ನವೆಂಬರ್ 2012; ಸೋತವರು ಗೆದ್ದವರು ಯಾರು?

ಮಾರುತಿಗೆ ಸರಿಸಾಟಿ ಯಾರು?

ನಿರೀಕ್ಷೆಯಂತೆಯೇ ನವೆಂಬರ್ ತಿಂಗಳಲ್ಲಿ ಮಾರುತಿ ಸುಜುಕಿ ಶೇಕಡಾ 12ರಷ್ಟು ವೃದ್ಧಿ ದಾಖಲಿಸಿದೆ. ಈ ಅವಧಿಯಲ್ಲಿ ಮಾರುತಿ ಸುಜುಕಿಯ 1,03,200 ಯುನಿಟ್‌ಗಳು ಮಾರಾಟವಾಗಿದೆ. ಈ ಪೈಕಿ 12,318 ಯುನಿಟ್ ರಫ್ತಾಗಿದ್ದರೆ 90,882 (8.67) ಯುನಿಟ್ ದೇಶಿಯವಾಗಿ ಮಾರಾಟವಾಗಿದ್ದವು. ಸಹಜವಾಗಿಯೇ ಮಾರುತಿ ಎಟಿರ್ಗಾ ಹಾಗೂ ಸ್ವಿಫ್ಟ್ ಡಿಜೈರ್ ಸೆಡಾನ್ ಉತ್ತಮ ಮಾರಾಟ ದಾಖಲಿಸಿದೆ.

ಕುಸಿದ ಹ್ಯುಂಡೈ

ದೇಶಿಯ ಮಾರುಕಟ್ಟೆಯಲ್ಲಿ ಮಾರುತಿ ಸುಜುಕಿ ನಿಕಟ ಪ್ರತಿಸ್ಪರ್ಧಿಯಾಗಿರುವ ಹೊರತಾಗಿಯೂ ನವೆಂಬರ್ ತಿಂಗಳಲ್ಲಿ ಉತ್ತಮ ಮಾರಾಟ ಪ್ರಗತಿ ದಾಖಲಿಸುವಲ್ಲಿ ಹ್ಯುಂಡೈನಿಂದ ಸಾಧ್ಯವಾಗಿಲ್ಲ. ದಕ್ಷಿಣ ಕೊರಿಯಾದ ಈ ಕಾರು ತಯಾರಕ ಕಂಪನಿಯು ನವೆಂಬರ್ ತಿಂಗಳಲ್ಲಿ 55,762 ಯುನಿಟ್ ಮಾರಾಟ ಮಾಡುವ ಮೂಲಕ ಶೇಕಡಾ 2.29ರಷ್ಟು ಕುಸಿತವನ್ನು ದಾಖಲಿಸಿದೆ. ಕಳೆದ ವರ್ಷ ಇದೇ ಅವಧಿಗೆ 57,071 ಯುನಿಟ್ ಸೇಲಾಗಿದ್ದವು.

ಗುಡ್ ಲುಕಿಂಗ್ ಮಹೀಂದ್ರ

ಎಸ್‌ಯುವಿ ಸೆಗ್ಮೆಂಟ್ ವೆಹಿಕಲ್‌ಗಳಲ್ಲಿ ದೇಶದ ಪ್ರಮುಖ ಕಾರು ತಯಾರಕ ಕಂಪನಿಯಾದ ಮಹೀಂದ್ರ ನವೆಂಬರ್ ತಿಂಗಳಿನಲ್ಲೂ ಭರ್ಜರಿ ಬೇಟೆ ನಡೆಸಿದೆ. ನವೆಂಬರ್ ತಿಂಗಳಲ್ಲಿ ಶೇಕಡಾ 38ರಷ್ಟು ಭರ್ಜರಿ ಏರಿಕೆ ದಾಖಲಿಸಿರುವ ಮಹೀಂದ್ರ 24,604 ಯುನಿಟ್ ಮಾರಾಟ ಮಾಡಿವೆ. ಮಿನಿ ಕ್ಸೈಲೋ ಎಂದೇ ಪರಿಗಣಿಸಲ್ಪಟ್ಟಿರುವ ಮಹೀಂದ್ರ ಕಂಪನಿಯ ಕ್ವಾಂಟೊ ನಿಜಕ್ಕೂ ಮಾರುಕಟ್ಟೆಯಲ್ಲಿ ಧೂಳೆಬ್ಬಿಸುತ್ತಿದೆ.

ಟಾಟಾ ಮೋಟಾರ್ಸ್ ಹಿನ್ನಡೆ

ದೇಶದಲ್ಲಿ ಅತಿ ಹೆಚ್ಚು ವಾಹನ ತಯಾರಕ ಘಟಕವನ್ನು ಹೊಂದಿರುವ ಟಾಟಾ ಮೋಟಾರ್ಸ್ ನವೆಂಬರ್ ತಿಂಗಳಲ್ಲಿ ಶೇಕಡಾ 13ರಷ್ಟು ಕುಸಿತ ದಾಖಲಿಸುವ ಮೂಲಕ ಹಿನ್ನಡೆ ಅನುಭವಿಸಿದೆ. ಟಾಟಾ ಮೋಟಾರ್ಸ್ ಎಲ್ಲ ಆವೃತ್ತಿಯಲ್ಲೂ ಕುಸಿತ ದಾಖಲಾಗಿದೆ. ಇತ್ತೀಚೆಗಷ್ಟೇ ಬಿಡುಗಡೆಗೊಂಡ ಟಾಟಾ ಸಫಾರಿ ಸ್ಟ್ರೋಮ್ ಹಾಗೂ ಮಾಂಝಾ ಕ್ಲಬ್ ಕ್ಲಾಸ್ ಹೇಗೆ ಟಾಟಾ ಅದೃಷ್ಟ ಬದಲಾಯಿಸಲಿದೆ ಎಂಬುದನ್ನು ಕಾದು ನೋಡಬೇಕಾಗಿದೆ.

ಟೊಯೊಟಾಗೆ ಆಘಾತ

ಜಪಾನ್ ಕಾರು ತಯಾರಕ ಕಂಪನಿಯಾದ ಟೊಯೊಟಾ ಶೇಕಡಾ 25ರಷ್ಟು ಕುಸಿತ ಕಾಣುವ ಮೂಲಕ ಭಾರಿ ಆಘಾತ ಅನುಭವಿಸಿದೆ. ಟೊಯೊಟಾದ 10,252 ಯುನಿಟ್‌ಗಳಷ್ಟೇ ಮಾರಾಟವಾಗಿದ್ದವು. ಘಟಕ ಮುಚ್ಚುಗಡೆಗೊಂಡಿರುವುದು ಹಿನ್ನಡೆಗೆ ಕಾರಣವಾಗಿದೆ ಎಂದು ಕಂಪನಿ ಪ್ರಕಟಣೆಯಲ್ಲಿ ತಿಳಿಸಿದೆ.

ಕುಸಿತ ಅನುಭವಿಸಿದ ಫೋರ್ಡ್

ಅಮೆರಿಕ ಕಾರು ತಯಾರಕ ಕಂಪನಿಯಾದ ಫೋರ್ಡ್ ಕೂಡಾ ನವೆಂಬರ್ ತಿಂಗಳಲ್ಲಿ ಶೇಕಡಾ 28.57ರಷ್ಟು ಕುಸಿತವನ್ನು ಕಂಡಿದೆ. ಈ ಅವಧಿಯಲ್ಲಿ 5944 ಯುನಿಟ್‌ಗಳು ಮಾತ್ರ ಸೇಲಾಗಿದ್ದವು.