ಟಾಟಾ ಮೋಟರ್ಸ್ ಕಾರು ಉತ್ಪಾದನೆಗೆ ಗ್ರಹಣ

ಕಂಪನಿಯು ಪೂರೈಕೆದಾರರಲ್ಲಿ ಕಡಿಮೆ ಬಿಡಿಭಾಗ ಪೂರೈಕೆ ಮಾಡುವಂತೆ ತಿಳಿಸಿದೆ. ಒಂದು ವರದಿಯ ಪ್ರಕಾರ ಟಾಟಾ ಮೋಟರ್ಸ್ ಸಣ್ಣ ಕಾರು ನ್ಯಾನೊ ಸೇರಿದಂತೆ ಹೆಚ್ಚಿನ ಪ್ರಯಾಣಿಕ ಕಾರುಗಳ ಉತ್ಪಾದನೆ ಕಡಿತಗೊಳಿಸಿದೆ. ಈ ತಿಂಗಳು ಕಂಪನಿ ಕೇವಲ 12 ಸಾವಿರ ಕಾರು ಉತ್ಪಾದಿಸಿದೆ ಎನ್ನಲಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಕಂಪನಿಯು ಸುಮಾರು 18 ಸಾವಿರ ಕಾರು ಉತ್ಪಾದಿಸಿತ್ತು.

ಕಾರು ಮಾರಾಟದಲ್ಲಿ ಗಮನಾರ್ಹ ಇಳಿಕೆ ಕಾಣುತ್ತಿದೆ ಎಂಬುದನ್ನು ಈ ಉತ್ಪಾದನೆ ಕಡಿತದಿಂದ ತಿಳಿದುಕೊಳ್ಳಬಹುದು. ಅತ್ಯಧಿಕ ಬಡ್ಡಿದರ ಮತ್ತು ಹೆಚ್ಚಿದ ಪೆಟ್ರೋಲ್ ದರ ಗ್ರಾಹಕರ ಭಾವನೆ ಮೇಲೆ ಪರಿಣಾಮ ಬೀರಿದ್ದು, ಕಾರು ಖರೀದಿಯಿಂದ ಹಿಂದೆ ಸರಿಯುತ್ತಿದ್ದಾರೆ. ಡಿಸ್ಕೌಂಟ್ ಮತ್ತು ವಿಶೇಷ ಆಫರುಗಳು ಈ ಸಂದರ್ಭದಲ್ಲಿ ಕೆಲಸ ಮಾಡುತ್ತಿಲ್ಲ. ಈ ಹಬ್ಬದ ಸೀಸನ್ ಕಾರು ಕಂಪನಿಗಳು ಮತ್ತು ಡೀಲರುಗಳಿಗೆ ಅತ್ಯಂತ ಕೆಟ್ಟದಿನಗಳು ಎಂದು ವಿಶ್ಲೇಷಕರು ಅಭಿಪ್ರಾಯಪಡುತ್ತಾರೆ.