ಡುಕಾಟಿ-ಬೆಂಝ್ ಮೈತ್ರಿ, ಮರ್ಸಿಡಿಸ್ ಬೈಕ್ ಗ್ಯಾರಂಟಿ

ಕಂಪನಿಯ ಕಾರ್ಯ ತಂತ್ರ ಭಾಗವಾಗಿ ಡುಕಾಟಿ ಮೋಟಾರ್ ನೊಂದಿಗೆ ಸಹಕಾರ ಒಪ್ಪಂದವೊಂದಕ್ಕೆ ಸಹಿ ಹಾಕಿರುವುದಾಗಿ ಮರ್ಸಿಡಿಸ್-ಎಎಂಜಿ ಜಿಎಂಬಿಚ್ ನ ಮುಖ್ಯಕಾರ್ಯನಿರ್ವಹಣಾಧಿಕಾರಿ ಪ್ರಕಟಿಸಿದ್ದಾರೆ. "ಎಎಂಜಿ ಮತ್ತು ಡುಕಾಟಿಗಳೆರಡು ಕಂಪನಿಗಳ ವಾಹನಗಳ ಕಾರ್ಯಕ್ಷಮತೆ ಹೆಚ್ಚಿಸಲು ಪಾಲುದಾರಿಕೆ ಮಾಡಿಕೊಂಡಿವೆ. ರೇಸಿಂಗ್ ಎಂಬುದು ಈಗ ಫ್ಯಾಷನ್. ಇದನ್ನು ಗಮನದಲ್ಲಿಟ್ಟುಕೊಂಡು ಕಾರ್ಯತಂತ್ರ ರೂಪಿಸಲಿದ್ದೇವೆ ಎಂದು ಕಂಪನಿಗಳೆರಡು ಪ್ರಕಟಣೆಯಲ್ಲಿ ಹೇಳಿದ್ದವು.

ಡೈಮ್ಲರ್-ಬೆಂಝ್ 1985ರಲ್ಲಿ ಇನ್ ಸ್ಪರ್ ಎಂಬ ದ್ವಿಚಕ್ರವಾಹನವನ್ನು ಪ್ರಾಯೋಗಿಕವಾಗಿ ಹೊರತಂದಿತ್ತು. ಆದರೆ ನಂತರ ಯಾಕೋ ಬೆಂಝ್ ಕಂಪನಿ ಬೈಕ್ ಮಾರುಕಟ್ಟೆಯತ್ತ ಮನಸ್ಸು ಮಾಡಿರಲಿಲ್ಲ. ಆದರೆ ಈಗ ಪರಿಸರ ಮಾಲಿನ್ಯ ಕಡಿಮೆ ಮಾಡುವುದು ಮತ್ತು ಕಾರ್ಬನ್ ಲಿಮಿಟ್ಸ್ ಗಮನದಲ್ಲಿಟ್ಟುಕೊಂಡು ಕಂಪನಿ ಬೈಕ್ ನತ್ತ ಮುಖಮಾಡಿದೆ ಎನ್ನಲಾಗಿದೆ. ಕಾರ್ ಗಳಿಗೆ ಹೋಲಿಸಿದರೆ ಬೈಕ್ ಹೊರಸೂಸುವ ಕಾರ್ಬನ್ ಕಡಿಮೆ.

ಬೈಕ್ ಮಾರುಕಟ್ಟೆಗೆ ಪ್ರವೇಶಿಸುವ ಕುರಿತು ಬೆಂಝ್ ಇನ್ನೂ ಅಧಿಕೃತವಾಗಿ ಪ್ರಕಟಿಸಿಲ್ಲ. ಆದರೆ ಇವೆರಡು ಕಂಪನಿಗಳು ಮೈತ್ರಿಮಾಡಿಕೊಂಡಿರುವುದರಿಂದ ಮುಂದಿನ ದಿನಗಳಲ್ಲಿ ಬೆಂಝ್ ಬೈಕ್ ಗಳು ರಸ್ತೆಗಿಳಿದರೆ ಯಾವುದೇ ಅಚ್ಚರಿಯಿಲ್ಲ. ಡುಕಾಟಿ ಈಗಾಗಲೇ ದೇಶದ ರಸ್ತೆಗೆ ತಿಂಗಳ ಹಿಂದೆ 5 ಸೂಪರ್ ಬೈಕ್ ತಂದುಬಿಟ್ಟಿದೆ. ಸೂಪರ್ ಬೈಕ್ ಲೋಕದಲ್ಲಿ ಬೆಂಝ್ ಕಮಾಲ್ ಏನಿದೆಯೋ ಕಾದು ನೋಡಬೇಕಿದೆ.