ಯುಎಸ್‌ಎ ಮಾರುಕಟ್ಟೆಯಲ್ಲೂ ಕಮಾಲ್ ಮಾಡಲಿದೆ ರಾಯಲ್ ಎನ್‌ಫೀಲ್ಡ್ ಹಿಮಾಲಯನ್

ದೇಶಿಯ ಮಾರುಕಟ್ಟೆಯಲ್ಲಿ ಉತ್ಪಾದನೆಯಾದ ಹಿಮಾಯನ್ ಮಾದರಿಗಳನ್ನೇ ಯುಎಸ್ಎ ಮಾರುಕಟ್ಟೆಗೂ ರಫ್ತು ಮಾಡುವ ಉದ್ದೇಶ ಹೊಂದಿರುವ ರಾಯಲ್ ಎನ್‌ಫೀಲ್ಡ್ ಸಂಸ್ಥೆಯು ಈಗಾಗಲೇ ಬಿಡುಗಡೆ ಕೈಗೊಳ್ಳುವ ನಿಟ್ಟಿನಲ್ಲಿ ಅಗತ್ಯ ತಯಾರಿ ನಡೆಸಿದೆ.

ಯುಎಸ್ಎ ಮಾರುಕಟ್ಟೆಯಲ್ಲಿ ಸೂಪರ್ ಬೈಕ್ ಮಾದರಿಗಳಿಗೆ ಭಾರೀ ಬೇಡಿಕೆ ಇದ್ದು, ಈ ಹಿನ್ನೆಲೆ ಹಿಮಾಲಯನ್ ಆವೃತ್ತಿಯನ್ನೇ ಮತ್ತಷ್ಟು ಹೊಸ ರೂಪದೊಂದಿಗೆ ಸಿದ್ಧಗೊಳಿಸಲು ರಾಯಲ್ ಎನ್‌‌ಫೀಲ್ಡ್ ನಿರ್ಧರಿಸಿದೆ.

ಈಗಾಗಲೇ ಯುಎಸ್ಎಯಲ್ಲಿ ಹಿಮಾಲಯನ್ ಆವೃತ್ತಿಗಳಿಂದ ಒಂದು ಸುತ್ತಿನ ಪರೀಕ್ಷಾರ್ಥ ಚಾಲನೆ ಕೈಗೊಳ್ಳಲಾಗಿದ್ದು, ಅತ್ಯುತ್ತಮ ಆಪ್ ರೋಡಿಂಗ್ ಪ್ರದರ್ಶನ ಹಿನ್ನೆಲೆ ಗ್ರಾಹಕರನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿದೆ.

ಆದರೂ ಅಮೆರಿಕನ್ ಮಾರುಕಟ್ಟೆಯಲ್ಲಿನ ಇತರೆ ಬೈಕ್ ಮಾದರಿಗಳಿಗೆ ಹೊಲಿಕೆ ಮಾಡಿದಲ್ಲಿ ಹಿಮಾಲಯನ್ ಆವೃತ್ತಿಯಲ್ಲಿ ಸಾಕಷ್ಟು ಸುಧಾರಣೆ ಅವಶ್ಯಕತೆಯಿದ್ದು, ಎಬಿಎಸ್ ಸೇರಿದಂತೆ ಕೆಲವು ಕಡ್ಡಾಯ ಸುರಕ್ಷಾ ತಂತ್ರಜ್ಞಾನಗಳ ಅಳವಡಿಕೆ ಮಾಡಬೇಕಿರುವುದು ಅನಿವಾರ್ಯತೆಯಿದೆ.

ಈ ಹಿನ್ನೆಲೆ ಯುಎಸ್ಎ ಮಾರುಕಟ್ಟೆಯಲ್ಲಿನ ಸೂಪರ್ ಬೈಕ್ ಮಾದರಿಗಳ ಅವಶ್ಯಕ ತಂತ್ರಜ್ಞಾನಗಳನ್ನು ಅಳವಡಿಸಲು ತುರ್ತು ಕ್ರಮ ಕೈಗೊಂಡಿರುವ ರಾಯಲ್ ಎನ್‌ಫೀಲ್ಡ್, ಅಕ್ಟೋಬರ್ ಅಥವಾ ನವೆಂಬರ್‌ನಿಂದ ಬೇಡಿಕೆಗೆ ಅನುಗುಣವಾಗಿ ಹೊಸ ಬೈಕ್ ಮಾದರಿಗಳನ್ನು ರಫ್ತು ಕೈಗೊಳ್ಳಲಿದೆ.

ಡ್ರೈವ್ ಸ್ಪಾರ್ಕ್ ಅಭಿಪ್ರಾಯ

411 ಸಿಸಿ ಸಿಂಗಲ್ ಸಿಲಿಂಡರ್ ಎಂಜಿನ್‌ನೊಂದಿಗೆ ಅತ್ಯುತ್ತಮ ಬಿಎಚ್‌ಪಿ ಉತ್ಪಾದನಾ ಶಕ್ತಿ ಹೊಂದಿರುವ ಹಿಮಾಲಯನ್, ಇದೀಗ ವಿದೇಶಿ ಮಾರುಕಟ್ಟೆಗಳಲ್ಲೂ ಉತ್ತಮ ಬೇಡಿಕೆ ಪಡೆದುಕೊಳ್ಳುತ್ತಿದೆ. ಈ ಹಿನ್ನೆಲೆ ಬೃಹತ್ ಯೋಜನೆ ರೂಪಿಸಿರುವ ರಾಯಲ್ ಎನ್‌ಫೀಲ್ಡ್ ಅಮೆರಿಕದಲ್ಲಿ ವಾರ್ಷಿಕವಾಗಿ 5 ಸಾವಿರ ಬೈಕ್‌ಗಳನ್ನು ಮಾರಾಟ ಮಾಡುವ ಉದ್ದೇಶ ಹೊಂದಿದೆ.