ಟಾಟಾ ಮೋಟರ್ಸ್ ನಿಂದ ಅಗ್ಗದ ಆರಿಯಾ ಕ್ರಾಸೊವರ್

ನೂತನ ಆರಿಯಾ ದರ ಸುಮಾರು 10ರಿಂದ 11 ಲಕ್ಷ ರು. ಇರುವ ನಿರೀಕ್ಷೆಯಿದೆ. ಇದೆಂಥ ಅಗ್ಗ ಎನ್ನದಿರಿ. ಅಕ್ಟೋಬರ್ ನಲ್ಲಿ ಹೊರಬಂದ ಆರಿಯಾ ದರ 13.54 ಲಕ್ಷ ರು.ನಿಂದ 46 ಲಕ್ಷ ರು.ವರೆಗಿತ್ತು. ದೇಶದ ವಾಹನ ತಯಾರಿಕರ ಒಕ್ಕೂಟ ಹೇಳುವ ಪ್ರಕಾರ ದೇಶದಲ್ಲಿ ಈಗ ಪ್ರತಿತಿಂಗಳು ನೂರರಿಂದ 300ರಷ್ಟು ಆರಿಯಾ ಕಾರುಗಳು ಮಾರಾಟವಾಗತ್ತಿವೆ.

"ಟಾಟಾ ಆರಿಯಾ ಕಾರು ದುಬಾರಿಯಾಗಿರುವುದರಿಂದ ಹೆಚ್ಚು ಜನರು ಇಷ್ಟಪಡುವುದಿಲ್ಲ" ಎಂದು ಡೀಲರ್ ಒಬ್ಬರು ಹೇಳಿದ್ದಾರೆ. ದರ ಕಡಿಮೆಯಾದರೆ ಜನರಿಗೆ ಇಷ್ಟವಾಗಬಹುದು ಎಂದಿದ್ದಾರೆ. ಆರಿಯಾ ಒಟ್ಟು ಎಷ್ಟು ಮಾರಾಟವಾಗಿದೆ ಎಂಬ ಪ್ರಶ್ನೆಗೆ ಉತ್ತರಿಸಲು ಟಾಟಾ ಮೋಟರ್ಸ್ ವಕ್ತಾರರು ನಿರಾಕರಿಸಿದ್ದಾರೆ. ಆದರೆ ಜೆಡಿ ಪವರ್ ಏಷ್ಯಾ ಪೆಸಿಫಿಕ್ ಹೇಳುವ ಪ್ರಕಾರ ಕಳೆದ 5 ತಿಂಗಳಲ್ಲಿ ಸುಮಾರು 900 ಆರಿಯಾ ಕಾರುಗಳು ಮಾರಾಟವಾಗಿದೆ.

ಟೊಯೊಟಾ ಇನ್ನೋವಾ ಮತ್ತು ಮಹೀಂದ್ರ ಕ್ಷೈಲೊ ಕಾರುಗಳು ಟಾಟಾ ಆರಿಯಾಕ್ಕಿರುವ ಪ್ರಮುಖ ಪ್ರತಿಸ್ಪರ್ಧಿ ಕಾರುಗಳಾಗಿವೆ. ಆರಿಯಾದ 36 ಫೀಚರ್ ಗಳನ್ನು ಹೈಲೈಟ್ ಮಾಡುವ ಮೂಲಕ ಟಾಟಾ ಮೋಟರ್ಸ್ ಹೊಸ ಮಾರಾಟ ತಂತ್ರ ಅನುಸರಿಸಿದೆ.