600 ಸಿಬ್ಬಂದಿ ನೇಮಕಕ್ಕೆ ಆಡಿ ಇಂಡಿಯಾ ನಿರ್ಧಾರ

"ದೇಶದ ಲಕ್ಷುರಿ ಮಾರುಕಟ್ಟೆಯಲ್ಲಿ ನಂಬರ್ ಒನ್ ಗುರಿಸಾಧಿಸಲು ಆಡಿ ಹಲವು ವಿಸ್ತರಣಾ ಯೋಜನೆಗಳನ್ನು ಹೊಂದಿದೆ. ಇದರ ಒಂದು ಭಾಗವಾಗಿ ಉದ್ಯೋಗಿಗಳ ಸಂಖ್ಯೆಯನ್ನು ಹೆಚ್ಚಿಸಿಕೊಳ್ಳುತ್ತಿದ್ದೇವೆ" ಎಂದು ಆಡಿ ಇಂಡಿಯಾ ಮುಖ್ಯಸ್ಥ ಮೈಕಲ್ ಪಾರ್ಷ್ಕೆ ಹೇಳಿದ್ದಾರೆ.

ಸಣ್ಣಪಟ್ಟಣಗಳಲ್ಲೂ ಕಂಪನಿಯು ಡೀಲರ್ಷಿಪ್ ನೆಟ್ ವರ್ಕ್ ಗಳನ್ನು ವಿಸ್ತರಿಸಲು ಯೋಜಿಸಿದೆ. ಈಗಾಗಲೇ 13 ಹೊಸ ಶೋರೂಂಗಳನ್ನು ತೆರೆದಿರುವುದಾಗಿ ಅವರು ಹೇಳಿದ್ದಾರೆ. ಉತ್ಪಾದನಾ ವಿಭಾಗ, ಶೋರೂಂ ಮತ್ತು ಕಾರ್ಪೊರೇಟ್ ವಿಭಾಗಗಳಿಗಾಗಿ ಸಿಬ್ಬಂದಿಗಳನ್ನು ನೇಮಕಮಾಡಲಾಗುವುದು ಎಂದು ಅವರು ಹೇಳಿದ್ದಾರೆ.

ಆಡಿ ಇಂಡಿಯಾ ಇತ್ತೀಚೆಗೆ ಆಡಿ ಎ6 ಎಂಬ ಐಷಾರಾಮಿ ಕಾರನ್ನು ಹೊರತಂದಿತ್ತು. ಪ್ರಸಕ್ತ ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಸ್ಪೋರ್ಟ್ಸ್ ಯುಟಿಲಿಟಿ ವೆಹಿಕಲೊಂದನ್ನು ಹೊರತರಲು ಕೂಡ ಕಂಪನಿ ಯೋಜಿಸಿದೆ. ಜಾಗತಿಕವಾಗಿ ಕಂಪನಿಯು ಹತ್ತು ಸಾವಿರ ಸಿಬ್ಬಂದಿಗಳನ್ನು ನೇಮಕಮಾಡಿಕೊಳ್ಳಲು ಯೋಜಿಸಿದೆ ಎಂದು ಪಾರ್ಷ್ಕೆ ಹೇಳಿದ್ದಾರೆ.