ಟಾಟಾ ನ್ಯಾನೊ ಸಿಎನ್‌ಜಿಗೆ ಮಹೂರ್ತ ಫಿಕ್ಸ್?

ಟಾಟಾ ಮೋಟರ್ಸ್ ಕಂಪನಿಯು ಸಂಕುಚಿತ ನೈಸರ್ಗಿಕ ಅನಿಲ(ಸಿಎನ್‌ಜಿ) ಚಾಲಿತ ನ್ಯಾನೊ ಕಾರನ್ನು ಈ ಆರ್ಥಿಕ ವರ್ಷದ ಅಂತ್ಯಕ್ಕೆ ಹೊರತರುವ ನಿರೀಕ್ಷೆಯಿದೆ. ಟಾಟಾ ಮೋಟರ್ಸ್ ಕಂಪನಿಯು ದೆಹಲಿ ವಾಹನ ಪ್ರದರ್ಶನದಲ್ಲಿ ಸಿಎನ್‌ಜಿ ನ್ಯಾನೊ ಕಾನ್ಸೆಪ್ಟ್ ಕಾರನ್ನು ಪ್ರದರ್ಶಿಸಿತ್ತು.

ಇದರೊಂದಿಗೆ ಮುಂದಿನ ವರ್ಷ ಕಂಪನಿಯ ಡೀಸೆಲ್ ನ್ಯಾನೊ ಕಾರು ಕೂಡ ಆಗಮಿಸುವ ಸಾಧ್ಯತೆಯಿದೆ. ಒಂದು ಮೂಲದ ಪ್ರಕಾರ ಈ ವರ್ಷಾಂತ್ಯವೇ ನ್ಯಾನೊ ಡೀಸೆಲ್ ಉತ್ಪಾದನೆ ಆರಂಭವಾಗುತ್ತದಂತೆ!

ನ್ಯಾನೊ ಕಾರಿನ ಸಿಎನ್ಜಿ ಆವೃತ್ತಿಯನ್ನು ಶೀಘ್ರದಲ್ಲಿ ದೇಶದ ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಯೋಜಿಸಿದ್ದೇವೆ. ಈ ಪುಟ್ಟ ಅನಿಲ ಚಾಲಿತ ಕಾರು ಈ ವರ್ಷವೇ ರಸ್ತೆಗಿಳಿಯುವ ನಿರೀಕ್ಷೆಯಿದೆ" ಎಂದು ಟಾಟಾ ಮೋಟರ್ಸ್ ವ್ಯವಸ್ಥಾಪಕ ನಿರ್ದೇಶಕ ಪಿಎಂ ತೆಲಾಂಗ್ ದೆಹಲಿ ವಾಹನ ಪ್ರದರ್ಶನದಲ್ಲಿ ಹೇಳಿದ್ದರು.

ಟಾಟಾ ನ್ಯಾನೊ ಡೀಸೆಲ್: ಸಿಎನ್‌ಜಿ ಮಾತ್ರವಲ್ಲದೇ ಕಂಪನಿಯು ಡೀಸೆಲ್ ಎಂಜಿನ್ ಆಯ್ಕೆಯಲ್ಲೂ ನ್ಯಾನೊ ಪರಿಚಯಿಸುವ ಸೂಚನೆಯಿದೆ. ಡೀಸೆಲ್ ನ್ಯಾನೊ ಕಾರು 700 ಅಥವಾ 800 ಸಿಸಿ ಟ್ವಿನ್ ಸಿಲಿಂಡರ್ ಟರ್ಬೊಚಾರ್ಜ್‌ಡ್ ಡಿಕೊರ್ ಎಂಜಿನ್ ಹೊಂದಿರುವ ನಿರೀಕ್ಷೆಯಿದೆ. ಈ ಕಾರು ನಂಬಲು ಸಾಧ್ಯವಿಲ್ಲವೆಂಬಂತೆ ಲೀಟರಿಗೆ 40 ಕಿ.ಮೀ. ಮೈಲೇಜ್ ನೀಡಲಿದೆ ಎಂಬ ವದಂತಿಗಳಿವೆ. ಡೀಸೆಲ್ ನ್ಯಾನೊ ಕಾರಿನ ದರ ಪೆಟ್ರೋಲ್ ಕಾರಿಗಿಂತ ಶೇಕಡ 30ರಷ್ಟು ಹೆಚ್ಚಿರುವ ನಿರೀಕ್ಷೆಯಿದೆ.(ಓದಿ ಕನ್ನಡ ಡ್ರೈವ್‌ಸ್ಪಾರ್ಕ್)