ದೆಹಲಿ ವಾಹನ ಪ್ರದರ್ಶನಕ್ಕೆ ದಿನಕ್ಕೆ ಎಷ್ಟು ಜನರು ಬರುತ್ತಾರೆ?

ಪ್ರಗತಿ ಮೈದಾನದಲ್ಲಿ ನಡೆಯಲಿರುವ ವಾಹನ ಪ್ರದರ್ಶನಕ್ಕೆ ಪ್ರತಿದಿನ ಭೇಟಿ ನೀಡುವ ಜನಮಿತಿಯನ್ನು ಸಂಘಟಕರು ಒಂದು ಲಕ್ಷಕ್ಕೆ ಸೀಮಿತಗೊಳಿಸಿದ್ದಾರೆ. ಹೀಗಾಗಿ ದೆಹಲಿ ವಾಹನ ಪ್ರದರ್ಶನಕ್ಕೆ ಹೋಗಲು ಬಯಸುವರು ಬೇಗ ಟಿಕೇಟ್ ಬುಕ್ ಮಾಡೋದು ಒಳ್ಳೆಯದು. ಸಾರ್ವಜನಿಕ ಪ್ರವೇಶ ಶುಲ್ಕ ಸುಮಾರು 150 ರುಪಾಯಿ.

"ವಾಹನ ಪ್ರದರ್ಶನದ ಮೂಲಸೌಕರ್ಯ ಮುಂತಾದ ವಿಷಯಗಳನ್ನು ಗಮನದಲ್ಲಿಟ್ಟುಕೊಂಡು ಪ್ರತಿದಿನದ ಜನಮಿತಿಯನ್ನು ಒಂದು ಲಕ್ಷಕ್ಕೆ ಸೀಮಿತಗೊಳಿಸಲಾಗಿದೆ" ಎಂದು ಆಟೋ ಎಕ್ಸ್ ಪೋ 2012 ಆಯೋಜನಾ ಸಮಿತಿ ಚೇರ್ಮೆನ್ ರಾಜೀವ್ ಕೌಲ್ ಹೇಳಿದ್ದಾರೆ.

ಈ ಒಂದು ಲಕ್ಷ ಪ್ರವೇಶಮಿತಿಯಲ್ಲಿ ಸುಮಾರು 70 ಸಾವಿರ ಸಾರ್ವಜನಿಕರು ಆಗಮಿಸಬಹುದು. ಉಳಿದ 30 ಸಾವಿರದಲ್ಲಿ ಪ್ರದರ್ಶಕರು, ಮಾಧ್ಯಮದವರು, ಪೊಲೀಸ್ ಸಿಬ್ಬಂದಿ ಸೇರಿದ್ದಾರೆ. ಈ ವಾಹನ ಪ್ರದರ್ಶನದಲ್ಲಿ 50 ಹೊಸ ವಾಹನಗಳು ಬಿಡುಗಡೆಯಾಗುವುದು ವಿಶೇಷ. ಜೊತೆಗೆ ವಿಶ್ವದ ಪ್ರಮುಖ ಆಕರ್ಷಕ ಕಾರು, ಬೈಕುಗಳು ಇರಲಿವೆ.