ಬೆಂಗಳೂರಿನ ಸ್ಕೂಟರ್‌ಗೆ ವಿದೇಶಗಳಲ್ಲಿ ಸಖತ್ ಡಿಮ್ಯಾಂಡ್: ಅಲ್ಲಿ ಹೊಸ ಮಾಡಲ್ ಬಿಡುಗಡೆ

ಭಾರತದ ಪ್ರಮುಖ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ತಯಾರಕ ಹಾಗೂ ಬೆಂಗಳೂರು ಮೂಲದ ಎಥರ್ ಎನರ್ಜಿ, ಇತ್ತೀಚೆಗೆ ಶ್ರೀಲಂಕಾದಲ್ಲಿ 2025 ಎಥರ್ 450X (Ather 450X) ಅನ್ನು ಬಿಡುಗಡೆ ಮಾಡಿದೆ. ಇದು ಅಂತರರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ತನ್ನ ಅಸ್ತಿತ್ವವನ್ನು ಬಲಪಡಿಸುವ ಗುರಿಯನ್ನು ಹೊಂದಿರುವ ಎಥರ್‌ನ ಅಂತರರಾಷ್ಟ್ರೀಯ ಬೆಳವಣಿಗೆಯ ಗುರಿಯಲ್ಲಿ ಒಂದು ಮೈಲಿಗಲ್ಲನ್ನು ಗುರುತಿಸುತ್ತದೆ. ಈ ಸ್ಕೂಟರ್‌ಗೆ ಅಂತರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಉತ್ತಮ ಬೇಡಿಕೆಯಿದ್ದು, ಸಾಕಷ್ಟು ಜನಪ್ರಿಯತೆ ಗಳಿಸಿದೆ. ಈಗ ಎಥರ್ ಶ್ರೀಲಂಕಾದಲ್ಲಿ ಒಂದೊಂದೆ ಮಾದರಿಗಳನ್ನು ಪರಿಚಯಿಸುತ್ತಿರುವುದಾಗಿ ತಿಳಿಸಿದೆ.

ಎಥರ್ ಡಿಸೆಂಬರ್ 2024 ರಲ್ಲಿ ತನ್ನ ಪ್ರಮುಖ ಸ್ಕೂಟರ್, ಎಥರ್ 450X ನೊಂದಿಗೆ ಶ್ರೀಲಂಕಾವನ್ನು ಪ್ರವೇಶಿಸಿತು, ಇದು ನೇಪಾಳದ ನಂತರ ಬ್ರ್ಯಾಂಡ್‌ನ ಎರಡನೇ ಅಂತರರಾಷ್ಟ್ರೀಯ ಮಾರುಕಟ್ಟೆಯಾಗಿದೆ. ಅಂದಿನಿಂದ, ಕಂಪನಿಯು ಶ್ರೀಲಂಕಾ ದೇಶದಲ್ಲಿ ತನ್ನ ಹೆಜ್ಜೆಗುರುತನ್ನು ವೇಗವಾಗಿ ವಿಸ್ತರಿಸಿದೆ, ಅದರ ರಾಷ್ಟ್ರೀಯ ವಿತರಕ ಎವಲ್ಯೂಷನ್ ಆಟೋ ಪ್ರೈವೇಟ್ ಲಿಮಿಟೆಡ್ ಜೊತೆಗೆ 19 ಅನುಭವ ಕೇಂದ್ರ (19 Experience Centers) ಗಳನ್ನು ತೆರೆಯಿತು.

ಇವಿಗಳ ಸುತ್ತ ಪರಿಸರ ವ್ಯವಸ್ಥೆಯನ್ನು ಸ್ಥಾಪಿಸುವತ್ತ ಗಮನಹರಿಸಿ, ಅನುಕೂಲಕರ ಮತ್ತು ವಿಶ್ವಾಸಾರ್ಹ ಇವಿ ಮಾಲೀಕತ್ವವನ್ನು ಬೆಂಬಲಿಸಲು ಎಥರ್ ಎರಡೂ ದೇಶದಲ್ಲಿ ಚಾರ್ಜಿಂಗ್ ಮೂಲಸೌಕರ್ಯವನ್ನು ಸಹ ಸ್ಥಾಪಿಸಿದೆ. ತನ್ನ ಪ್ರಮುಖ ಮಾಡಲ್‌ಗೆ ಬಲವಾದ ಪ್ರತಿಕ್ರಿಯೆಯನ್ನು ಆಧರಿಸಿ, ಎಥರ್ ಈಗ ಶ್ರೀಲಂಕಾದಲ್ಲಿ 2025 ರ ಅಪ್‌ಡೇಟೆಡ್ 'ಎಥರ್ 450X' ಕೂಡ ಅನ್ನು ಪರಿಚಯಿಸಿದೆ.

ಈ ಮಾಡಲ್ ಮಳೆ, ರಸ್ತೆ ಮತ್ತು ರ್ಯಾಲಿ ಮೋಡ್‌ಗಳನ್ನು ನೀಡುವ ಮಲ್ಟಿ - ಮೋಡ್ ಟ್ರಾಕ್ಷನ್ ಕಂಟ್ರೋಲ್ ಸಿಸ್ಟಮ್ ಹೊಂದಿದೆ. ಪ್ರತಿಯೊಂದೂ ವಿಭಿನ್ನ ಸವಾರಿ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುತ್ತದೆ. ಇದು ಸುಧಾರಿತ ಟ್ರೂರೇಂಜ್ ಮತ್ತು ಹೊಸದಾಗಿ ಅಭಿವೃದ್ಧಿಪಡಿಸಿದ ಮಲ್ಟಿ - ಕಾಂಪೌಂಡ್ ಟೈರ್‌ಗಳನ್ನು ಸಹ ಒಳಗೊಂಡಿದೆ. ಇದನ್ನು MRF ಸಹಯೋಗದೊಂದಿಗೆ ವಿನ್ಯಾಸಗೊಳಿಸಲಾಗಿದೆ, ಇದು ವರ್ಧಿತ ದಕ್ಷತೆ, ಹಿಡಿತ ಮತ್ತು ರೇಂಜ್ ನೀಡುತ್ತದೆ.

