ಕಾರಿನ ಸೀಟಲ್ಲಿ ಸೆನ್ಸಾರಿದೆ, ಕಳ್ಳಕಾಕರು ಕೂರೋ ಹಾಗಿಲ್ಲ!!

ಟೊಕಿಯೋ ಮೂಲದ ಅಡ್ವಾನ್ಸಡ್ ಇನ್ಶುಟ್ಯೂಟ್ ಆಫ್ ಇಂಡಸ್ಟ್ರಿಯಲ್ ಟೆಕ್ನಾಲಜಿ ನೂತನ ಗ್ಯಾಡ್ಜೆಟ್ ಅಭಿವೃದ್ಧಿಪಡಿಸಿದೆ. Anti Theft Seat Sensor System ಎಂಬ ಹೆಸರಿನ ಈ ಸಾಧನವು ಸೀಟ್ ನಲ್ಲಿ ಕುಳಿತ ಕಾರು ಮಾಲೀಕನನ್ನು ಗುರುತಿಸುತ್ತದೆ. ಅಪರಿಚಿತರು ಬಂದು ಕುಳಿತುಕೊಂಡರೆ ಕಾರಿನ ಎಂಜಿನ್ ಸ್ಟಾರ್ಟ್ ಆಗುವುದಿಲ್ಲವೆನ್ನುವುದು ಇದರ ವಿಶೇಷತೆಯಾಗಿದೆ.

ಕಾರಿನ ಸೀಟಿನಲ್ಲಿ ಕುಳಿತ ವ್ಯಕ್ತಿಯ ಗಾತ್ರ, ತೂಕ, ಸೀಟಿನ ಮೇಲೆ ಬಿದ್ದಿರುವ ಒತ್ತಡ ಇತ್ಯಾದಿಗಳನ್ನೆಲ್ಲ ಈ ಗ್ಯಾಡ್ಜೆಟ್ ಗುರುತಿಸುತ್ತದೆ. ಈ ಮಾಹಿತಿಗಳನ್ನೆಲ್ಲ ಹಳೆಯ ಮಾಹಿತಿಗಳೊಂದಿಗೆ ಹೋಲಿಕೆ ಮಾಡಿಕೊಳ್ಳುತ್ತದೆ. ಕುಳಿತಿರುವ ವ್ಯಕ್ತಿ ಓನರ್ ಎಂದು ಈ ಮಾಹಿತಿಗಳಿಂದ ಸ್ಪಷ್ಟವಾದರೆ ಕಾರು ಆನ್ ಆಗುತ್ತದೆ.

ಈ ಸಾಧನದಲ್ಲಿ 360ಕ್ಕೂ ಹೆಚ್ಚು ಸೆನ್ಸಾರುಗಳಿವೆ. ಇಈ ಸಾಧನವು ಕಾರಿನ ಮಾಲಿಕರ ಒತ್ತಡ ಸಿಗ್ನೆಚರ್ ಸಂಗ್ರಹಿಸಿಟ್ಟುಕೊಳ್ಳುತ್ತದೆ. ಸಂಗ್ರಹಗೊಂಡಿರುವ ಹಳೆಯ ಮಾಹಿತಿಗಳಿಗೆ ಹೊಸ ಮಾಹಿತಿ ತಾಳೆಯಾಗದಿದ್ದರೆ ಕಾರು ಸ್ಟಾರ್ಟ್ ಆಗುವುದಿಲ್ಲ. ಕಾರಿನ ಕೀಲಿಕೈ ಯಾರಿಗೋ ದೊರಕಿ ಕಾರಿನ ಕಳ್ಳತನವಾಗುವ ಅಪಾಯವನ್ನೂ ಈ ಸಾಧನ ತಪ್ಪಿಸುತ್ತದೆ.

ನೂತನ ಸಾಧನ ಕಾರು ಕಳ್ಳತನವಾಗುವುದನ್ನು ತಡೆಯುತ್ತದೆ ಎಂದು ಕಂಪನಿ ಹೇಳಿದೆ. ಈ ಸಾಧನವನ್ನು ಇನ್ನಷ್ಟು ಅಭಿವೃದ್ಧಿಪಡಿಸಲು ಪ್ರಯತ್ನಿಸುತ್ತಿರುವುದಾಗಿ ಕಂಪನಿ ಹೇಳಿದೆ. ಗಡದ್ದಾಗಿ ಊಟ ಮಾಡಿಬಂದಾಗ ತೂಕ ಹೆಚ್ಚಾಗಿದ್ದರೆ ಈ ಸೆನ್ಸಾರ್ ಮಾಲಿಕನನ್ನು ಗುರುತಿಸಬಹುದೇ ಗೊತ್ತಿಲ್ಲ.

ಇಲ್ಲೊಂದಿಷ್ಟು ಸಮಸ್ಯೆಗಳು ಡ್ರೈವ್ ಸ್ಪಾರ್ಕ್ ಗಮನಕ್ಕೆ ಬಂದಿದೆ. ಪ್ರೆಷರ್ ಸಿಗ್ನಚರ್ ಇರುವುದರಿಂದ ಈ ಕಾರು ಕೇವಲ ಒಬ್ಬ ವ್ಯಕ್ತಿಗೆ ಮಾತ್ರ ಡ್ರೈವ್ ಮಾಡಲು ಸಾಧ್ಯ. ಸಿಗ್ಚೆಚರ್ ಹೋಲಿಕೆಯಾಗದ ವ್ಯಕ್ತಿ ಇದರಲ್ಲಿ ಡ್ರೈವ್ ಮಾಡಲು ಸಾಧ್ಯವಿಲ್ಲ. ಎಲ್ಲಾದರೂ ತುರ್ತು ಸಂದರ್ಭಗಳಲ್ಲಿ ಕಾರನ್ನು ಯಾರಾದರೂ ಚಾಲನೆ ಮಾಡಲು ಸಾಧ್ಯವಿಲ್ಲ. ಈ ಸಿಸ್ಟಮಿಗೆ ಬಹು ಸಿಗ್ನೆಚರ್ ಅಳವಡಿಸುವ ಕುರಿತು ಯೋಚಿಸುತ್ತಿರುವುದಾಗಿ ಇದರ ತಯಾರಿಕಾ ಕಂಪನಿ ಹೇಳಿದೆ.

ಇನ್ನೆರಡು ವರ್ಷಗಳಲ್ಲಿ ಈ ಆಂಟಿ ಥೆಪ್ಟ್ ಸೆನ್ಸಾರ್ ಸಾಧನವು ಮಾರುಕಟ್ಟೆಗೆ ಪ್ರವೇಶಿಸುವ ನಿರೀಕ್ಷೆಯಿದೆ. ಈ ಸಾಧನ ಬಂದ ನಂತರ ಕಾರು ಕಳ್ಳರು ಕಾರು ಮಾಲೀಕನ ಹಿಂಭಾಗವನ್ನು ಹೇಗೆ ನಕಲು ಮಾಡಬಹುದು ಎನ್ನುವುದು ನಮ್ಮ ಮುಂದಿನ ಪ್ರಶ್ನೆ.