ಧಾರವಾಡದಲ್ಲಿ ಟಾಟಾ ಮೋಟರ್ಸ್ ಹೊಸ ಘಟಕ

ಟಾಟಾ ಮೋಟರ್ಸ್ ಈಗಾಗಲೇ ಧಾರವಾಡದಲ್ಲಿ ಉತ್ಪಾದನಾ ಘಟಕ ಹೊಂದಿದೆ. ಹಗುರ ವಾಣಿಜ್ಯ ವಾಹನ ಉತ್ಪಾದನೆ ಹೆಚ್ಚಿಸುವ ಉದ್ದೇಶದಿಂದ ಕಂಪನಿಯು ಧಾರವಾಡದಲ್ಲೇ ಇನ್ನೊಂದು ಘಟಕವನ್ನು ನಿರ್ಮಿಸಲು ಉದ್ದೇಶಿಸಿಸಲಾಗಿದೆ ಎಂದು ಟಾಟಾ ಮೋಟರ್ಸ್ ವಕ್ತಾರರು ಹೇಳಿದ್ದಾರೆ. ಕಂಪನಿಯು ನೂತನ ಘಟಕಕ್ಕೆ 900 ಕೋಟಿ ರು. ಹೂಡಿಕೆ ಮಾಡಲು ನಿರ್ಧರಿಸಿದೆ.

"ಕಂಪನಿಯು ಧಾರವಾಡ ಘಟಕದಲ್ಲಿ ಟಾಟಾ ಏಸ್ ಝಿಪ್ ಮತ್ತು ಟಾಟಾ ಮ್ಯಾಜಿಕ್ ಐರಿಷ್ ವಾಹನಗಳನ್ನು ಉತ್ಪಾದಿಸುತ್ತಿದೆ. ಈ ಘಟಕದ ವಾರ್ಷಿಕ ಉತ್ಪಾದನಾ ಸಾಮರ್ಥ್ಯ ಒಂದು ಲಕ್ಷ ಯೂನಿಟ್ ಆಗಿದೆ" ಎಂದರು.

"ಟಾಟಾ ಮೋಟರ್ಸ್ ಹಗುರ ವಾಹನಗಳ ಉತ್ಪಾದನೆ ಹೆಚ್ಚಿಸುವ ದೃಷ್ಟಿಯಿಂದ ನೂತನ ಘಟಕ ನಿರ್ಮಿಸಲಿದೆ. ನೂತನ ಘಟಕ ಮುಂದಿನ ವರ್ಷದ ಜನವರಿ-ಮಾರ್ಚ್ ತ್ರೈಮಾಸಿಕದಲ್ಲಿ ಆರಂಭವಾಗುವ ನಿರೀಕ್ಷೆಯಿದೆ" ಎಂದು ಟಾಟಾ ಮೋಟರ್ಸ್ ವಕ್ತಾರರು ಹೇಳಿದ್ದಾರೆ.

ಕಂಪನಿಯು ಟಾಟಾ ಏಸ್ ಝಿಪ್ ಮತ್ತು ಟಾಟಾ ಮ್ಯಾಜಿಕ್ ಐರಿಷ್ ಹಗುರ ವಾಹನಗಳನ್ನು ಮೇ ತಿಂಗಳಿನಲ್ಲಿ ರಸ್ತೆಗಿಳಿಸಿತ್ತು. ಕಂಪನಿಯು ಪಾಟ್ನಾಗರ್ ಘಟಕದಲ್ಲಿ ಎಲ್ ಸಿವಿ ಮತ್ತು ಟಾಟಾ ಏಸ್ ಸೇರಿದಂತೆ ಹೆಚ್ಚಿನ ಸಣ್ಣ ವಾಣಿಜ್ಯ ವಾಹನಗಳನ್ನು ಉತ್ಪಾದಿಸುತ್ತಿದೆ.