ಮಾರುತಿ ಸುಜುಕಿ ಮೇಲೆ ಕೇಸ್ ಹಾಕಿದ ಕಾರ್ಮಿಕ ಇಲಾಖೆ

ಚಿತ್ರಲೋಕ

ಕಳೆದ ವರ್ಷ ಆಕ್ಟೊಬರ್ ನಲ್ಲಿ ಮಾರುತಿ ಸುಜುಕಿ ಮತ್ತು ಮುಷ್ಕರ ನಿರತ ನೌಕರರ ನಡುವೆ ಕಾರ್ಮಿಕ ಇಲಾಖೆಯು ಮಧ್ಯವರ್ತಿಯಾಗಿ ವರ್ತಿಸಿ ಬಿಕ್ಕಟ್ಟು ಬಗೆಹರಿಸಲು ಯತ್ನಿಸಿತ್ತು. ಮಾರುತಿ ನೌಕರರು ಸುಮಾರು 2 ತಿಂಗಳ ಕಾಲ ಪ್ರತಿಭಟನೆ ನಡೆಸಿದ್ದರು. ಇದರಿಂದ ಮಾರುತಿ ಸುಜುಕಿಗೆ ಅಪಾರ ಪ್ರಮಾಣದ ನಷ್ಟವುಂಟಾಗಿತ್ತು.

ನೌಕರರ ಬೇಡಿಕೆಗಳಿಗೆ ಮಾರುತಿ ಸುಜುಕಿ ಅಸ್ತು ಹೇಳಿದ ನಂತರ ನೌಕರರು ಪ್ರತಿಭಟನೆ ಕೈಬಿಟ್ಟಿದರು. ನೌಕರರ ಕುಂದುಕೊರತೆ ಪರಿಶೀಲಿಸಲು ಸಮಿತಿ ರಚಿಸುವುದಾಗಿ ಆ ಸಮಯದಲ್ಲಿ ಮಾರುತಿ ಸುಜುಕಿ ತಿಳಿಸಿತ್ತು. ಈ ಎರಡೂ ಕಮಿಟಿಗಳನ್ನು ಇಲ್ಲಿವರೆಗೆ ಮಾರುತಿ ಸುಜುಕಿ ಸ್ಥಾಪಿಸಿಲ್ಲವೆಂದು ನೌಕರರ ಸಂಘವು ಆಪಾದಿಸಿತ್ತು. ಈ ಕುರಿತು ಕಾರ್ಮಿಕ ಇಲಾಖೆಯು ನ್ಯಾಯಾಲಯಕ್ಕೆ ಮಾಹಿತಿ ನೀಡಿದೆ.

ಮಾರುತಿ ಸುಜುಕಿ ವಿರುದ್ಧ ದಾವೆ ಹೂಡಿರುವುದನ್ನು ಹರ್ಯಾಣದ ಕಾರ್ಮಿಕ ಇಲಾಖೆಯು ಖಚಿತಪಡಿಸಿದೆ. ಈ ಕುರಿತು ಯಾವುದೇ ಹೇಳಿಕೆ ನೀಡಲು ಮಾರುತಿ ಸುಜುಕಿ ನಿರಾಕರಿಸಿದೆ.

ನೂತನ ನೌಕರರ ಸಂಘಕ್ಕೆ ಅನುಮತಿ ನೀಡುವಂತೆ ಮತ್ತು ನೌಕರರ ಕುಂದು ಕೊರತೆಗಳನ್ನು ಬಗೆ ಹರಿಸುವಂತೆ ಪಟ್ಟುಹಿಡಿದು ಮಾರುತಿ ನೌಕರರು ಕಳೆದ ವರ್ಷ ಸುಮಾರು 59 ದಿನಗಳ ಕಾಲ ಮುಷ್ಕರ ನಡೆಸಿದ್ದರು. ಇದರಿಂದಾಗಿ ಕಂಪನಿಯ ಕಾರು ಉತ್ಪಾದನೆಗೆ ಭಾರಿ ಹಿನ್ನಡೆಯಾಗಿತ್ತು. ಸ್ವಿಫ್ಟ್ ಕಾರಿನ ವೇಟಿಂಗ್ ಪಿರೆಯಿಡ್ ಹೆಚ್ಚಾಗಿತ್ತು.