ಅಗುಸ್ಟಾ ಸಂಸ್ಥೆಯ ಷೇರುಗಳನ್ನು ಮಾರಾಟ ಮಾಡಿದ ಮರ್ಸಿಡಿಸ್

ಇಟಾಲಿಯನ್ ಸೈಕಲ್ ತಯಾರಕ MV ಅಗುಸ್ಟಾ ಸಂಸ್ಥೆಯ ಶೇಕಡಾ 25 % ರಷ್ಟು ಪಾಲನ್ನು ಬ್ಲಾಕ್ ಓಷನ್ ಗ್ರೂಪ್ ಕಂಪೆನಿಯ ಭಾಗವಾದ ಕಂಸಾರ್ ಇನ್ವೆಸ್ಟ್‌ಗೆ ಮರ್ಸಿಡಿಸ್ ಬೆಂಝ್ ಬಿಕರಿ ಮಾಡಿದ್ದು, ಇತ್ತೀಚಿಗೆ ಈ ಮಾಹಿತಿ ಹೊರಬಿದ್ದಿದ್ದು, ಎಲ್ಲೆಡೆ ಹೆಚ್ಚು ಸುದ್ದಿ ಮಾಡಿದೆ.

ಈ ನಡೆಯಿಂದ 2014ರ ಒಪ್ಪಂದದಂತೆ, ಎರಡು ಕಂಪನಿಗಳ ನಡುವೆ ಇದ್ದ ಮಾರಾಟ ಮತ್ತು ಮಾರುಕಟ್ಟೆ ಪಾಲುದಾರಿಕೆ ಕೊನೆಗೊಂಡಿದ್ದು, ಮಾರಾಟ ಮೌಲ್ಯವನ್ನು ಎರಡು ಕಂಪನಿಗಳೂ ಬಹಿರಂಗಪಡಿಸಿಲ್ಲ.

ಮರುರಚನೆಯಿಂದಾಗಿ ಇತ್ತೀಚಿನ ಕಂಪೆನಿಯ ಆರ್ಥಿಕ ಪರಿಸ್ಥಿತಿ ಸುಧಾರಣೆಗೊಂಡಿದೆ ಎಂದು MV ಅಗುಸ್ಟಾ ಕಂಪೆನಿಯ ಅಧ್ಯಕ್ಷ ಮತ್ತು ಮಾಲೀಕರಾದ ಜಿಯೊವನೀ ಕ್ಯಾಸ್ಟಿಗ್ಲಿಯಾನಿ ತಿಳಿಸಿದ್ದಾರೆ.

ವರದಿಗಳ ಪ್ರಕಾರ, MV ಅಗುಸ್ಟಾ ಬಂಡವಾಳ ಈ ಒಪ್ಪಂದದಿಂದಾಗಿ ಏರಿಕೆಯಾಗಿದ್ದು, ಅತ್ಯಾಧುನಿಕ ಮೋಟಾರ್ ಸೈಕಲ್ ತಯಾರಿಕೆ ಮಾಡಲು ಹೆಚ್ಚು ಉಪಯೋಗವಾಗಲಿದೆ. ಮರ್ಸಿಡಿಸ್ ಸಂಸ್ಥೆ 30 ಮಿಲಿಯನ್ ಯುರೊ ನೀಡಿ 2014ರಲ್ಲಿ MV ಅಗುಸ್ಟಾ ಕಂಪೆನಿಯ ಷೇರುಗಳನ್ನು ಖರೀದಿಸಿತ್ತು.

ಆದರೆ ಇತ್ತೀಚೆಗೆ ನೆಡೆದಿರುವ ಈ ಮಾರಾಟ ಪ್ರಕ್ರಿಯೆ ದೊಡ್ಡ ಮೌಲ್ಯ ಹೊಂದಿದೆ ಎಂಬ ಮಾತುಗಳು ಕೇಳಿ ಬಂದಿವೆ. ಇನ್ನಷ್ಟು ಬಂಡವಾಳ ಹೂಡಿಕೆಯಿಂದಾಗಿ ಮೋಟಾರ್‌ಸೈಕಲ್ ತಯಾರಕರು ಹೆಚ್ಚು ಅಭಿವೃದ್ಧಿ ಹೊಂದಿದ ತಂತ್ರಜ್ಞಾನದ ಬೈಕುಗಳನ್ನು ಗ್ರಾಹಕರಿಗೆ ಪೂರೈಕೆ ಮಾಡಬಹುದಾಗಿದೆ.