ನ್ಯಾನೊ, ಫೋರ್ಡ್ ನಂತರ ಗುಜರಾತಿಗೆ ಪ್ಯೂಜೊ

ನೂತನ ಘಟಕಕ್ಕಾಗಿ ಸುಮಾರು 4 ಸಾವಿರ ಕೋಟಿ ರುಪಾಯಿ ಹೂಡಿಕೆ ಮಾಡಲು ಕಂಪನಿ ನಿರ್ಧರಿಸಿದೆ. ಈ ಹೂಡಿಕೆಯಿಂದ ಗುರ್ ಗಾಂವ್, ಪುಣೆ ಮತ್ತು ಚೆನ್ನೈ ರಾಜ್ಯಗಳನ್ನು ಹಿಂದಿಕ್ಕಿ ಗುಜರಾತ್ ರಾಜ್ಯವು ಬೃಹತ್ ಆಟೋಮೊಬೈಲ್ ಹಬ್ ಆಗುವ ನಿರೀಕ್ಷೆಯಿದೆ.

ಪ್ಯೂಜೊ ಅಧಿಕಾರಿಗಳು ಈ ಹಿಂದೆಯೇ ಹಲವಾರು ರಾಜ್ಯ ಸರಕಾರಗಳೊಂದಿಗೆ ಮಾತುಕತೆ ನಡೆಸಿದ್ದರು. ಕಂಪನಿಯು ತಮಿಳುನಾಡು ಮತ್ತು ಆಂಧ್ರ ಸರಕಾರಗಳೊಂದಿಗೂ ಮಾತುಕತೆ ನಡೆಸಿತ್ತು. ಪ್ಯೂಜೊ ಕಂಪನಿಯನ್ನು ಸೆಳೆಯಲು ಕರ್ನಾಟಕ ಯಾವುದೇ ಪ್ರಯತ್ನ ಮಾಡಿಲ್ಲವೆಂದು ಫೇಸ್ ಬುಕ್ ಸ್ನೇಹಿತರೊಬ್ಬರು ಫೇಸ್ ಬುಕ್ ನಲ್ಲಿ ಆಪಾದಿಸಿದ್ದಾರೆ.

ಅಂತಿಮವಾಗಿ ಗುಜರಾತಿನ ವಿದೇಶಿ ಹೂಡಿಕೆ ಸ್ನೇಹಿ ನೀತಿಯಿಂದ ಪ್ಯೂಜೊ ಆಕರ್ಷಿತವಾಗಿದೆ. ಫ್ರಾನ್ಸಿನ ಕಾರು ತಯಾರಿಕಾ ಕಂಪನಿ ಗುಜರಾತಿನಲ್ಲಿ ಘಟಕ ಸ್ಥಾಪಿಸಿ ಬೃಹತ್ ಪ್ರಮಾಣದ ಹೂಡಿಕೆ ಮಾಡುವುದನ್ನು ಗುಜರಾತ್ ಮುಖ್ಯಮಂತ್ರಿ ನರೇಂದ್ರ ಮೋದಿ ಸ್ವಾಗತಿಸಿದ್ದಾರೆ.

ತನ್ನ ಟ್ವಿಟ್ಟರ್ ಖಾತೆಯಲ್ಲಿ ಮೋದಿ ಈಗಾಗಲೇ "ಗುಜ್ ಮತ್ತೊಂದು ವಾಹನ ಕಂಪನಿ ಪ್ಯೂಜೊವನ್ನು ಸ್ವಾಗತಿಸುತ್ತಿದೆ. ಗುಜರಾತ್ ಜಾಗತಿಕ ವಾಹನ ಹಬ್ ಅನ್ನೋದನ್ನು ಇದು ಸತ್ಯವಾಗಿಸಿದೆ" ಎಂದು ಟ್ವಿಟ್ಟಿಸಿದ್ದಾರೆ.

ಪಿಎಸ್ಎಗೆ ಫೋರ್ಡ್ ಇಂಡಿಯಾ ಘಟಕದ ಹತ್ತಿರವೇ ಭೂವಿತರಣೆ ಮಾಡುವ ನಿರೀಕ್ಷೆಯಿದೆ. ಸನಂದ್ ಪ್ರದೇಶದಲ್ಲಿ ಈಗಾಗಲೇ ಟಾಟಾ ಮೋಟರ್ಸ್ ನ ನ್ಯಾನೊ ಘಟಕ ಕೂಡ ಇದೆ.

ಪ್ಯೂಜೊ ಇಲ್ಲಿ ನೂತನ ಸೆಡಾನ್ ಕಾರನ್ನು ತಯಾರಿಸಲು ಯೋಜಿಸಿದೆ. ಇಲ್ಲಿ ವರ್ಷಕ್ಕೆ ಸುಮಾರು 3 ಲಕ್ಷ ಕಾರು ಉತ್ಪಾದಿಸುವ ಯೋಜನೆ ಕಂಪನಿಗಿದೆ.

ಪ್ಯೂಜೊ ಆಗಮಿಸುವ ನಿರ್ಧಾರದಿಂದ ಸನಂದ್ ಪ್ರದೇಶವು ಆಟೋ ಹಬ್ ಆಗಿ ಪರಿಣಮಿಸಿದೆ. ಅಲ್ಲಿ ಈಗಾಗಲೇ ಟಾಟಾ ನ್ಯಾನೊ ಘಟಕವಿದೆ. ಫೋರ್ಡ್ ತನ್ನ ಭಾರತದ ಎರಡನೇ ಘಟಕಕ್ಕಾಗಿ 5 ಸಾವಿರ ಎಕರೆ ಪ್ರದೇಶ ಸ್ವಾಧೀನ ಪಡಿಸಿಕೊಂಡಿದೆ. ಇಲ್ಲಿ ಘಟಕ ಸ್ಥಾಪಿಸುವ ಇಂಗಿತವನ್ನು ಮಾರುತಿ ಸುಜುಕಿ ಇತ್ತೀಚೆಗೆ ವ್ಯಕ್ತಪಡಿಸಿದೆ.