ಮೂರುವರೆ ಲಕ್ಷ ರು.ಗೆ ಹೊಸ ಮಹೀಂದ್ರ ವ್ಯಾನ್

ಅಂದಹಾಗೆ ಮಹೀಮದ್ರ ಕಂಪನಿಯು ಈಗ ಅಹಮಾದಬಾದ್ ನಗರದಲ್ಲಿ ನೂತನ ಮ್ಯಾಕ್ಸಿಮೊ ಮಿನಿ ವ್ಯಾನ್ ಪರಿಚಯಿಸಿದೆ. ಶೀಘ್ರದಲ್ಲಿ ರಾಜ್ಯಕ್ಕೂ ಆಗಮಿಸುವ ನಿರೀಕ್ಷೆಯಿದೆ. ಮಿನಿ ಟ್ರಕ್ ಮಾರುಕಟ್ಟೆಯಲ್ಲಿ ತನ್ನ ಪಾಲು ಹೆಚ್ಚಿಸಿಕೊಳ್ಳಲು ಕಂಪನಿಗೆ ನೂತನ ಮ್ಯಾಕ್ಸಿಮೊ ನೆರವಾಗುವ ನಿರೀಕ್ಷೆಯಿದೆ. ಕಂಪನಿಯು ಪ್ರಸಕ್ತ ಮಾರುಕಟ್ಟೆ ಪಾಲು ಶೇಕಡ 20-25ರಷ್ಟಿದೆ.

ನೂತನ ಮ್ಯಾಕ್ಸಿಮೊ ಮಿನಿ ವ್ಯಾನ್ ಇತರ ಎಲ್ಲಾ ಮಿನಿವ್ಯಾನ್ ಗಳಿಗಿಂತ ಹೆಚ್ಚು ಇಂಧನ ದಕ್ಷತೆಯನ್ನು ಹೊಂದಿದೆ ಎಂದು ಕಂಪನಿ ಪ್ರತಿಪಾದಿಸಿದೆ. ಅಂದರೆ ಆಮ್ನಿಗಿಂತ ಶೇಕಡ 30-40ರಷ್ಟು ಹೆಚ್ಚು ಮೈಲೇಜ್ ಹೊಂದಿದೆಯಂತೆ. ನೂತನ ಮ್ಯಾಕ್ಸಿಮೊ ಮಿನಿ ವ್ಯಾನ್ ಪ್ರತಿಲೀಟರ್ ಡೀಸೆಲಿಗೆ 18-20 ಕಿ.ಮೀ. ಮೈಲೇಜ್ ನೀಡುತ್ತದೆ. ಅಂದಹಾಗೆ ನೂತನ ಮ್ಯಾಕ್ಸಿಮೊ ಸಿ2 ಕಾಮನ್ ರೇಲ್ ಡೀಸೆಲ್ ಎಂಜಿನ್ ಹೊಂದಿದೆ.

"ನೂತನ ಡೀಸೆಲ್ ಎಂಜಿನ್ ಮೂಲಕ, ಸ್ಟೈಲಿಶ್, ವಿಶಾಲ ಸ್ಥಳಾವಕಾಶ, ಆರಾಮದಾಯಕವಾದ ಮತ್ತು ಅತ್ಯುತ್ತಮ ಮೈಲೇಜನ್ನು ನೂತನ ಮ್ಯಾಕ್ಸಿಮೊ ಮಿನಿ ವ್ಯಾನ್ ಮೂಲಕ ಗ್ರಾಹಕರಿಗೆ ನೀಡುತ್ತಿದ್ದೇವೆ" ಎಂದು ಮಹೀಮದ್ರ ಕಂಪನಿಯ ಮಾರಾಟ ವಿಭಾಗದ ಉಪಾಧ್ಯಕ್ಷರಾದ ಅರುಣ್ ಮಲ್ಹೋತ್ರಾ ಹೇಳಿದ್ದಾರೆ.

ಈಗ ಮಿನಿವ್ಯಾನ್ ಮಾರುಕಟ್ಟೆಯಲ್ಲಿ ಮಾರುತಿ ಸುಜುಕಿ ಪ್ರಾಬಲ್ಯ ಪಡೆದಿದೆ. ಕಂಪನಿಯು ಪ್ರತಿತಿಂಗಳೂ ಸುಮಾರು 12 ಸಾವಿರದಷ್ಟು ಆಮ್ನಿ ಮತ್ತು ಎಕೊ ಮಾರಾಟ ಮಾಡುತ್ತಿದೆ. ಟಾಟಾ ಮೋಟರ್ಸ್ ಕಂಪನಿಯು ಪ್ರತಿತಿಂಗಳು ಸುಮಾರು 4,500ರಿಂದ 6 ಸಾವಿರ ಯುನಿಟ್ ನಷ್ಟು ಮ್ಯಾಜಿಕ್ ಮತ್ತು ಮ್ಯಾಜಿಕ್ ಐರಿಷ್ ಮಾರಾಟ ಮಾಡುತ್ತಿದೆ. ಮಹೀಂದ್ರ ಕಂಪನಿಯ ಹಳೆಯ ಮ್ಯಾಕ್ಸಿಮೊ ಆವೃತ್ತಿಯು ಪ್ರತಿತಿಂಗಳು ಹೆಚ್ಚೆಂದರೆ ಸುಮಾರು 2,500ರಷ್ಟು ಮಾರಾಟವಾಗುತ್ತಿದೆ.