ಭಾರತಕ್ಕೆ ಟೊಯೋಟಾ ಲ್ಯಾಂಡ್ ಕ್ರೂಯಿಸರ್

ಸದ್ಯಕ್ಕೆ ಭಾರತದಲ್ಲಿ ಮಾರಾಟವಾಗುತ್ತಿರುವ ಏಕೈಕ ಲ್ಯಾಂಡ್ ಕ್ರೂಯಿಸರ್ ಪ್ರಡೋ. ಇದು ಪೆಟ್ರೋಲ್ ಮೇಲೆ ಮಾತ್ರ ಅವಲಂಬಿತವಾಗಿರುವುದರಿಂದ ಸಾಕಷ್ಟು ಅಡೆತಡೆಗಳನ್ನು ಎದುರಿಸುತ್ತಿದೆ. ಆದ್ದರಿಂದ ಟೊಯೋಟಾ ಡೀಸೆಲ್ ಎಂಜಿನ್ ಇರುವ ಲ್ಯಾಂಡ್ ಕ್ರೂಯಿಸರನ್ನು ಭಾರತಕ್ಕೆ ತರಲು ಹವಣಿಸುತ್ತಿದೆ.

ಇದರ ಜೊತೆಗೆ ಟೊಯೋಟಾ ಫಾರ್ಚುನರ್ ಕೂಡ ಇಗ್ನಿಷನ್ ಚಾಲೂ ಮಾಡಿ ಗೇರ್ ಬದಲಿಸಿಕೊಂಡು ಆಮದಾಗಲು ಸಜ್ಜಾಗಿ ನಿಂತಿದೆ. ಈ ಫಾರ್ಚುನರ್ ಕಾರು ಐಷಾರಾಮಿ ಕಾರುಗಳ ಪೈಕಿ ಹೊಂಡಾ ಸಿಆರ್ವಿಗೆ ಸ್ಪರ್ಧೆ ನೀಡಲಿದೆ ಎಂಬುದು ಕಾರು ಪಂಡಿತ ತರ್ಕ. ಪೆಟ್ರೋಲ್ ಎಂಜಿನ್ ಗಳಿಗೆ ಆಮದು ಸುಂಕ ಜಾಸ್ತಿ ವಿಧಿಸಿರುವುದರಿಂದ ಡೀಸೆಲ್ ಎಂಜಿನ್ ಗಳನ್ನು ಆಮದು ಮಾಡಿಕೊಳ್ಳುವುದೇ ಜಾಣತನವಾಗಿ ಕಾಣುತ್ತಿದೆ. ಇದರೊಂದಿಗೆ, ಎಲ್ಲ ಸೌಕರ್ಯಗಳಿರುವ ಮತ್ತೊಂದು ಪುಟಾಣಿ ಕಾರನ್ನು ಕೂಡ ಭಾರತಕ್ಕೆ ತರಲು ಟೊಯೋಟಾ ಕಾತರದಿಂದ ಕಾಯುತ್ತಿದೆ.