ಹೈಬ್ರಿಡ್, ಎಲೆಕ್ಟ್ರಿಕ್ ಕಾರುಗಳಿಗೆ 14,000 ಕೋಟಿ ಸಬ್ಸಿಡಿ

ಇಂಧನ ಬೆಲೆಗಳ ಏರಿಕೆ ಹಾಗೂ ತೈಲ ನಿಕ್ಷೇಪದಲ್ಲಿ ಉಂಟಾಗುತ್ತಿರುವ ಕುಸಿತದಿಂದಾಗಿ ಬದಲಿ ಸಂಚಾರಿ ವ್ಯವಸ್ಥೆಯನ್ನು ಕಲ್ಪಿಸುವುದು ಅನಿವಾರ್ಯವೆನಿಸಿದೆ. ಇದರಂತೆ ಬಹುತೇಕ ರಾಷ್ಟ್ರಗಳಲ್ಲಿ ಎಲೆಕ್ಟ್ರಿಕ್ ಹಾಗೂ ಹೈಬ್ರಿಡ್ ವಾಹನಗಳನ್ನು ಹುರಿದುಂಬಿಸುವ ನಿಟ್ಟಿನಲ್ಲಿ ಸರಕಾರವು ಸಬ್ಸಿಡಿಯನ್ನು ನೀಡುತ್ತಿದೆ.

ಭಾರತದಲ್ಲೂ ಹೊಸದಾಗಿ ಆಯ್ಕೆಗೊಂಡಿರುವ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರಕಾರವು ಸಬ್ಸಿಡಿ ಮುಂದುವರಿಸಲು ನಿರ್ಧರಿಸಿದೆ. ವರದಿಗಳ ಪ್ರಕಾರ ಪರಿಸರ ಸ್ನೇಹಿ ಹಸಿರು ವಾಹನಗಳನ್ನು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಬರೋಬ್ಬರಿ 14,000 ಕೋಟಿ ರು.ಗಳ ಸಬ್ಸಿಡಿ ನೀಡುವ ಸಾಧ್ಯತೆಯಿದೆ.

ಸದ್ಯ ಭಾರತದಲ್ಲಿ ಮಹೀಂದ್ರ ಇ2ಒ ವಿದ್ಯುತ್ ಚಾಲಿತ ವಾಹನಗಳಿಗೆ ಸಬ್ಸಿಡಿ ಸಿಗುತ್ತಿದೆ. ಅಲ್ಲದೆ ಸ್ಕಾರ್ಪಿಯೊ ಹೈಬ್ರಿಡ್ ವರ್ಷನ್‌ ಇದರ ಪ್ರಯೋಜನ ಪಡೆಯಲಿದೆ. ಜಪಾನ್‌ ವಾಹನ ತಯಾರಕ ಸಂಸ್ಥೆಯಾಗಿರುವ ಟೊಯೊಟಾ ಸಹ ಎರಡು ಹೈಬ್ರಿಡ್ ಮಾದರಿಗಳನ್ನು (ಪ್ರಯಾಸ್ ಮತ್ತು ಕ್ಯಾಮ್ರಿ) ಪರಿಚಯಿಸಿದೆ.

ಸರಕಾರವು ಸಂಪೂರ್ಣವಾಗಿ ವಿದ್ಯುತ್‌ನಿಂದ ಚಲಿಸುವ ವಾಹನಗಳಿಗೆ ಶೇಕಡಾ 35ರಷ್ಟು ಅಂತೆಯೇ ಒಂದು ಎಲೆಕ್ಟ್ರಿಕ್ ಚಾರ್ಜಿಂಗ್‌ನಲ್ಲಿ 15 ಕೀ.ಮೀ. ವರೆಗೆ ಚಲಿಸುವ ವಾಹನಗಳಿಗೆ ಶೇಕಡಾ 25ರಷ್ಟು ಸಬ್ಸಿಡಿ ನೀಡಲಿದೆ. ಈ ಎಲ್ಲದರ ಮೂಲಕ ಮುಂದಿನ ಆರು ವರ್ಷಗಳಲ್ಲಿ 60,000 ಕೋಟಿ ರು.ಗಳ ಇಂಧನ ಉಳಿಸುವ ಯೋಜನೆ ಹೊಂದಿದೆ.