ಬೆನ್ನಿಗೆ ಗಿಟಾರ್ ಕಟ್ಟಿದ್ದೇ ತಪ್ಪಾಯ್ತಾ? ಬೆಂಗಳೂರು ಎಐ ಕ್ಯಾಮೆರಾ ಎಡವಟ್ಟಿನಿಂದ ಸವಾರನಿಗೆ ಬಂತು ದಂಡ!

ಬೆನ್ನಿಗೆ ಗಿಟಾರ್ ಕಟ್ಟಿಕೊಂಡು ಬೈಕ್‌ನಲ್ಲಿ ಹೊರಟಿದ್ದ ಸವಾರನಿಗೆ, ಗಿಟಾರ್ ಅನ್ನೇ ಹಿಂಬದಿ ಸವಾರ ಎಂದು ಭಾವಿಸಿ ಬೆಂಗಳೂರಿನ ಎಐ ಟ್ರಾಫಿಕ್ ಕ್ಯಾಮೆರಾವೊಂದು ದಂಡ ವಿಧಿಸಿರುವ ಘಟನೆ ಈಗ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ! ಸೌವಿಕ್ ದತ್ತಾ ಎಂಬವರು ಬೆನ್ನಿಗೆ ಗಿಟಾರ್ ಬ್ಯಾಗ್ ಕಟ್ಟಿಕೊಂಡು ಒಬ್ಬರೇ ಪ್ರಯಾಣಿಸುತ್ತಿದ್ದರು. ಆದರೆ ಎಐ ಕ್ಯಾಮೆರಾ, ಹಿಂಬದಿ ಸವಾರ ಹೆಲ್ಮೆಟ್ ಧರಿಸಿಲ್ಲ ಎಂದು ತಪ್ಪಾಗಿ ಗ್ರಹಿಸಿ 500 ರೂ. ದಂಡ ಹಾಕಿದೆ (ನೋಟಿಸ್ ಸಂಖ್ಯೆ: 86202541). ಫೋಟೋದಲ್ಲಿ ಹೆಲ್ಮೆಟ್ ಧರಿಸಿರುವ ಸೌವಿಕ್ ಮತ್ತು ಅವರ ಗಿಟಾರ್ ಬ್ಯಾಗ್ ಮಾತ್ರ ಸ್ಪಷ್ಟವಾಗಿ ಕಾಣಿಸುತ್ತಿದೆ. ಈ ಚಿತ್ರ ಸೆಪ್ಟೆಂಬರ್ 15 ರಂದು ಸೆರೆಯಾಗಿದ್ದು, ಸೆಪ್ಟೆಂಬರ್ 16 ರಂದು ಚಲನ್ ಜಾರಿಯಾಗಿದೆ. ವಿಚಾರ ತಿಳಿಯುತ್ತಿದ್ದಂತೆ ಬೆಂಗಳೂರು ಸಂಚಾರ ಪೊಲೀಸರು ತಕ್ಷಣ ಸ್ಪಂದಿಸಿದ್ದು, ದಂಡ ರದ್ದುಗೊಳಿಸಲು ಮಾರ್ಗದರ್ಶನ ನೀಡಿದ್ದಾರೆ.

