'ವೆಸ್ಪಾ' ಚೆಲುವೆಗೆ ಹೊಸ ವಿನ್ಯಾಸದ ಸೀರೆ ಉಡುಸಿದ ಯುವಕ

ತನ್ನ ಕಲಾಸ್ಪರ್ಶದಿಂದ ವೆಸ್ಪಾ ಸ್ಕೂಟರ್ ನ ನೋಟ ಬದಲಾಯಿಸಿದ್ದಷ್ಟೇ ಅಲ್ಲದೆ ಈ ವಿಶೇಷ ವಿನ್ಯಾಸಕ್ಕಾಗಿ ಹೊಸ ದಾಖಲೆಗೂ ಪಾತ್ರರಾಗಿದ್ದಾರೆ. 2015ರ ಲಿಮ್ಕಾ ಬುಕ್ ಆಫ್ ರೆಕಾರ್ಡ್ ನಲ್ಲಿ ಅವರ ವೆಸ್ಪಾ ವಿನ್ಯಾಸ ದಾಖಲಾಗಿದೆ.

"ವೆಸ್ಪಾ ಸ್ಕೂಟರ್ ಟೆಸ್ಟ್ ಡ್ರೈವ್ ಮಾಡಿದ ಮರುದಿನವೇ ಅದು ನಮ್ಮ ಮನೆ ಮುಂದಿತ್ತು. ಇದೀಗ ನಾನು ವೆಸ್ಪಾದ ಸಂತೃಪ್ತ ಗ್ರಾಹಕರಲ್ಲಿ ಒಬ್ಬ. ಬೆಸ್ಟ್ ಸ್ಕೂಟರ್ ತಯಾರಿಸಿದ ಪಿಯಾಗಿಯೋ ಕಂಪನಿಗೆ ಅನಂತ ಧನ್ಯವಾದಗಳು" ಎನ್ನುವ ಪ್ರತೀಕ್ ಅವರನ್ನು ಈಗ ಎಲ್ಲರೂ "ವೆಸ್ಪಾ ಪ್ರತೀಕ್" ಎಂದು ಕರೆಯುವಂತಾಗಿದೆ.

ಕೇವಲ 2 ಗಂಟೆಗಳಲ್ಲಿ ವೆಸ್ಪಾ ಎಂಬ ಚೆಲುವೆಯನ್ನು ಗ್ರಾಫಿಕ್ಸ್ ಮೂಲಕ ಇನ್ನಷ್ಟು ಮೆರುಗು ನೀಡಿ ಬೆರಗಾಗುವಂತೆ ಮಾಡಿದ್ದಾರೆ. ವೆಸ್ಪಾ ಮೇಲೆ ಅತ್ಯಧಿಕ ಸಂಖ್ಯೆಯ ಗ್ರಾಫಿಕ್ ಡಿಸೈನ್ಸ್ ಬಳಸಿರುವ ಕಾರಣಕ್ಕೆ ವಿಶ್ವದಾಖಲೆಗೂ ಅವರ ಡಿಸೈನ್ ಪಾತ್ರವಾಗಿದೆ.

ಪ್ರತೀಕ್ ಅವರ ಕಲೆಗಾರಿಕೆಯನ್ನು ಮೆಚ್ಚಿರುವ ವೆಸ್ಪಾ ಕಂಪನಿ ತನ್ನ ವೆವ್ ಸೈಟ್ ನಲ್ಲಿ ಅವರ ಸಾಧನೆಯನ್ನು ಕೊಂಡಾಡಿದೆ. ಪ್ರತೀಕ್ ಅವರಿಂದ ವಿವರಗಳನ್ನು ಪಡೆದುಕೊಂಡು ತನ್ನ ವೆಬ್ ತಾಣದಲ್ಲಿ ಅದನ್ನು ಪ್ರಕಟಿಸಿದೆ. ಆ ಲೇಖನವನ್ನು ಇಲ್ಲಿ ಓದಬಹುದು

ಈ ರೀತಿಯ ದಾಖಲೆಗಳನ್ನು ಸೃಷ್ಟಿಸುತ್ತಿರುವುದು ಇದೇ ಮೊದಲಲ್ಲ. ಈ ಹಿಂದೆ ಅವರು ಅತ್ಯಂತ ಕಡಿಮೆ ಸಮಯದಲ್ಲಿ 36 ವೆಬ್ ಸೈಟ್ ಗಳನ್ನು ಸೃಷ್ಟಿಸಿ ರಾಷ್ಟ್ರ ದಾಖಲೆ ಮಾಡಿದ್ದರು. ಈಗ ಅವರ ಕಣ್ಣು ವೆಸ್ಪಾ ಮೇಲೆ ಬಿದ್ದು ಎಲ್ಲರ ಕಣ್ಮನ ಸೆಳೆಯುವಂತೆ ಮಾಡಿದ್ದಾರೆ.

"ಇಟಾಲಿಯನ್ ಸ್ಟೈಲ್ ಹಾಗೂ ಡಿಸೈನ್ ಕಾರಣದಿಂದ ವೆಸ್ಪಾ ಸ್ಕೂಟರನ್ನು ಈ ರೀತಿಯ ವಿನ್ಯಾಸಕ್ಕಾಗಿ ತಾನು ಆಯ್ಕೆ ಮಾಡಿಕೊಂಡೆ ಎನ್ನುವ ಪ್ರತೀಕ್, ಅದಕ್ಕೆ ಗ್ರಾಫಿಕ್ಸ್ ಮಾಡಿದ ದಿನ ಬೆಂಗಳೂರಿನಲ್ಲಿ 80 ಕಿ.ಮೀ ಓಡಾಡಿ ಎಲ್ಲರ ಕಣ್ಣು ಕುಕ್ಕುವಂತೆ ಮಾಡಿದ್ದರು.

ಇನ್ನೂ 23ರ ಹರೆಯದ ಪ್ರತೀಕ್ ಜೈನ್ ಮನಸ್ಸಿನಲ್ಲಿ ಈ ರೀತಿಯ ಹತ್ತು ಹಲವಾರು ದಾಖಲೆಗಳನ್ನು ಮಾಡುವ ಹಂಬಲ, ಛಲ ಇದೆ. ವಾರಾಂತ್ಯಗಳಲ್ಲಿ ಗೆಳೆಯರ ಜೊತೆ ಸೇರಿ ತನ್ನ ಮುದ್ದಿನ ವೆಸ್ಪಾ ಜೊತೆಗೆ ಪ್ರಯಾಣಿಸುವುದು ಪ್ರತೀಕ್ ಹವ್ಯಾಸಗಳಲ್ಲಿ ಒಂದು.

ಈ ಕನಸುಗಾರ ಯುವಕನ ಕಣ್ಣುಗಳಲ್ಲಿ ಮುಂದೊಮ್ಮೆ ತಾನು ವೆಸ್ಪಾ ಸ್ಕೂಟರ್ ರಾಯಭಾರಿ ಆಗಬೇಕೆಂಬ ಬಹು ದೊಡ್ಡ ಕನಸು ಇದೆ. ಆ ಕನಸು ನನಸಾಗಲಿ ಎಂದು ಆಶಿಸೋಣ.

ಪ್ರತೀಕ್ ವೆಸ್ಪಾದಲ್ಲಿ ನಟಿ ಶ್ವೇತಾ ಪಂಡಿತ್ - ಡಬಲ್ ಧಮಾಕಾ