ನವೆಂಬರ್ 4ರಂದು ಲ್ಯಾಂಡ್ ರೋವರ್ ಇವೊಕ್ ರಸ್ತೆಗೆ

ಕಂಪನಿಯು ತನ್ನ ರೇಂಜ್ ರೋವರ್ ಇವೊಕ್ ಗಾಗಿ ತನ್ನ ಮೊದಲ ಶೋರೂಂ ಅಥವಾ ಇವೊಕ್ ಕಾರಿನ ಅಂಗಡಿಯನ್ನು ಮುಂಬೈನಲ್ಲಿ ತೆರೆಯಲಿದೆ. ಹೀಗಾಗಿ ದೇಶದ ಗ್ರಾಹಕರು ಇನ್ನು ಮುಂದೆ ಇವೊಕ್ ಕಾರುಗಳನ್ನು ಸುಂಕ ಕಟ್ಟಿ ಆಮದು ಮಾಡಿಕೊಳ್ಳುವ ಸಂಕಟವಿಲ್ಲ.

ಉಳಿದ ದೊಡ್ಡಗಾತ್ರದ ಸ್ಪೋರ್ಟ್ಸ್ ಕಾರುಗಳಿಗೆ ಹೋಲಿಸಿದರೆ ಇದು ಪುಟ್ಟ ಅಚ್ಚರಿ. ಯಾಕೆಂದರೆ ಇದು ಸಣ್ಣ ಮತ್ತು ಹಗುರ ಎಸ್ ಯುವಿ. ಈ ಕಾರಿನ ಇಂಟಿರಿಯರ್ ಆರಾಮದಾಯಕ. ಅತ್ಯುತ್ತಮ ದರ್ಜೆಯ ಚರ್ಮದ ಹೊದಿಕೆ ಮತ್ತು ಕಾರ್ಬನ್ ಫೈಬರ್ ಇದರ ಅಂತರಂಗವನ್ನು ರಂಗಾಗಿಸಿದೆ.

ಇದು ಐದು ಸೀಟಿನ ಕಾರು. ನಗರದ ರಸ್ತೆಯಲ್ಲಿ ಮಾತ್ರವಲ್ಲದೇ ರಸ್ತೆಯಂತೆ ಕಾಣುವ ರಸ್ತೆಯಿಲ್ಲದ ಕೆಲವು ಆಫ್ ರೋಡಿನಲ್ಲೂ ಇದರಲ್ಲಿ ಪ್ರಯಾಣಿಸಬಹುದು. ಗುಡ್ಡಗಾಡಿನ ಹಾದಿಯಲ್ಲಿ ಸವಾರಿ ಮಾಡುವಂತಹ ಸಮರ್ಥ ಲ್ಯಾಂಡ್ ರೋವರ್ ಆಫ್ ರೋಡ್ ಕಾರು ಬೇಕೆಂದರೆ ಡಿಸ್ಕವರಿ 4 ಅಥವಾ ಫ್ರೀಲಾಂಡರ್ 2 ಕಾರು ಖರೀದಿಸಬಹುದು.

ಹಾಗಂತ ಇದು ಆಫ್ ರೋಡ್ ಅಥವಾ ರೋಡಿಲ್ಲದ ರೋಡಿನಲ್ಲಿ ಪ್ರಯಾಣಿಸಲು ಸೂಕ್ತವಾಗಿಲ್ಲ ಅಂತಲ್ಲ. ಇವೊಕ್ ಗಿಂತ ಕಡಿಮೆ ದರಕ್ಕೆ ಫ್ರಿಲಾಂಡರ್, ಡಿಸ್ಕವರಿ ಕಾರುಗಳು ದೊರಕುತ್ತಿದೆ. ನೂತನ ಇವೊಕ್ ದರ ಫ್ರೀಲಾಂಡರ್ ಗಿಂತ ಕೊಂಚ ದುಬಾರಿ ಎಂದು ವರದಿಗಳು ಹೇಳಿವೆ. ದರವೆಷ್ಟು ಎಂಬುದನ್ನು ಕಂಪನಿ ಇನ್ನೂ ಖಚಿತಪಡಿಸಿಲ್ಲ.