ಅಯ್ಯೋ ರಾಮ, ಪೆಟ್ರೋಲ್ ದರ ಮತ್ತೆ ಹೆಚ್ಚಾಗಲಿದೆಯಂತೆ!

ಪ್ರತಿದಿನ ಲೀಟರ್ ಪೆಟ್ರೋಲ್ ಮೇಲೆ ತಲಾ 3.30 ರುಪಾಯಿ ನಷ್ಟ ಅನುಭವಿಸುತ್ತಿರುವುದಾಗಿ ಭಾರತದ ಬೃಹತ್ ಪೆಟ್ರೋಲ್ ಮಾರುಕಟ್ಟೆ ಕಂಪನಿ ಇಂಡಿಯನ್ ಆಯಿಲ್ ತಿಳಿಸಿದೆ. ಕಳೆದ ಕೆಲವು ತಿಂಗಳಿನಿಂದ ಕಚ್ಚಾ ತೈಲಾ ದರ ಕೂಡ ಬ್ಯಾರೆಲಿಗೆ 109 ಡಾಲರ್ ಇದ್ದದ್ದು 128 ಡಾಲರಿಗೆ ಏರಿಕೆಯಾಗಿದೆ.

ಪೆಟ್ರೋಲ್ ದರ ಏರಿಕೆ ಕಾಣುವುದು ವಾಹನೋದ್ಯಮದ ಮೇಲೂ ಕೆಟ್ಟ ಪರಿಣಾಮ ಬೀರುತ್ತದೆ. ಇದೇ ಕಾರಣದಿಂದ ಈಗ ಪೆಟ್ರೋಲ್ ಕಾರುಗಳ ಮಾರಾಟ ಇಳಿಕೆ ಕಾಣುತ್ತಿದೆ. ಪೆಟ್ರೋಲ್ ದರ ಹೆಚ್ಚಳವಾದ ಹಿನ್ನಲೆಯಲ್ಲಿ ಹೆಚ್ಚು ಜನರು ಡೀಸೆಲ್ ಕಾರುಗಳತ್ತ ಮುಖ ಮಾಡಿದ್ದರು.

ಪೆಟ್ರೋಲ್ ದರ ದಿನೇ ದಿನೇ ಏರಿಕೆ ಕಾಣುತ್ತಿರುವುದರಿಂದ ಕಾರು ಕಂಪನಿಗಳು ಡೀಸೆಲ್, ಸಿಎನ್ ಜಿ ಮತ್ತು ಎಲ್ ಪಿಜಿ ಕಾರುಗಳ ಉತ್ಪಾದನೆಗೆ ಹೆಚ್ಚು ಗಮನ ನೀಡುವ ನಿರೀಕ್ಷೆಗಳಿವೆ. ಡೀಸೆಲ್ ಕಾರಿಗೂ ಮುಂದಿನ ಬಜೆಟಿನಲ್ಲಿ ಅಬಕಾರಿ ಸುಂಕದ ದೊಡ್ಡ ಬರೆ ಬೀಳುವ ನಿರೀಕ್ಷೆಯಿದೆ.