ಡಿ.18ರಂದು ಹೊಸ ಹೋಂಡಾ ಯುನಿಕಾರ್ನ್ ಬಿಡುಗಡೆ

ನೀವು ಬೈಕ್ ಪ್ರೇಮಿಯಾಗಿದ್ದಲ್ಲಿ ನಿಮಗಿದೋ ಇಲ್ಲಿದೆ ಶುಭ ಸಮಾಚಾರ. ಎಲ್ಲ ಹೊಸತನದಿಂದ ಕೂಡಿರುವ ಹೊಸ ಹೋಂಡಾ ಯುನಿಕಾರ್ನ್ 160 ಸಿಸಿ ಬೈಕ್ ಇದೇ ಮುಂಬರುವ ಡಿಸೆಂಬರ್ 18 ಗುರುವಾರದಂದು ಭರ್ಜರಿ ಬಿಡುಗಡೆ ಕಾಣಲಿದೆ.

ಹೊಸ ಯುನಿಕಾರ್ನ್ ಬೈಕ್‌ನಲ್ಲಿ ಕೆಲವೊಂದು ಬದಲಾವಣೆ ಕಂಡುಬರಲಿದೆ. ಆದರೆ ಪವರ್ ವಿತರಣೆ ಬಗೆಗಿನ ಮಾಹಿತಿಗಳು ಇನ್ನೂ ಹೊರ ಬಂದಿಲ್ಲ. ಬಲ್ಲ ಮೂಲಗಳ ಪ್ರಕಾರ ಈ ಹಿಂದಿನ 150 ಸಿಸಿ ಬದಲಾಗಿ ಹೊಸ ಯುನಿಕಾರ್ನ್ 160 ಸಿಸಿ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದೆ. ಇದು ಹೆಚ್ಚು ಶಕ್ತಿಶಾಲಿ ಎನಿಸಿಕೊಳ್ಳುವಲ್ಲಿ ನೆರವಾಗಲಿದೆ. ಇದರ ಏರ್ ಕೂಲ್ಡ್ ಎಂಜಿನ್ 14 ಅಶ್ವಶಕ್ತಿ ಉತ್ಪಾದಿಸಲಿದೆ.

ಇಲ್ಲಿ ಕುತೂಹಲಕಾರಿ ವಿಷಯವೆಂದರೆ ಸಿಬಿ ಟ್ರಿಗರ್ ಬದಲಿಯಾಗಿ ಯುನಿಕಾರ್ನ್ ಪ್ರವೇಶ ಪಡೆಯಲಿದೆಯೇ ಅಥವಾ ಇನ್ನು ಸ್ವಲ್ಪ ಹೆಚ್ಚು ಶಕ್ತಿಶಾಲಿಯೊಂದಿಗೆ ಕಾಣಿಸಿಕೊಳ್ಳಲಿದೆಯೇ ಎಂಬುದನ್ನು ಕಾದು ನೋಡಬೇಕಾಗಿದೆ. ಇದು ಪ್ರಮುಖವಾಗಿಯೂ ಇತ್ತೀಚೆಗಷ್ಟೇ ಬಿಡುಗಡೆಯಾಗಿರುವ ಸುಜುಕಿ ಜಿಕ್ಸರ್ ಹಾಗೂ ಟಿವಿಎಸ್ ಅಪಾಚಿ ಆರ್‌ಟಿಆರ್ 160 ಮಾದರಿಗಳಿಗೆ ಪೈಪೋಟಿ ಒಡ್ಡಲಿದೆ.

'ಎಚ್' ವಿನ್ಯಾಸಿತ ಟೈಲ್ ಲ್ಯಾಂಪ್, ಎಲ್‌ಇಡಿ ಯುನಿಟ್ ಹಾಗೂ ಮಸಲರ್ ಟ್ಯಾಂಕ್ ಮೇಲೆ ತ್ರಿಡಿ ಹೋಂಡಾ ಲಾಂಛನ ಪಡೆಯಲಿದೆ. ಅಂತೆಯೇ ಸ್ವಿಚ್ ಗೇರ್, ಹ್ಯಾಂಡಲ್ ಹಾಗೂ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಮುಂತಾದ ವೈಶಿಷ್ಟ್ಯಗಳು ಪಡೆಯಲಿದೆ.