ಎಐ ತಂತ್ರಜ್ಞಾನಕ್ಕಿಂತಲೂ ಕಾನೂನು ಅತ್ಯಂತ ಸ್ಪಷ್ಟವಾಗಿದೆ. ಮೋಟಾರು ವಾಹನ ಕಾಯ್ದೆಯ ಸೆಕ್ಷನ್ 129 ರ ಪ್ರಕಾರ, ಬೈಕ್ ಚಾಲನೆ ಮಾಡುವವರು ಹಾಗೂ ಹಿಂಬದಿ ಸವಾರರು ಇಬ್ಬರೂ ಕಡ್ಡಾಯವಾಗಿ ಹೆಲ್ಮೆಟ್ ಧರಿಸಬೇಕು. ಕರ್ನಾಟಕದ ರೂಲ್ 230 ಕೂಡ ಇದನ್ನೇ ಉಲ್ಲೇಖಿಸುತ್ತದೆ. ಬೆಂಗಳೂರು ಪೊಲೀಸರು ಪ್ರತಿಯೊಂದು ನಿಯಮ ಉಲ್ಲಂಘನೆಗೆ 500 ರೂ. ದಂಡ ವಿಧಿಸುತ್ತಾರೆ. ಹಾಗಾಗಿ ನೀವು ಹೆಲ್ಮೆಟ್ ಇಲ್ಲದೆ ಹಲವು ಕ್ಯಾಮೆರಾಗಳ ಮುಂದೆ ಸಾಗಿದರೆ, ಪ್ರತಿ ಜಂಕ್ಷನ್‌ನಲ್ಲೂ ಪ್ರತ್ಯೇಕವಾಗಿ ದಂಡ ಬೀಳುವ ಸಾಧ್ಯತೆಯಿರುತ್ತದೆ.

AI ಕ್ಯಾಮೆರಾ ಈ-ಚಲನ್: ಎಲ್ಲಿ ಎಡವಟ್ಟಾಯಿತು?

ಎಐ ವಿಜನ್ ಮಾಡೆಲ್‌ಗಳು ಸವಾರನ ಬೆನ್ನಿನ ಹಿಂಭಾಗದಲ್ಲಿ ಮನುಷ್ಯನ ಆಕಾರವಿದೆಯೇ ಎಂದು ಹುಡುಕುತ್ತವೆ. ಹಾಗಾಗಿ, ಉದ್ದವಾದ ಗಿಟಾರ್ ಬ್ಯಾಗ್ ಅಥವಾ ಎತ್ತರದ ಟಾಪ್ ಬಾಕ್ಸ್ ಇದ್ದರೆ, ಕ್ಯಾಮೆರಾಗೆ ಅದು ಮತ್ತೊಬ್ಬ ವ್ಯಕ್ತಿಯಂತೆ ಕಾಣಿಸುವ ಸಾಧ್ಯತೆಯಿರುತ್ತದೆ. ಲಗೇಜ್ ಎತ್ತರದಲ್ಲಿದ್ದಾಗ, ಜ್ಯಾಕೆಟ್ ಅಂಚುಗಳನ್ನು ಮುಚ್ಚಿದಾಗ ಅಥವಾ ನಂಬರ್ ಪ್ಲೇಟ್ ಮರೆಯಾದಾಗ ಇಂತಹ ತಪ್ಪು ಚಲನ್‌ಗಳು ಬರಬಹುದು. ಆದ್ದರಿಂದ ರೇಡಿಯಂಟ್ ಸ್ಟ್ರಾಪ್ ಬಳಸುವುದು, ಲಗೇಜ್ ಅನ್ನು ಕೆಳಮಟ್ಟದಲ್ಲಿ ಕಟ್ಟುವುದು ಮತ್ತು ಡ್ಯಾಶ್‌ಕ್ಯಾಮ್ ಇಟ್ಟುಕೊಳ್ಳುವುದು ಸುರಕ್ಷಿತ. ಇನ್ನು ಸೌವಿಕ್ ದತ್ತಾ ಅವರ ಪ್ರಕರಣವನ್ನು ಪರಿಶೀಲಿಸಿ, ತಪ್ಪಾಗಿದ್ದರೆ ಚಲನ್ ರದ್ದುಪಡಿಸುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಹೆಲ್ಮೆಟ್ ನಿಯಮಗಳು ಮತ್ತು ISI ಮಾರ್ಕ್ ಪರಿಶೀಲಿಸುವುದು ಹೇಗೆ?