"ಶ್ರೀಲಂಕಾದಲ್ಲಿ 2025 ಎಥರ್ 450X ಅನ್ನು ಬಿಡುಗಡೆ ಮಾಡಲು ನಮಗೆ ತುಂಬಾ ಸಂತೋಷವಾಗಿದೆ. ಕಳೆದ ವರ್ಷ ಬಿಡುಗಡೆಯಾದಾಗಿನಿಂದ ಎಥರ್ 450X ಗೆ ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಈ ಪ್ರತಿಕ್ರಿಯೆಯಿಂದ ಉತ್ಸುಕರಾಗಿ, ನಾವು ನಮ್ಮ ವಿತರಣೆಯನ್ನು ವೇಗವಾಗಿ ಟ್ರ್ಯಾಕ್ ಮಾಡಿದ್ದೇವೆ. ನಮ್ಮ ಸ್ಕೂಟರ್‌ಗಳನ್ನು ಹೆಚ್ಚು ಖರೀದಿಸುವಂತೆ ಮಾಡಲು ಈಗಾಗಲೇ ದೇಶಾದ್ಯಂತ 19 ಮಳಿಗೆಗಳನ್ನು ಸ್ಥಾಪಿಸಿದ್ದೇವೆ.

2025ರ ಅಪ್‌ಡೇಟೆಡ್ ಎಥರ್ 450X ಶ್ರೀಲಂಕಾ ಜನರಿಗೆ ಹೊಂದಿಕೊಳ್ಳುವ ಉತ್ತಮ ಮಾಡಲ್ ಆಗಿದೆ ಎಂದು ನಾವು ನಂಬುತ್ತೇವೆ. ಇದು ಕಾರ್ಯಕ್ಷಮತೆ, ವಿಶ್ವಾಸಾರ್ಹತೆ ಮತ್ತು ಗುಣಮಟ್ಟದ ಮೇಲೆ ಕೇಂದ್ರೀಕರಿಸಿದೆ ವಾಹನವಾಗಿದೆ. ಶ್ರೀಲಂಕಾದಲ್ಲಿನ ಭೂಪ್ರದೇಶ ಮತ್ತು ಸವಾರಿ ಪರಿಸ್ಥಿತಿಗಳಿಗೆ ಚೆನ್ನಾಗಿ ಹೊಂದಿಕೊಳ್ಳುತ್ತದೆ ಎಂಬುದನ್ನು ನಾವು ನಂಬುತ್ತೇವೆ" ಎಂದು ಕಂಪನಿ ವಿಶ್ವಾಸ ವ್ಯಕ್ತಪಡಿಸಿದೆ.

ಶ್ರೀಲಂಕಾ & ನೇಪಾಳದಲ್ಲಿ ನೆಲೆನಿಂತ ಎಥರ್: ಎಥರ್ ನವೆಂಬರ್ 2023 ರಲ್ಲಿ ನೇಪಾಳದಲ್ಲಿ ತನ್ನ ಮೊದಲ ಅನುಭವ ಕೇಂದ್ರವನ್ನು ಪ್ರಾರಂಭಿಸುವ ಮೂಲಕ ಅಂತರರಾಷ್ಟ್ರೀಯ ಮಾರುಕಟ್ಟೆಯನ್ನು ಪ್ರವೇಶಿಸಿತು. ಅಲ್ಲಿ ಈಗ 9 ಅನುಭವ ಕೇಂದ್ರಗಳನ್ನು ಹೊಂದಿದೆ. ಎಥರ್ ಇತ್ತೀಚೆಗೆ ನೇಪಾಳದಲ್ಲಿ ತನ್ನ ಕುಟುಂಬ ಸ್ಕೂಟರ್ ರಿಜ್ಟಾವನ್ನು ಸಹ ಪರಿಚಯಿಸಿತು. ಇನ್ನು ಶ್ರೀಲಂಕಾದಲ್ಲಿ, ಎಥರ್ 19 ಅನುಭವ ಕೇಂದ್ರಗಳಿಗೆ ಬೆಳೆದಿದೆ.

ಭಾರತದಲ್ಲಿ, ಎಥರ್ ದೇಶಾದ್ಯಂತ 446 ಅನುಭವ ಕೇಂದ್ರಗಳು ಮತ್ತು 3,997 ಎಥರ್ ಗ್ರಿಡ್ ಫಾಸ್ಟ್ ಚಾರ್ಜರ್‌ಗಳು ಮತ್ತು ನೈಬರ್‌ಹುಡ್ ಚಾರ್ಜರ್‌ಗಳ ಜಾಲವನ್ನು ಹೊಂದಿದೆ. ಇವು ಭಾರತದಲ್ಲಿ ಬಳಕೆದಾರರಿಗೆ ರೇಂಜ್ ಆತಂಕವನ್ನು ನಿವಾರಿಸಿ ಆರಾಮದಾಯಕ ಪ್ರಯಾಣ ಅನುಭವ ನೀಡುತ್ತವೆ, ಮುಂಬರುವ ವರ್ಷಗಳಲ್ಲಿ ಇನ್ನೂ ಹೆಚ್ಚಿನ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ತರುವ ಗುರಿಯಿದೆ ಎಂದು ಕಂಪನಿ ಹೇಳಿಕೊಂಡಿದೆ.