ಜಿಎಸ್‌ಟಿಗೆ ವಿರುದ್ಧವಾಗಿ ಬೈಕ್ ಬೆಲೆ ಹೆಚ್ಚಳ ಮಾಡಿದ ಕೆಟಿಎಂ

ತೆರಿಗೆ ಮತ್ತು ಸರಕು ಸೇವಾ ನೀತಿ ಅಡಿಯಲ್ಲಿ 350 ಸಿಸಿ ಗಿಂತ ಮೇಲ್ಪಟ್ಟ ಬೈಕ್‌ಗಳ ಬೆಲೆ ಹೆಚ್ಚಿಸಲಾಗಿದ್ದು, ಪ್ರಮುಖ ವಾಹನ ಉತ್ಪಾದನಾ ಸಂಸ್ಥೆಯಾದ ಕೆಟಿಎಂ ಕೂಡಾ ತನ್ನ ಪ್ರಮುಖ ಬೈಕ್ ಮಾದರಿಗಳ ಮೇಲಿನ ದರಗಳನ್ನ ಹೆಚ್ಚಿಸಿದೆ.

ಆದ್ರೆ ಪ್ರಮುಖ ವಿಚಾರವಾಗಿ ಮಾತನಾಡುವುದಾದರೇ ಕೆಟಿಎಂ 350 ಸಿಸಿಗಿಂತ ಕಡಿಮೆ ಎಂಜಿನ್ ಬೈಕ್‌ಗಳ ಬೆಲೆ ಇಳಿಕೆಯಾಗಬೇಕಿತ್ತು. ಆದ್ರೆ ಜಿಎಸ್‌ಟಿ ಹೊಸ ನೀತಿಗೆ ವಿರುದ್ಧವಾಗಿ ಆರ್‌ಸಿ 200, ಡ್ಯೂಕ್ 200, ಡ್ಯೂಕ್ 250 ಬೈಕ್‌ಗಳ ಬೆಲೆ ಕೂಡಾ ಹೆಚ್ಚಳಗೊಂಡಿವೆ.

ಎಲ್ಲಾ ಬೈಕ್ ಮಾದರಿಗಳ ಮೇಲಿನ ಬೆಲೆಯನ್ನು ಶೇ.2ಕ್ಕೆ ಹೆಚ್ಚಳ ಮಾಡಿರುವ ಕೆಟಿಎಂ, ಕನಿಷ್ಠ ರೂ. 628 ರಿಂದ ರೂ.5,797 ರವರೆಗೆ ಬೆಲೆ ಹೆಚ್ಚಳ ಮಾಡಿದೆ.

ಕೆಟಿಎಂ 200 ಡ್ಯೂಕ್ ಮೇಲೆ ರೂ.4,063 ಹೆಚ್ಚಳ ಮಾಡಲಾಗಿದ್ದು, ಅದೇ ರೀತಿಯಾಗಿ 250 ಡ್ಯೂಕ್ ಮೇಲೆ ರೂ.3,924, 390 ಡ್ಯೂಕ್ ಮೇಲೆ ರೂ.628, ಆರ್‌ಸಿ 200 ಮೇಲೆ ರೂ.4,787 ಮತ್ತು ಆರ್‌ಸಿ 390 ಮೇಲೆ ರೂ.5797 ಹೆಚ್ಚಳ ಮಾಡಲಾಗಿದೆ.

Ex-Showroom Price (Delhi)

ಈ ಹಿನ್ನೆಲೆ ಕೆಟಿಎಂ ನಡೆ ಬಗ್ಗೆ ಆಟೋ ಉದ್ಯಮ ವಲಯದಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದ್ದು, 350 ಸಿಸಿಗಿಂತ ಕಡಿಮೆ ಬೈಕ್‌ಗಳ ಬೆಲೆಗಳನ್ನು ಹೆಚ್ಚಳ ಮಾಡಿರುವ ಬಗ್ಗೆ ಕೆಟಿಎಂ ಯಾವುದೇ ಸ್ಪಷ್ಟನೆ ಕೂಡಾ ನೀಡಿಲ್ಲ.

ಡ್ರೈವ್ ಸ್ಪಾರ್ಕ್ ಅಭಿಪ್ರಾಯ

ಜುಲೈ 1ರಿಂದಲೇ ಜಾರಿಗೆ ಬರುವಂತೆ ಎಲ್ಲ ಆಟೋ ಉತ್ಪಾದಕರು 350 ಸಿಸಿ ಕೆಳ ಮಟ್ಟದ ಬೈಕ್ ಬೆಲೆಗಳನ್ನು ಕಡಿಮೆ ಮಾಡಿದ್ದರು ಕೆಟಿಎಂ ಮಾತ್ರ ಬೆಲೆ ಹೆಚ್ಚಳ ಮಾಡಿದೆ. ಆದ್ರೆ ಈ ಬಗ್ಗೆ ಸ್ಪಷ್ಟನೆ ನೀಡದ ಕೆಟಿಎಂ ಮಾತ್ರ ಗ್ರಾಹಕರಿಗೆ ಬೆಲೆ ಬರೆ ನೀಡುತ್ತಿರುವುದು ಅನುಮಾನಕ್ಕೆ ಎಡೆಮಾಡಿದೆ.