ಕೇವಲ ಸ್ಟಿಕರ್ ಇರುವ ಹೆಲ್ಮೆಟ್ ಖರೀದಿಸುವ ಬದಲು, ಅಧಿಕೃತ BIS ಸ್ಟ್ಯಾಂಡರ್ಡ್ ಮಾರ್ಕ್ ಇರುವ ಹೆಲ್ಮೆಟ್‌ಗಳನ್ನೇ ಆಯ್ಕೆ ಮಾಡಿ. ಹೆಲ್ಮೆಟ್ ಒಳಭಾಗದಲ್ಲಿರುವ IS 4151 ಲೇಬಲ್ ಹಾಗೂ ಏಳು ಅಂಕಿಗಳ CM/L ಲೈಸೆನ್ಸ್ ಸಂಖ್ಯೆಯನ್ನು ತಪ್ಪದೇ ಪರಿಶೀಲಿಸಿ. 'BIS Care' ಆಪ್ ಮೂಲಕ ಕೆಲವೇ ಸೆಕೆಂಡುಗಳಲ್ಲಿ ಇದನ್ನು ವೆರಿಫೈ ಮಾಡಬಹುದು. ಮಾರುಕಟ್ಟೆಯಲ್ಲಿ ನಕಲಿ ಹೆಲ್ಮೆಟ್‌ಗಳು ಹೆಚ್ಚಾಗಿ ಸಿಗುತ್ತಿದ್ದು, BIS ಅಧಿಕಾರಿಗಳು ನಿರಂತರ ದಾಳಿ ನಡೆಸುತ್ತಿದ್ದಾರೆ. ಗುಣಮಟ್ಟ ನಿಯಂತ್ರಣ ಆದೇಶದ ಪ್ರಕಾರ, ದೇಶಾದ್ಯಂತ BIS ಪ್ರಮಾಣೀಕೃತ ಹೆಲ್ಮೆಟ್‌ಗಳನ್ನು ಮಾತ್ರ ಬಳಸುವುದು ಕಡ್ಡಾಯವಾಗಿದೆ.

ತಪ್ಪಾಗಿ ಬಂದ ಈ-ಚಲನ್ ಅನ್ನು ಪ್ರಶ್ನಿಸುವುದು ಹೇಗೆ?

ಮೊದಲು BTP ASTraM ಆಪ್ ತೆರೆಯಿರಿ. Raise Dispute ಆಯ್ಕೆಯನ್ನು ಕ್ಲಿಕ್ ಮಾಡಿ. Challan No. ಮತ್ತು ವಾಹನ ಸಂಖ್ಯೆಯನ್ನು ನಮೂದಿಸಿ. ಎಲ್ಲಿ ತಪ್ಪಾಗಿದೆ ಎಂಬುದರ ವಿವರಣೆಯನ್ನು ಕನ್ನಡದಲ್ಲೇ ಬರೆಯಿರಿ. ಫೋಟೋ, ಡ್ಯಾಶ್‌ಕ್ಯಾಮ್ ಕ್ಲಿಪ್, ದಿನಾಂಕ ಮತ್ತು ಸ್ಥಳದ ವಿವರಗಳನ್ನು ಸೇರಿಸಿ Submit ಕೊಡಿ. ನಂತರ ಸಿಗುವ ಕೇಸ್ ಐಡಿಯನ್ನು ಕಾಯ್ದಿರಿಸಿಕೊಳ್ಳಿ. KSP e‑Challan ಪೋರ್ಟಲ್‌ನಲ್ಲಿ ನಿಮ್ಮ ದೂರಿನ ಸ್ಥಿತಿಯನ್ನು ಪರಿಶೀಲಿಸಬಹುದು. ಜೊತೆಗೆ, [email protected] ಗೆ ಇಮೇಲ್ ಕಳುಹಿಸಿ ಕೂಡ ಮನವಿ ಮಾಡಬಹುದು. 48 ಗಂಟೆಗಳಲ್ಲಿ ಪ್ರತಿಕ್ರಿಯೆ ಕೇಳಿ; ಅಗತ್ಯವಿದ್ದರೆ ಇನ್‌ಫಾಂಟ್ರಿ ರಸ್ತೆಯಲ್ಲಿರುವ TMC ಕಚೇರಿಗೆ ನೇರವಾಗಿ ಭೇಟಿ ನೀಡಿ.