ಡೀಸಲ್ ಕಾರುಗಳಿಗೆ ವಿಮಾ ಪಾವತಿ ದುಬಾರಿಯಾಗಲಿದೆಯೇ?

ಪೆಟ್ರೊಲ್ ಕಾರಿಗಿಂತ ಡೀಸಲ್ ಕಾರು ವಿಮಾ ಪಾವತಿ ಶೇ. 30ರಷ್ಟು ದುಬಾರಿಯಾಗಲಿದೆ ಎಂದು ಮೂಲಗಳು ಹೇಳಿವೆ. ಕೆಲವು ವಿಮಾ ಕಂಪನಿಗಳೂ ಕೂಡ ವಿಮಾ ಕಂತು ದರ ಹೆಚ್ಚಳದ ಮುನ್ಸೂಚನೆ ನೀಡಿವೆ.

ದರ ಹೆಚ್ಚಳವೇಕೆ?: ಪೆಟ್ರೊಲ್ ಕಾರಿಗೊಂದು ವಿಮೆ ದರ ಮತ್ತು ಡೀಸಲ್ ಕಾರಿಗೊಂದು ವಿಮಾ ನೀತಿ ಏಕೆ ಎನ್ನಬಹುದು. ಡೀಸಲ್ ಕಾರುಗಳೆಂದರೆ ಲಾಂಗ್ ಡ್ರೈವ್ ಗೆ ಸೂಕ್ತವಾದ ಕಾರು. ಲಾಂಗ್ ಡ್ರೈವ್ ನಲ್ಲಿ ರಿಸ್ಕ್ ಹೆಚ್ಚು. ಇಂತಹ ದುಬಾರಿ ಕಾರುಗಳಿಗೆ ಸಣ್ಣಪುಟ್ಟ ಅಪಘಾತವಾದರೂ ವೆಚ್ಚ ದುಬಾರಿಯಾಗಬಹುದು. ರಸ್ತೆಯಲ್ಲಿ ಡೀಸಲ್ ಕಾರುಗಳ ಪ್ರಮಾಣವೂ ಗಮನಾರ್ಹ ಪ್ರಮಾಣದಲ್ಲಿ ಏರಿಕೆ ಕಾಣುತ್ತಿದೆ. ಹೀಗಾಗಿ ಅಪಘಾತದ ಅಪಾಯ ಹೆಚ್ಚಾಗುವ ಭೀತಿಯನ್ನಿಟ್ಟುಕೊಂಡು ವಿಮಾ ಕಂಪನಿಗಳು ದರ ಹೆಚ್ಚಿಸುವ ಕುರಿತು ಯೋಚಿಸುತ್ತಿವೆ.

"ಡೀಸಲ್ ಕಾರುಗಳಿಗೆ ಇಂಧನ ಎಂಬುದು ಪ್ರಮಖ ಪ್ಯಾರಾಮೀಟರ್ ಆಗಿರೋದರಿಂದ ಹೆಚ್ಚು ಲಾಂಗ್ ಡ್ರೈವ್ ಗೆ ಈ ಕಾರುಗಳನ್ನು ಬಳಸುತ್ತಾರೆ. ಹೀಗಾಗಿ ಅಪಾಯದ ಸಾಧ್ಯತೆ ಹೆಚ್ಚು. ಇದೇ ಕಾರಣಕ್ಕೆ ವಿಮಾ ಪಾವತಿ ಹೆಚ್ಚಿಸುವ ಕುರಿತು ಆಲೋಚಿಸುತ್ತಿದ್ದೇವೆ" ಎಂದು ಬಜಾಜ್ ಅಲೆಯನ್ಸ್ ಜನರಲ್ ಇನ್ಶೂರೆನ್ಸ್ ನ ವಾಹನ ವಿಮೆ ವಿಭಾಗದ ಮುಖ್ಯಸ್ಥರು ಹೇಳುತ್ತಾರೆ.