ಇದೀಗ ಅಧಿಕೃತ; ಜು. 24ರಂದು ಹೋಂಡಾ ಮೊಬಿಲಿಯೊ ಬಿಡುಗಡೆ

ಇದೀಗ ಎಲ್ಲವೂ ಅಧಿಕೃತಗೊಂಡಿದ್ದು, ದೇಶದ ಮುಂಚೂಣಿಯ ವಾಹನ ತಯಾರಿಕಾ ಸಂಸ್ಥೆಯಾಗಿರುವ ಹೋಂಡಾ ಇಂಡಿಯಾ ಸಂಸ್ಥೆಯು ಬಹುನಿರೀಕ್ಷಿತ ಮೊಬಿಲಿಯೊ ಬಹು ಬಳಕೆಯ ವಾಹನವನ್ನು (ಎಂಪಿವಿ) ಇದೇ ಬರುವ ಜುಲೈ 24ರಂದು ಬಿಡುಗಡೆ ಮಾಡಲಿದೆ.

ಮೊದಲ ಬಾರಿಗೆ ದೆಹಲಿಯಲ್ಲಿ ಫೆಬ್ರವರಿ ತಿಂಗಳಲ್ಲಿ ಸಾಗಿದ 2014 ವಾಹನ ಪ್ರದರ್ಶನ ಮೇಳದಲ್ಲಿ ಅನಾವರಣಗೊಂಡಿದ್ದ ಮೊಬಿಲಿಯೊ, ಈಗಾಗಲೇ ಪ್ರಮುಖ ಶಾಪಿಂಗ್ ಮಾಲ್‌ಗಳಲ್ಲಿ ಪ್ರದರ್ಶನ ಕಾಣುವ ಮೂಲಕ ಗ್ರಾಹಕರಿಗೆ ಹೆಚ್ಚು ಪರಿಚಯವಾಗಿದೆ.

ಹಾಗಿದ್ದರೂ ಬೆಲೆಯ ಬಗ್ಗೆ ಹೆಚ್ಚಿನ ಮಾಹಿತಿಗಳು ಸಂಸ್ಥೆಯಿಂದ ಲಭ್ಯವಾಗಿಲ್ಲ. ಇದು ಟೊಯೊಟಾದ ಜನಪ್ರಿಯ ಇನ್ನೋವಾ ಹಾಗೂ ಮಾರುತಿಯ ಎರ್ಟಿಗಾ ಎಂಪಿವಿ ವಾಹನಗಳ ನಡುವೆ ಗುರುತಿಸಿಕೊಳ್ಳಲಿದೆ ಎಂಬುದು ಖಚಿತವಾಗಿದೆ.

ಅದೇ ರೀತಿ ಈಗಾಗಲೇ ಮಾರುಕಟ್ಟೆಯಲ್ಲಿ ಸದ್ದು ಮಾಡಿರುವ ಅಮೇಜ್ ಹಾಗೂ ಸಿಟಿ ಆವೃತ್ತಿಯಲ್ಲಿರುವುದಕ್ಕೆ ಸಮಾನವಾಗಿರುವ 1.5 ಲೀಟರ್ ಐ-ಡಿಟೆಕ್ ಡೀಸೆಲ್ ಎಂಜಿನ್‌ನಿಂದ ನಿಯಂತ್ರಿಸಲ್ಪಡಲಿದೆ. ಇದು 98 ಅಶ್ವಶಕ್ತಿ ಉತ್ಪಾದಿಸಲಿದೆ.

ಮೈಲೇಜ್
ನೂತನ ಮೊಬಿಲಿಯೊ ಎಂಪಿವಿ ಪೆಟ್ರೋಲ್ ಹಾಗೂ ಡೀಸೆಲ್ ಮಾದರಿಗಳು ಪ್ರತಿ ಲೀಟರ್‌ಗೆ ಅನುಕ್ರಮವಾಗಿ 18 ಹಾಗೂ 26 ಕೀ.ಮೀ. ಮೈಲೇಜ್ ನೀಡುವ ಸಾಮರ್ಥ್ಯ ಹೊಂದಿರಲಿದೆ.

ಪ್ರತಿಸ್ಪರ್ಧಿ
ಸಹಜವಾಗಿಯೇ ಮಾರುತಿ ಎರ್ಟಿಗಾ ಜೊತೆ ಜೊತೆಗೆ ಷೆವರ್ಲೆ ಎಂಜಾ, ನಿಸ್ಸಾನ್ ಇವಾಲಿಯಾ ಮತ್ತು ಇನ್ನಷ್ಟೇ ಆಗಮನವಾಗಲಿರುವ ದಟ್ಸನ್ ಗೊ ಮತ್ತು ರೆನೊ ಲೊಡ್ಜಿ ಮಾದರಿಗಳಿಗೆ ಪ್ರತಿಸ್ಪರ್ಧಿಯಾಗಿರಲಿದೆ.

ಮೊಬಿಲಿಯೊ ಪ್ರಚಾರಕ್ಕೆ ಚುಕ್ಕಾಣಿ ಹಿಡಿದ ಕಾಮಿಡಿ ಸ್ಟಾರ್ ಕಪಿಲ್ - ವೀಡಿಯೋ ವೀಕ್ಷಿಸಿ