ಮೋದಿ ನೆಚ್ಚಿನ ಕಾರು ಸ್ಕಾರ್ಪಿಯೊ ಬದಲಾದಿತೇ?

ನೀವು ಇತಿಹಾಸ ಪುಟಗಳನ್ನು ತೆರೆದು ನೋಡಿದರೆ ದೇಶದ ಹಿಂದಿನ ಪ್ರಧಾನಿಗಳು ಜರ್ಮನಿಯ ಐಷಾರಾಮಿ ವಾಹನ ತಯಾರಕ ಸಂಸ್ಥೆಗಳಾದ ಬಿಎಂಡಬ್ಲ್ಯು, ಆಡಿ ಹಾಗೂ ಮರ್ಸಿಡಿಸ್ ಬೆಂಝ್‌ನಂತಹ ದುಬಾರಿ ಕಾರುಗಳನ್ನು ಬಳಸಿಕೊಳ್ಳುತ್ತಿದ್ದರು.

ಆದರೆ ಓರ್ವ ಚಾಯ್‌ವಾಲಾದಿಂದ ಪ್ರಧಾನಿ ಗದ್ದುಗೇರಿರುವ ನರೇಂದ್ರ ಮೋದಿ ಇದುವರೆಗೆ ಸ್ವದೇಶಿ ನಿಲುವನ್ನು ಅನುಸರಿಸಿಕೊಂಡು ಬಂದಿದ್ದಾರೆ. ತಮ್ಮ ನೆಚ್ಚಿನ ಸ್ಕಾರ್ಪಿಯೊವನ್ನೇ ಅಧಿಕೃತ ಕಾರನ್ನಾಗಿ ಬಳಸಿಕೊಳ್ಳುತ್ತಿದ್ದ ಮೋದಿ ವಿದೇಶಿ ಐಷಾರಾಮಿ ಕಾರುಗಳಿಗೆ ಗುಡ್ ಬೈ ಹೇಳಿದ್ದರು.

ಈ ನಡುವೆ ಗಮನಾರ್ಹ ಹೇಳಿಕೆ ಕೊಟ್ಟಿರುವ ಮಹೀಂದ್ರ ಸಂಸ್ಥೆಯ ಮುಖ್ಯಸ್ಥ ಆನಂದ್ ಮಹೀಂದ್ರ ಹೇಳಿಕೆಯು ಹೆಚ್ಚು ಕುತೂಹಲ ಕೆರಳಿಸಿದೆ. "ಇದು ನಮ್ಮ ಹಾಗೂ ಇಡೀ ದೇಶದವರ ಪಾಲಿಗೆ ಅಭಿಮಾನದ ಪ್ರಶ್ನೆಯಾಗಿದ್ದು, ನೂತನ ಪ್ರಧಾನಿ ಭಾರತ ನಿರ್ಮಿತ ಸ್ಕಾರ್ಪಿಯೊ ವಾಹನವನ್ನು ಬಳಕೆ ಮಾಡಬೇಕಾಗಿದೆ" ಎಂದಿದ್ದಾರೆ.

ಇದೇ ಸಂದರ್ಭದಲ್ಲಿ ಪ್ರಧಾನ ಮಂತ್ರಿಯೊಬ್ಬರಿಗೆ ಬೇಕಾಗಿರುವ ಸಕಲ ರೀತಿಯ ಭದ್ರತಾ ನವೀಕರಣಗಳನ್ನು ಸ್ಕಾರ್ಪಿಯೊಗೆ ಮಾಡಿಕೊಡಲಾಗುವುದು ಎಂಬ ಭರವಸೆಯನ್ನು ಆನಂದ್ ಮಹೀಂದ್ರ ನೀಡಿದ್ದಾರೆ.

ಇನ್ನು ಇತಿಹಾಸವನ್ನು ಗಮನಿಸಿದರೆ ದೇಶದ ಪ್ರಧಾನಿಗಳ ಪಾಲಿಗೆ ಅಂಬಾಸಿಡರ್ ಅಧಿಕೃತ ಕಾರೆನಿಸಿಕೊಂಡಿತ್ತು. ಆದರೆ 2003ನೇ ಇಸವಿಯಲ್ಲಿ ಅಟಲ್ ಬಿಹಾರಿ ವಾಜಪೇಯಿ ಮೊದಲ ಬಾರಿಗೆ ಬಿಎಂಡಬ್ಲ್ಯು ಕಾರನ್ನು ಬಳಕೆ ಮಾಡಿದ್ದರು. ಉಗ್ರ ಸಂಘಟನೆಗಳಿಂದ ಬೆದರಿಕಾ ಪ್ರಕರಣಗಳು ಹೆಚ್ಚಿದ್ದರಿಂದ ಕೋಟಿ ಕೋಟಿ ರುಪಾಯಿಗಳನ್ನು ತೆತ್ತು ಗರಿಷ್ಠ ತಂತ್ರಜ್ಞಾನಗಳಗೊಂಡ ಜರ್ಮನಿಯ ಆರ್ಮರ್ಡ್ ವಾಹನಗಳನ್ನು ಆಮದು ಮಾಡುವುದು ಅನಿವಾರ್ಯವೆನಿಸಿತ್ತು.

ಇಂತಹ ಆರ್ಮರ್ಡ್ ಬುಲೆಟ್ ಫ್ರೂಫ್ ವಾಹನಗಳು ಗುಂಡಿನ ದಾಳಿ, ಬಾಂಬ್ ದಾಳಿ ಹಾಗೂ ರಾಸಾಯನಿಕ ದಾಳಿಯಿಂದ ಹಿಡಿದು ಬೃಹತ್ ಸ್ಫೋಟಗಳನ್ನು ಎದುರಿಸುವ ಸಾಮರ್ಥ್ಯ ಹೊಂದಿರುತ್ತದೆ. ಈ ಎಲ್ಲ ವೈಶಿಷ್ಟ್ಯಗಳನ್ನು ಒದಗಿಸಲು ನಮ್ಮಿಂದಲೂ ಸಾಧ್ಯ ಎಂದು ಮಹೀಂದ್ರ ಆಂಡ್ ಮಹೀಂದ್ರ ಸಂಸ್ಥೆಯ ಆಟೋಮೋಟಿವ್ ವಿಭಾಗದ ಅಧ್ಯಕ್ಷರಾಗಿರುವ ಪವನ್ ಗೋನ್ಖಾ ತೊಡೆ ತಟ್ಟಿ ಹೇಳಿಕೆ ಕೊಟ್ಟಿರುವುದು ಇನ್ನಷ್ಟು ಕುತೂಹಲ ಕೆರಳಿಸಿದೆ.

ಒಟ್ಟಿನಲ್ಲಿ ದೇಶದ ನಿಯೋಜಿತ ಪ್ರಧಾನಿ ನರೇಂದ್ರ ಮೋದಿ, ತಮ್ಮ ಸ್ವದೇಶಿ ನಿಲುವಿನಂತೆ ಮಹೀಂದ್ರ ಸ್ಕಾರ್ಪಿಯೊವನ್ನು ಅಪ್‌ಗ್ರೇಡ್ ಮಾಡಲಿದ್ದಾರೆಯೇ ಅಥವಾ ಜರ್ಮನಿಯ ಐಷಾರಾಮಿ ಕಾರುಗಳತ್ತ ಆಕರ್ಷಿತರಾಗಲಿದ್ದಾರೆಯೇ ಎಂಬುದಕ್ಕೆ ಮುಂದಿನ ಕೆಲವೇ ದಿನಗಳಲ್ಲಿ ಉತ್ತರ ಲಭ್ಯವಾಗಲಿದೆ.