ದಟ್ಸನ್ ಗೊ ಪ್ಲಸ್ ಎಂಪಿವಿ ಡೀಸೆಲ್ ಮಾದರಿ ಸದ್ಯಕ್ಕಿಲ್ಲ!

ನಿಮಗೆಲ್ಲರಿಗೂ ತಿಳಿದಿರುವಂತೆಯೇ ಕೆಲವು ತಿಂಗಳುಗಳ ಹಿಂದೆಯಷ್ಟೇ ದಟ್ಸನ್ ಗೊ ಹ್ಯಾಚ್‌ಬ್ಯಾಕ್ ಕಾರು ಬಿಡುಗಡೆಗೊಂಡಿತ್ತು. ಇದರ ಬೆನ್ನಲ್ಲೇ ದಟ್ಸನ್ ಗೊ ಪ್ಲಸ್ ಬಹು ಬಳಕೆಯ ವಾಹನ (ಎಂಪಿವಿ) ಬಿಡುಗಡೆಗೆ ಸಜ್ಜಾಗಿ ನಿಂತಿದೆ.

ಸದ್ಯ ಬಂದಿರುವ ವರದಿಗಳ ಪ್ರಕಾರ ನಿಸ್ಸಾನ್ ಒಡೆತನದಲ್ಲಿರುವ ದಟ್ಸನ್‌ ಗೊ ಪ್ಲಸ್ ಎಂಪಿವಿ ಪೆಟ್ರೋಲ್ ಮಾದರಿಯಲ್ಲಿ ಮಾತ್ರ ಲಭ್ಯವಾಗಲಿದೆ. ಅಂದರೆ ಡೀಸೆಲ್ ವರ್ಷನ್ ಸದ್ಯಕ್ಕೆ ಬಿಡುಗಡೆಯಾಗುವುದಿಲ್ಲ.

ಈಗಾಗಲೇ ಇಂಡೋನೇಷ್ಯಾ ಮಾರುಕಟ್ಟೆ ಪ್ರವೇಶಿಸಿರುವ ದಟ್ಸನ್ ಗೊ ಪ್ಲಸ್, 1198 ಸಿಸಿ, ಇನ್ ಲೈಟನ್ ತ್ರಿ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದೆ. ಇದು 68 ಅಶ್ವಶಕ್ತಿ (104 ಎನ್‌ಎಂ ಟಾರ್ಕ್) ಉತ್ಪಾದಿಸಲಿದೆ. ಹಾಗೆಯೇ 5 ಸ್ಪೀಡ್ ಮ್ಯಾನುವಲ್ ಗೇರ್ ಬಾಕ್ಸ್ ಸಹ ಪಡೆಯಲಿದೆ.

ಇಂಡೋನೇಷ್ಯಾದಲ್ಲಿ ದಟ್ಸನ್ ಎ, ಆಪ್ಷನ್ ಎ, ಡಿ, ಟಿ ಹಾಗೂ ಆಪ್ಷನ್ ಟಿಗಳೆಂಬ ವೆರಿಯಂಟ್‌ಗಳಲ್ಲಿ ಬಿಡುಗಡೆಯಾಗಿತ್ತು. ಇದು 4.42 ಲಕ್ಷ ರು.ಗಳಿಂದ 5.36 ಲಕ್ಷ ರು.ಗಳಷ್ಟು ದುಬಾರಿಯೆನಿಸಿತ್ತು. ಇನ್ನು ಭಾರತದ ಮಾದರಿ ಮಾರುತಿಯ ಎರ್ಟಿಗಾಗಿಂತಲೂ ಕಡಿಮೆ ದರದಲ್ಲಿ ಪರಿಚಯವಾಗುವುದು ಬಹುತೇಕ ಖಚಿತವಾಗಿದೆ.

ಕೇವಲ ಡೀಸೆಲ್ ಆವೃತ್ತಿ ಮಾತ್ರವಲ್ಲ. ಸದ್ಯಕ್ಕೆ ಎಎಂಟಿ ವರ್ಷನ್ ಸಹ ಬಿಡುಗಡೆಯಾಗುವುದಿಲ್ಲ. ಸ್ಮರ್ದಾತ್ಮಕ ದರ ಕಾಯ್ದುಕೊಳ್ಳುವ ನಿಟ್ಟಿನಲ್ಲಿ ಸಂಸ್ಥೆಯು ಇಂತಹದೊಂದು ನಡೆಗೆ ಮುಂದಾಗಿದೆ. ಇನ್ನೊಂದೆಡೆ ಜುಲೈ ತಿಂಗಳಲ್ಲಿ ಲಾಂಚ್ ಆಗಲಿರುವ ಹೋಂಡಾ ಮೊಬಿಲಿಯೊ, ಮಾರುತಿಯ ಎರ್ಟಿಗಾಗಿಂತಲೂ ದುಬಾರಿಯಾಗುವ ಸಾಧ್ಯತೆಯಿದೆ.