ಹರ್ಲಿಯ ಚೊಚ್ಚಲ ವಿದ್ಯುತ್ ಬೈಕ್ 'ಲೈವ್‌ವೈರ್'

ಆಟೋ ಉತ್ಸಾಹಿಗಳ ಪಾಲಿಗಿದು ಮಹತ್ತರ ಸುದ್ದಿಯಾಗಿದ್ದು, ಈ ಹಿಂದೆ ತಮ್ಮ ಕಾನ್ಸೆಪ್ಟ್ ಮಾದರಿಯನ್ನು ಪ್ರದರ್ಶಿಸಿದ್ದರೂ ಯಾರೂ ಕೂಡಾ ಇಷ್ಟು ಬೇಗನೇ ಹರ್ಲಿ ಎಲೆಕ್ಟ್ರಿಕ್ ಬೈಕ್ ರಂಗಪ್ರವೇಶ ಮಾಡಲಿದೆ ಎಂದು ಅಂದುಕೊಂಡಿರಲಿಲ್ಲ. ಈ ನಿಟ್ಟಿನಲ್ಲಿ ಸಂಸ್ಥೆಯ ಪ್ರಯತ್ನವನ್ನು ಮೆಚ್ಚಲೇ ಬೇಕು.

3 ಫೇಸ್ ಎಸಿ ಇಂಡಕ್ಷನ್ ಮೋಟಾರ್‌ನಿಂದ ನಿಯಂತ್ರಿಸಲ್ಪಡುವ ಹರ್ಲಿಯ ಲೈವ್‌ವೈರ್ ಎಲೆಕ್ಟ್ರಿಕ್ ಬೈಕ್ 55 ಕೆಡಬ್ಲ್ಯು (74 ಅಶ್ವಶಕ್ತಿಗೆ ಸಮಾನ) ಹಾಗೂ 70 ಎನ್‌ಎಂ ಟಾರ್ಕ್ ಉತ್ಪಾದಿಸಲಿದೆ.

ಸರಿ ಸುಮಾರು 115 ಕೆ.ಜಿ ಭಾರ ಹೊಂದಿರುವ ಇದರ ಲಿಥಿಯಂ ಇಯಾನ್ ಬ್ಯಾಟರಿಯ ನೆರವಿನಿಂದ 85 ಕೀ.ಮೀ. ವರೆಗೂ ಸಂಚರಿಸಬಹುದಾಗಿದೆ.

ಅತ್ಯಂತ ಶಕ್ತಿಶಾಲಿ ಎಲೆಕ್ಟ್ರಿಕ್ ಬೈಕ್‌ಗಳ ಸಾಲಿನಲ್ಲಿ ಗುರುತಿಸಿಕೊಳ್ಳಲಿರುವ ಲೈವ್‌ವೈರ್, 4 ಸೆಕೆಂಡುಗಿಂತಲೂ ಕಡಿಮೆ ಅವಧಿಯಲ್ಲಿ ಗಂಟೆಗೆ 0-96 ಕೀ.ಮೀ. ವೇಗವರ್ಧಿಸುವ ಹಾಗೆಯೇ ಗರಿಷ್ಠ 150 ಕೀ.ಮೀ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿದೆ.

ಬ್ರೇಕಿಂಗ್‌ನಲ್ಲಿ ಮರು ಉತ್ಪಾದಕ ಶಕ್ತಿ ಹೊಂದಿರುವ ಲೈವ್‌ವೈರ್, 3.5 ತಾಸಿನಲ್ಲಿ (220 ವೋಲ್ಟ್) ಸಂಪೂರ್ಣ ಚಾರ್ಜ್ ಆಗಲಿದೆ.

ಇತರ ವಿದ್ಯುತ್ ಬೈಕ್‌ಗಳನ್ನು ಹೋಲಿಸಿದಾಗ ವಿನ್ಯಾಸದಲ್ಲಿ ಯಾವುದೇ ರಾಜಿಗೂ ಹರ್ಲಿ ತಯಾರಾಗಿಲ್ಲ ಎಂಬುದು ಕಂಡುಬಂದಿದೆ. ಇದು ಈಗಲೂ ಹರ್ಲಿಯ ಸಾಂಪ್ರದಾಯಕ ವಿನ್ಯಾಸ ಕಾಪಾಡಿಕೊಂಡು ಬಂದಿದೆ.

ಸಹಜವಾಗಿಯೇ ಈ ವಿದ್ಯುತ್ ಬೈಕ್ ಇನ್ಸ್ಟ್ರುಮೆಂಟ್ ಪ್ಯಾನೆಲ್ ಜಾಗದಲ್ಲಿ ಎಲ್‌ಸಿಡಿ ಪರದೆ ಕಂಡುಬಂದಿದೆ. ಹಾಗೆಯೇ ಮುಂದುಗಡೆ ಎಲ್‌ಇಡಿ ಹೆಡ್‌ಲೈಟ್ ಹಾಗೂ ಮಿರರ್ ಸೌಲಭ್ಯವಿರಲಿದೆ.