂದಿವೆ.

ಅಪರಾಧ	ಸೆಕ್ಷನ್	ಮೂಲ ದಂಡ
ಅಪಾಯಕಾರಿ ರೀತಿಯಲ್ಲಿ ವಾಹನವನ್ನು ರಸ್ತೆಯಲ್ಲೇ ಬಿಟ್ಟು ಹೋಗುವುದು	ಎಂವಿ ಆಕ್ಟ್ 122, 177	ಮೊದಲ ಬಾರಿಗೆ ₹500 ವರೆಗೆ, ಮರುಕಳಿಸಿದರೆ ₹1,500
ವಾಹನ ಸಂಚಾರಕ್ಕೆ ಅಡ್ಡಿಪಡಿಸುವುದು	ಎಂವಿ ಆಕ್ಟ್ 201	ಗಂಟೆಗೆ ₹500 ವರೆಗೆ ದಂಡ + ಟೋವಿಂಗ್ ಶುಲ್ಕ
ಹೈ-ಸ್ಪೀಡ್ ಹೈವೇಗಳಲ್ಲಿ ವಾಹನ ನಿಲ್ಲಿಸುವುದು/ಪಾರ್ಕಿಂಗ್ ಮಾಡುವುದು	ಡ್ರೈವಿಂಗ್ ನಿಯಮಗಳು; 177A/177	₹500 (ರಸ್ತೆ ನಿಯಮ ಉಲ್ಲಂಘನೆ)

ಹೈವೇಯಲ್ಲಿ ಸುರಕ್ಷಿತವಾಗಿ ವಾಹನ ನಿಲ್ಲಿಸುವುದು ಹೇಗೆ? ಈ ನಿಯಮ ಪಾಲಿಸಿ

ಎಮರ್ಜೆನ್ಸಿ ಸಮಯದಲ್ಲಿ ಹೈವೇಯಲ್ಲಿರುವ SOS ಲೇ-ಬೈ (SOS lay-bys) ಅಥವಾ ತೀರಾ ಎಡಭಾಗದ ಶೋಲ್ಡರ್ ಲೇನ್ ಬಳಸಬೇಕು. ವಾಹನ ನಿಲ್ಲಿಸಿದ ತಕ್ಷಣ ಹ್ಯಾಜಾರ್ಡ್ ಲೈಟ್‌ಗಳನ್ನು ಆನ್ ಮಾಡಿ. ವಾಹನದ ಮುಂದೆ ಮತ್ತು ಹಿಂದೆ 20 ಮೀಟರ್ ಅಂತರದಲ್ಲಿ ರಿಫ್ಲೆಕ್ಟಿವ್ ವಾರ್ನಿಂಗ್ ಟ್ರಯಾಂಗಲ್ ಇಡಿ. ಪ್ರಯಾಣಿಕರನ್ನು ರಸ್ತೆ ಬದಿಯ ತಡೆಗೋಡೆಯ ಆಚೆಗೆ ಸುರಕ್ಷಿತವಾಗಿ ನಿಲ್ಲಿಸಿ. ಟೋವಿಂಗ್, ಪ್ರಥಮ ಚಿಕಿತ್ಸೆ ಅಥವಾ ಪೆಟ್ರೋಲಿಂಗ್ ನೆರವಿಗಾಗಿ ರಾಷ್ಟ್ರೀಯ ಹೆದ್ದಾರಿ ಸಹಾಯವಾಣಿ 1033 ಗೆ ಕರೆ ಮಾಡಿ. ಪೇಡ್ ಟೋವಿಂಗ್ ಬಳಸುವ ಮೊದಲು ನಿಮ್ಮ ಇನ್ಶೂರೆನ್ಸ್ ಕಂಪನಿಗೆ ಮಾಹಿತಿ ನೀಡಿ. ನೆನಪಿಡಿ, ರಸ್ತೆಯ ಮಧ್ಯೆ ಪಿಕ್ನಿಕ್ ಮಾಡುವುದು, ಇನ್‌ಸ್ಟಾಗ್ರಾಮ್ ರೀಲ್ಸ್ ಮಾಡುವುದು ಅಥವಾ ಸಾಗುವ ಹಾದಿಯಲ್ಲಿ ನಿಲ್ಲುವುದು ತೀವ್ರ ಅಪಾಯಕಾರಿ.

ಕಠಿಣ ಕ್ರಮಕ್ಕೆ ಮುಂದಾದ ಪೊಲೀಸರು: ಜಾಗೃತಿ ಅಗತ್ಯ ಏಕೆ?

ರಸ್ತೆ ತಡೆದು ಸ್ಟಂಟ್ ಮಾಡುವುದು ಹಾಗೂ ವಿಡಿಯೋ ಚಿತ್ರೀಕರಿಸುವವರ ವಿರುದ್ಧ ಪೊಲೀಸರು ಈಗ ಕಠಿಣ ಕ್ರಮಕ್ಕೆ ಮುಂದಾಗಿದ್ದಾರೆ. ದ್ವಾರಕಾ ಎಕ್ಸ್‌ಪ್ರೆಸ್‌ವೇಯಲ್ಲಿ ಸ್ಟಂಟ್ ಮಾಡಿದ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಗುರುಗ್ರಾಮ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಇತ್ತೀಚೆಗೆ ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್‌ವೇಯಲ್ಲಿ ನಡೆದ ಗಲಾಟೆ ಪ್ರಕರಣವೂ ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿ, ಕೇಸ್ ದಾಖಲಾಗಿತ್ತು. ಈಗಿನ ಎಕ್ಸ್‌ಪ್ರೆಸ್‌ವೇಗಳಲ್ಲಿ ಸುಧಾರಿತ ಸಂಚಾರ ನಿರ್ವಹಣಾ ವ್ಯವಸ್ಥೆ (ATMS) ಇರುವುದರಿಂದ ನಿಯಮ ಉಲ್ಲಂಘಿಸಿದರೆ ತಕ್ಷಣ ಇ-ಚಲನ್ ಜಾರಿಯಾಗುತ್ತದೆ. ಇನ್‌ಸ್ಟಾಗ್ರಾಮ್‌ನಲ್ಲಿ ವೈರಲ್ ಆಗಲು ಮಾಡುವ ಸಣ್ಣ ಪಿಕ್ನಿಕ್ ಅಥವಾ ಸ್ಟಂಟ್, ಕೆಲವೇ ನಿಮಿಷಗಳಲ್ಲಿ ಜೀವಕ್ಕೆ ಅಪಾಯ ತರಬಹುದು ಮತ್ತು ಜೇಬಿಗೂ ದೊಡ್ಡ ಕನ್ನ ಹಾಕಬಹುದು!