ದ್ವಿಚಕ್ರ ವಾಹನ ಖರೀದಿದಾರರಿಗೆ ಆಫರುಗಳ ಸುರಿಮಳೆ

ಒಟ್ಟಾರೆ ಬೈಕ್ ಮಾರಾಟ ಹೆಚ್ಚಿಸಲು ವಾಹನ ಡೀಲರ್ ಗಳು ಇಂತಹ ಆಮೀಷಗಳನ್ನೊಡ್ಡುತ್ತಿದ್ದಾರೆ. ಹೋಂಡಾ ಸಿಬಿ ಟ್ವಿಸ್ಟರನ್ನೇ ಉದಾಹರಣೆಯಾಗಿ ತೆಗೆದುಕೊಳ್ಳೋಣ. ಈ ಬೈಕ್ ದರ ಸುಮಾರು 49,755 ರುಪಾಯಿ. ಹೀರೋ ಹೋಂಡಾದ ಅತ್ಯಧಿಕ ಮಾರಾಟದ ಬೈಕ್ ಸ್ಪೆಂಡರ್(41,350 ರು.)ಗೆ ಹೋಲಿಸಿದರೆ ಟ್ವಿಸ್ಟರ್ ದುಬಾರಿಯಾಗಿದೆ.

ಈ ರೀತಿ ಬೈಕ್ ಗಳೆರಡರ ನಡುವೆ ದರ ವ್ಯತ್ಯಾಸವಿದ್ದರೆ ಗ್ರಾಹಕರು ಹೆಚ್ಚಾಗಿ ಅಗ್ಗದ ಬೈಕನ್ನೇ ಖರೀದಿಸುತ್ತಾರೆ. ಇಂತಹ ದುಬಾರಿ ಬೈಕ್ ನಿಂದ ಗ್ರಾಹಕರು ದೂರ ಸರಿಯುವುದನ್ನು ಕಂಪನಿಗಳು ಅರಿತಿವೆ. ಹೀಗಾಗಿ ದೆಹಲಿಯ ಹೋಂಡಾ ಡೀಲರ್ ಗಳು ಟ್ವಿಸ್ಟರ್ ಬೈಕನ್ನು 3,500 ರು. ಕಡಿಮೆಗೆ ನೀಡುತ್ತಿದ್ದಾರೆ.

ತಮ್ಮ ಸಂಗ್ರಹದಲ್ಲಿರುವ ಬೈಕ್ ಸಂಖ್ಯೆಗಳನ್ನು ಕಡಿಮೆ ಮಾಡಲು ಕೂಡ ಬೈಕ್ ಡೀಲರ್ ಗಳು ಇಂತಹ ವಿನಾಯಿತಿ ನೀಡುತ್ತಾರೆ. ಆದರೆ ಗಮನಿಸಬೇಕಾದ ಸಂಗತಿಯೆಂದರೆ ಬೈಕ್ ಮಾರಾಟ ಪ್ರಗತಿ ಕಾಣುವ ನಿರೀಕ್ಷೆಯನ್ನು ಹೊಂದಿರುವುದರಿಂದ ಬೈಕ್ ಕಂಪನಿಗಳು ಇಂತಹ ವಿನಾಯಿತಿಯನ್ನು ನೀಡುತ್ತಿಲ್ಲ. ಆದರೆ ಕಡಿಮೆ ಮಾರಾಟದ ಇಂತಹ ಸ್ಟಾಕ್ ಗಳು ಬೇಗ ಮಾರಾಟವಾಗಲಿ ಎಂಬ ಉದ್ದೇಶದಿಂದ ಡೀಲರುಗಳು ಕೊಡುಗೆಗಳನ್ನು ನೀಡುತ್ತಿದ್ದಾರೆ.

"ದ್ವಿಚಕ್ರ ವಾಹನ ಮಾರುಕಟ್ಟೆಯು ಈಗಲೂ ಸದೃಢವಾಗಿದೆ. ಹೀಗಾಗಿ ಯಾವುದೇ ಕೊಡುಗೆ, ಆಫರುಗಳನ್ನು ನೀಡುವ ಅವಶ್ಯಕತೆ ಕಾಣುತ್ತಿಲ್ಲ" ಎಂದು ಬಜಾಜ್ ಆಟೋ ಮಾರುಕಟ್ಟೆ ಮುಖ್ಯಸ್ಥ ಮಿಲಂದ್ ಬಾಡೆ ಹೇಳಿದ್ದಾರೆ. ಆದರೆ ಗಮನಿಸಿ. ಬಜಾಜ್ ಡೀಲರ್ ಗಳು ಝೀರೋ ಪರ್ಸೆಂಟ್ ಬಡ್ಡಿದರದಲ್ಲಿ 100 ಸಿಸಿಯ ಬಜಾಜ್ ಡಿಸ್ಕವರ್ ಬೈಕ್ ಮಾರಾಟ ಮಾಡುತ್ತಿದ್ದಾರೆ.

ಟಿವಿಎಸ್ ಮೋಟರ್ಸ್ ಡೀಲರುಗಳು ಕೂಡ ಬೈಕ್ ಖರೀದಿದಾರರಿಗೆ ಹಲವು ವಿನಾಯಿತಿಗಳನ್ನು ನೀಡುತ್ತಿದ್ದಾರೆ. ಕಂಪನಿಯ 110 ಸಿಸಿ ಸ್ಟಾರ್ ಸಿಟಿ ಕಮ್ಯೂಟರ್ ಬೈಕ್ ಖರೀದಿದಾರರಿಗೆ ವಿಮೆ ಮತ್ತು ರಸ್ತೆ ತೆರಿಗೆಯಲ್ಲಿ 1,500 ರು. ವಿನಾಯಿತಿ ನೀಡುತ್ತಿವೆ.