ಪ್ರಸಕ್ತ ಸಾಲಿನಲ್ಲೇ ಹೊಸ ಹೋಂಡಾ ಸಿಬಿಆರ್150ಆರ್ ಎಂಟ್ರಿ

ವಿಶ್ವಾಸಾರ್ಹ ಮೋಟಾರುಸೈಕಲ್‌ ನಿರ್ಮಾಣಕ್ಕಾಗಿ ಹೆಸರು ಮಾಡಿರುವ ಜಪಾನ್‌ನ ದೈತ್ಯ ದ್ವಿಚಕ್ರ ವಾಹನ ತಯಾರಿಕ ಸಂಸ್ಥೆಯಾಗಿರುವ ಹೋಂಡಾ, ಪ್ರಸಕ್ತ ಸಾಲಿನಲ್ಲೇ ದೇಶಕ್ಕೆ 2015 ಸಿಬಿಆರ್150ಆರ್ ಮಾದರಿಯನ್ನು ಪರಿಚಯಿಸಲಿದೆ.

ಗಮನಾರ್ಹ ಬದಲಾವಣೆಗಳನ್ನು ಪಡೆದುಕೊಳ್ಳಲಿರುವ ಹೊಸ ಸಿಬಿಆರ್150ಆರ್ ಫೇಸ್‌ಲಿಫ್ಟ್ ಮಾದರಿಯು ಪ್ರಸಕ್ತ ಸಾಲಿನಲ್ಲೇ ಬಿಡುಗಡೆಯಾಗಲಿದೆ ಎಂಬುದು ತಿಳಿದು ಬಂದಿದೆ. ಈ ಮೂಲಕ ಸಂಸ್ಥೆಯು ಈಗಿರುವ ಶ್ರೇಣಿಯ ಬೈಕ್‌ಗಳಿಗೆ ಹೊಸ ಹುರುಪು ನೀಡಲಿದೆ.

ಹಾಗಿದ್ದರೂ ತಾಂತ್ರಿಕವಾಗಿ ಯಾವುದೇ ಬದಲಾವಣೆ ಕಂಡುಬರುವುದಿಲ್ಲ. ಇದು 150ಸಿಸಿ ಸಿಂಗಲ್ ಸಿಲಿಂಡರ್ ಲಿಕ್ವಿಡ್ ಕೂಲ್ಡ್ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದ್ದು, 6 ಸ್ಪೀಡ್ ಮ್ಯಾನುವಲ್ ಗೇರ್ ಬಾಕ್ಸ್ ಇರಲಿದೆ. ಇದು 17.5 ಅಶ್ವಶಕ್ತಿ (12 ಎನ್‌ಎಂ ಟಾರ್ಕ್) ಉತ್ಪಾದಿಸುವ ಸಾಮರ್ಥ್ಯ ಹೊಂದಿರಲಿದೆ.

ಎಲ್ಲ ಹೊಸತನದ ಎಕ್ಸಾಸ್ಟ್ ಹಾಗೂ ಬಾಡಿ ಪ್ಯಾನೆಲ್‌ಗಳು ಹೊಸ ಲುಕ್ ನೀಡಲಿದೆ. ಹಾಗಿದ್ದರೂ ಬಿಡುಗಡೆ ದಿನಾಂಕ ಇನ್ನಷ್ಟೇ ಘೋಷಣೆಯಾಗಬೇಕಾಗಿದೆ. ಈಗಿರುವ ಮಾದರಿಯ ಮುಂಬೈ ಎಕ್ಸ್ ಶೋ ರೂಂ ಬೆಲೆ 1.21 ಲಕ್ಷ ರು.ಗಳಷ್ಟಿದ್ದು, ಹೊಸ ಬೈಕ್ ಹೆಚ್ಚು ಕಡಿಮೆ ಇದೇ ಬೆಲೆ ಕಾಪಾಡಿಕೊಳ್ಳುವ ನಿರೀಕ್ಷೆಯಿದೆ.