ರೋಲ್ಸ್ ರಾಯ್ಸ್ ಘೋಸ್ಟ್ ಖರೀದಿಸಿದ ನಟ ವಿಜಯ್

ಇತ್ತೀಚೆಗಷ್ಟೇ ತಮಿಳು ಚಿತ್ರ ನಿರ್ದೇಶಕ ಶಂಕರ್ ಕಪ್ಪು ಬಣ್ಣದ ರೋಲ್ಸ್ ರಾಯ್ಸ್ ಘೋಸ್ಟ್ ಕಾರು ಖರೀದಿಸಿದ್ದರು. ಇದೀಗ ಇಂತಹುದೇ ಕಾರು ಖರೀದಿಸಿರುವ ವಿಜಯ್, ಐಷಾರಾಮಿ ಕಾರು ಹೊಂದಿರುವವರ ಸೆಲೆಬ್ರಿಟಿ ಲಿಸ್ಟ್‌ಗೆ ಸೇರ್ಪಡೆಯಾಗಿದ್ದಾರೆ.

ಅಂದ ಹಾಗೆ ರೋಲ್ಸ್ ರಾಯ್ಸ್ ಘೋಸ್ಟ್ ಕಾರಿನ ದರ 1.25 ಕೋಟಿ ರುಪಾಯಿ. ಆದರೆ ಆಮದು ಸುಂಕ ಹಾಗೂ ರಿಜಿಸ್ಟ್ರೇಶನ್ ವೆಚ್ಚಗಳು ಸೇರಿದಂತೆ ಘೋಸ್ಟ್ ದರ ಸರಿ ಸುಮಾರು 3.5 ಕೋಟಿ ರುಪಾಯಿಗಳಾಗುತ್ತದೆ.

ಈ ಮೂಲಕ ಘೋಸ್ಟ್ ಕಾರು ಹೊಂದಿರುವ ಬೆರಳೆಣಿಕೆಯ ಸೆಲೆಬ್ರಿಟಿಗಳ ಗುಂಪಿಗೆ ವಿಜಯ್ ಸೇರ್ಪಡೆಯಾಗಿದ್ದಾರೆ. ದೇಶದಲ್ಲಿ ಅಮಿತಾಬ್ ಬಚ್ಚನ್, ಶಂಕರ್, ಅಮಿರ್ ಖಾನ್, ಸಂಜಯ್ ದತ್ ಹಾಗೂ ವಿನೋದ್ ಛೋಪ್ರಾ ಮುಂತಾದವರಲ್ಲಿ ಘೋಸ್ಟ್ ಕಾರಿದೆ.

ಈ ಸಂದರ್ಭದಲ್ಲಿ ಪ್ರತಿಕ್ರಿಯಿಸಿರುವ ನಟ ವಿಜಯ್, ರೋಲ್ಸ್ ರಾಯ್ಸ್ ಘೋಸ್ಟ್ ಕಾರು ಮಾಲಿಕ ಎನಿಸಿಕೊಂಡಿರುವುದಕ್ಕೆ ಅತೀವ ಹೆಮ್ಮೆಪಡುವುದಾಗಿ ತಿಳಿಸಿದ್ದಾರೆ.

ರೋಲ್ಸ್ ರಾಯ್ಸ್ ಬ್ರಾಂಡ್ ಇಮೇಜಿಗೆ ಕುತ್ತಾಗದಂತೆ ಪ್ರಮುಖ ಸೆಲೆಬ್ರಿಟಿ ಮತ್ತು ಉದ್ಯಮಿಗಳಿಗೆ ಘೋಸ್ಟ್ ಕಾರುಗಳನ್ನು ಮಾರಾಟ ಮಾಡಲಾಗುತ್ತಿದೆ.