ಕಲಾವಿದನ ಕೈಚಳಕದಿಂದ ಸೃಷ್ಟಿಯಾಯ್ತು ರಾಕ್ಷಸ ಬೈಕ್

ಕಲಾವಿದರ ಕಲ್ಪನೆಗೆ, ಸೃಜನಶೀಲತೆಗೆ, ಕೈಚಳಕಕ್ಕೆ ಎಲ್ಲೆ ಎಲ್ಲಿದೆ? ಕಸವನ್ನು ರಸ ಮಾಡುವ ಕಲೆ ಅವರಿಗೆ ಹೇಳಿಕೊಡಬೇಕೆ? ಆದರೆ ಈ ಕಲಾವಿದ ಕಸದಿಂದ ರಸ ಮಾಡಿಲ್ಲ. ರಾಕ್ಷಸ ಬೈಕ್ ಆಕೃತ್ತಿಯನ್ನೇ ಸೃಷ್ಟಿಸಿಬಿಟ್ಟಿದ್ದಾನೆ. ವಾಹನ ವಿನ್ಯಾಸ ಲೋಕವೇ ಮೂಗಿನ ಮೇಲೆ ಬೆರಳಿಟ್ಟು ನೋಡುವಂತಹ ಈ ವಿಚಿತ್ರ ಬೈಕ್ ಮತ್ತು ಸೃಷ್ಟಿಕರ್ತನ ಬಗ್ಗೆ ಕೊಂಚ ಮಾಹಿತಿ ಇಲ್ಲಿದೆ.

ಈ ಬೈಕಿನಂತೆ ಆತನ ಹೆಸರೇ ವಿಚಿತ್ರವಾಗಿದೆ. ಬ್ಯಾಂಕಾಂಕಿನ 54 ವರ್ಷದ ವ್ಯಕ್ತಿಯ ಹೆಸರು ರೂಂಗ್ರೋಜಾ ಸ್ಯಾಂಗ್ ವೊನ್ ಪ್ರಿಸರನ್. ಆತ ಸೈಕಲ್, ಬೈಕ್, ಸೆಕೆಂಡ್ ಹ್ಯಾಂಡ್ ಕಾರುಗಳ ವ್ಯರ್ಥ ಬಿಡಿಭಾಗಗಳನ್ನು ಮರುಬಳಕೆ ಮಾಡಿ ಈ ಬೈಕ್ ಸೃಷ್ಟಿಸಿ ಸೃಜನಶೀಲತೆ ಮೆರೆದಿದ್ದಾನೆ.

ಈತನಿಗೆ ಬ್ಯಾಂಕಾಂಕಿನಲ್ಲಿ "ಕೊ ಆರ್ಟ್ ಶಾಪ್" ಎಂಬ ಅಂಗಡಿಯಿದೆ. ಅಲ್ಲಿ ಗ್ರಾಹಕರ ಬೇಡಿಕೆಗೆ ತಕ್ಕಂತೆ ಇಂತಹ ಕಲಾತ್ಮಕ ವಾಹನಗಳನ್ನು ವಿನ್ಯಾಸ ಮಾಡಿಕೊಡುತ್ತಾನೆ. ಸಾಕಷ್ಟು ದೇಶಗಳಿಗೆ ಇವನ ವಾಹನಕೃತಿಗಳು ರಫ್ತಾಗಿವೆ. ಅವನಿಗೆ ಇಡೀ ಜಗತ್ತಿನಲ್ಲಿ ಗ್ರಾಹಕರಿದ್ದಾರಂತೆ!