ಟಾಟಾ ಮಾರಾಟ ತುಸು ಇಳಿಕೆ, ನ್ಯಾನೊ ಭಾರಿ ಇಳಿಕೆ

ಕಂಪನಿಯು ಇದೇ ತಿಂಗಳಲ್ಲಿ ದೇಶದ ಮಾರುಕಟ್ಟೆಯಲ್ಲಿ ಸುಮಾರು 59,874 ವಾಣಿಜ್ಯ ಮತ್ತು ಪ್ರಯಾಣಿಕ ವಾಹನ ಮಾರಾಟ ಮಾಡಿದ್ದು ಕಳೆದ ವರ್ಷದ 60,797 ಯೂನಿಟ್ ಮಾರಾಟಕ್ಕೆ ಹೋಲಿಸಿದರೆ ಶೇಕಡ 2ರಷ್ಟು ಇಳಿಕೆ ದಾಖಲಿಸಿದೆ.

ಇದೇ ಸಮಯದಲ್ಲಿ ಕಂಪನಿಯ ವಾಹನ ರಫ್ತು 4,204 ಯೂನಿಟ್ ಗೆ ತಲುಪಿದ್ದು, ಕಳೆದ ವರ್ಷದ ಇದೇ ತಿಂಗಳ 5,157 ಯೂನಿಟ್ ಗೆ ಹೋಲಿಸಿದರೆ ಶೇಕಡ 18ರಷ್ಟು ಇಳಿಕೆ ಕಂಡಿದೆ.

ಆದರೆ ಕಂಪನಿಯ ವಾಣಿಜ್ಯ ವಾಹನ ಮಾರಾಟ 43,045 ಯೂನಿಟ್ ಗೆ ತಲುಪಿ ಶೇಕಡ 21ರಷ್ಟು ಹೆಚ್ಚಾಗಿದೆ. ಹಗುರವಾಣಿಜ್ಯ ವಾಹನ ಮಾರಾಟ ಶೇಕಡ 27ರಷ್ಟು ಏರಿಕೆ ಕಂಡಿದೆ. ಮಧ್ಯಮ ಮತ್ತು ಭಾರಿ ವಾಣಿಜ್ಯ ವಾಹನ ಮಾರಾಟ ಶೇಕಡ 12ರಷ್ಟು ಏರಿಕೆ ಕಂಡಿದೆ ಎಂದು ಟಾಟಾ ಮೋಟರ್ಸ್ ಪ್ರಕಟಣೆಯಲ್ಲಿ ತಿಳಿಸಿದೆ.

ಆಗಸ್ಟ್ ತಿಂಗಳಿನಲ್ಲಿ ಕಂಪನಿ ವಿತರಣೆ ಮಾಡುವ ಫಿಯೆಟ್ ಕಾರುಗಳ ಮಾರಾಟ 17,898 ಯೂನಿಟ್ ಗೆ ತಲುಪಿದ್ದು ಶೇಕಡ 34ರಷ್ಟು ಇಳಿಕೆ ಕಂಡಿದೆ. ಟಾಟಾ ಪ್ಲಸ್ ಮಾರಾಟ 16,829 ಯೂನಿಟ್ ಮತ್ತು 1,029 ಫಿಯೆಟ್ ಕಾರು ಮಾರಾಟವಾಗಿವೆ.

ನ್ಯಾನೊ ಮಾರಾಟ: ಇದೇ ತಿಂಗಳಿನಲ್ಲಿ ಸಣ್ಣಕಾರು ಟಾಟಾ ನ್ಯಾನೊ ಮಾರಾಟ 1,202 ಯೂನಿಟ್ ಗೆ ತಲುಪಿದ್ದು ಕಳೆದ ವರ್ಷದ ಆಗಸ್ಟ್ ತಿಂಗಳಿಗೆ ಹೋಲಿಸಿದರೆ ಶೇಕಡ 85ರಷ್ಟು ಇಳಿಕೆ ಕಂಡಿದೆ.