ಮಾಲೀಕನ ಸಿಟ್ಟಿಗೆ ಬಲಿಯಾದ ಲಂಬೋರ್ಗಿನಿ ಕಾರ್

ದೂರದ ಚೀನಾ ದೇಶದ ಪೂರ್ವ ಭಾಗವೊಂದರಲ್ಲಿ ಇಂಥದ್ದೇ ಒಂದು ಘಟನೆ ನಡೆದಿದೆ. ಅದು ನಮ್ಮ ದೇಶದಲ್ಲಿ ನಡೆಯುವ ಪಾತ್ರೆಪಗಡೆಯ ಸದ್ದಿನಂತಲ್ಲ. ಇಲ್ಲಿ ಮಾಲೀಕನೊಬ್ಬನ ಕೋಪಕ್ಕೆ ಬಲಿಯಾದದ್ದು ಆತನ ಕೋಟಿ ಕೋಟಿ ದರದ ಲಂಬೋರ್ಗಿನಿ ಗಲಾರ್ಡೊ ಎಂಬ ಕಾರ್! ತನ್ನ ಕಾರ್ ಸರಿಯಾಗಿ ಕಾರ್ಯ ನಿರ್ವಹಿಸುತ್ತಿಲ್ಲವೆಂದು ಕೋಪಗೊಂಡ ಆತ ಸಾರ್ವಜನಿಕವಾಗಿ ಅದನ್ನು ಅಪಚ್ಚಿ, ಪುಡಿಪುಡಿ ಮಾಡಿ ಹಾಕಲು ಕೆಲಸಗಾರರಿಗೆ ಆದೇಶಿಸಿದ. ಕೋಪದಲ್ಲೂ ಇವನ್ನೂ ಸುತ್ತಿಗೆ ಹಿಡಿದುಕೊಂಡು ಕಾರಿಗೆ ಹೊಡೆಯುತ್ತಿದ್ದ ದೃಷ್ಯ ನೋಡಬೇಕಿತ್ತು. ಅಬ್ಬಾ ಆತನ ಕೋಪಕ್ಕೆ ಆ ಕಾರ್ ಚಿಂದಿ ಚಿತ್ರಾನ್ನ.

ಅವನ ಕೋಪಕ್ಕೆ ಬಲಿಯಾದ ಪಾಪದ ಕಾರ್ ಮಾಡಿದ ತಪ್ಪು ಏನೆಂದು ಕೇಳುತ್ತಿದ್ದೀರಾ? ಆತ ಯಾರಿಂದಲೋ ಒಂದು ತಿಂಗಳ ಹಿಂದೆ ಸೆಕೆಂಡ್ ಹ್ಯಾಂಡ್ ಲಂಬೋರ್ಗಿನಿ ಗಲಾರ್ಡೊ ಕಾರ್ ಖರೀದಿಸಿದ. ಖರೀದಿಸಿ ಒಂದು ತಿಂಗಳಾಗಿಲ್ಲ. ಆಗಲೇ ಅದರ ಎಂಜಿನ್ ಗೆ ಸಂಬಂಧಪಟ್ಟ ಯಾವುದೋ ಸಮಸ್ಯೆ ಕಂಡುಬಂತು(ಇದಕ್ಕೆ ಹೇಳುವುದು ಸೆಕೆಂಡ್ ಹ್ಯಾಂಡ್ ವಾಹನ ಖರೀದಿಸುವಾಗ ಎಚ್ಚರಿಕೆ ಬೇಕು ಅಂತ). ಅದನ್ನು ಸರಿಪಡಿಸಿಕೊಡುವಂತೆ ಆತ ಕಂಪನಿಗೆ ತಿಳಿಸಿದ. ಡೀಲರ್ ಮೂಲಕ ಗ್ಯಾರೇಜ್ ತಲುಪಿತು ಆ ಕಾರ್. ಆದರೆ ಅವರಿಗೆ ಅದನ್ನು ಸರಿಪಡಿಸಲು ಸಾಧ್ಯವಾಗಿಲ್ಲ. ರಿಪೇರಿ ಸಮಯದಲ್ಲಿ ಆ ದುಬಾರಿ ಕಾರಿನ ಬಂಪರ್ ಮತ್ತು ಚಾಸೀಸ್ ಗೂ ತುಸು ಡ್ಯಾಮೇಜ್ ಆಯ್ತಂತೆ!

ಆಗ ನೋಡಿ ಆ ಕಾರ್ ಮಾಲೀಕನಿಗೆ ಎಲ್ಲಿತ್ತೋ ಸಿಟ್ಟು. ಜಮಧಗ್ನಿಯ ಅವತಾರವನ್ನೇ ತಾಳಿದ. ಕೋಪದಲ್ಲೂ ಒಂದಿಷ್ಟು ತಾಳ್ಮೆ(?) ವಹಿಸಿ ವಿಶ್ವ ಗ್ರಾಹಕರ ದಿನಕ್ಕೆ ಕಾದು ಬಿಟ್ಟ. ಅಂದು ಒಂದಿಷ್ಟು ಜನ ಕೆಲಸಗಾರರನ್ನು ಕರೆಸಿ "ಪುಡಿ ಮಾಡ್ರಿ" ಅಂತ ಆದೇಶ ನೀಡಿದ. ತಾನು ಸುತ್ತಿಗೆ ತೆಗೆದುಕೊಂಡು ತನ್ನ ಲಂಬೊರ್ಗಿನಿ ಕಾರನ್ನು ಪುಡಿ ಮಾಡಲು ಆರಂಭಿಸಿದ. ಈ ದೃಷ್ಯ ನೋಡಲು ಸಾಕಷ್ಟು ಜನರು ಸೇರಿದ್ದರಂತೆ. ನೋಡು ನೋಡುತ್ತಿದ್ದಂತೆ ಆ ಕಾರ್ ಚಿಂದಿ ಚಿತ್ರಾನ್ನವಾಯಿತು. ಈಗ ಅವನ ಕೋಪ ತಣ್ಣಗಾಗಿರಬಹುದು ಅಂತ ಅಂದುಕೊಳ್ಳೋಣ.