ಭಾರತದ ಚೊಚ್ಚಲ ಕ್ರೀಡಾ ಕಾರು ಬಿಡುಗಡೆ; ಬೆಲೆ ಎಷ್ಟು ಗೊತ್ತಾ?

By Nagaraja

Published: Friday, September 25, 2015, 10:01 [IST]

ಭಾರತದ ಚೊಚ್ಚಲ ಕ್ರೀಡಾ ಕಾರೆಂಬ ಗೌರವಕ್ಕೆ ಪಾತ್ರವಾಗಿರುವ ಖ್ಯಾತ ವಿನ್ಯಾಸ ಮಾರ್ಪಾಡು ಸಂಸ್ಥೆ ಡಿಸಿ ಡಿಸೈನ್ ನಿರ್ಮಿಸಿರುವ ಅತಿ ನೂತನ ಅವಂತಿ ಕ್ರೀಡಾ ಕಾರು ದೇಶದಲ್ಲಿ ಭರ್ಜರಿ ಬಿಡುಗಡೆ ಕಂಡಿದೆ.

ಬೆಲೆ ಮಾಹಿತಿ: 35.93 ಲಕ್ಷ ರು. (ಎಕ್ಸ್ ಶೋ ರೂಂ ಪುಣೆ)

ನೀವೆಲ್ಲ ಇದುವರೆಗೆ ಇಟಲಿ ಮೂಲದ ಸೂಪರ್ ಕಾರುಗಳನ್ನು ನೋಡಿರಬಹುದು. ಈಗ ಈ ಸಾಲಿನಲ್ಲಿ ಮೇಡ್ ಇನ್ ಇಂಡಿಯಾ ಹೆಮ್ಮೆಯಿಂದಲೇ ಹೇಳಬಹುದಾದ ಡಿಸಿ ಡಿಸೈನ್ ನಿರ್ಮಿತ ಅವಂತಿ ಮಾರುಕಟ್ಟೆಗೆ ಭರ್ಜರಿ ಎಂಟ್ರಿ ಕೊಟ್ಟಿದೆ.

ಭಾರತದ ಚೊಚ್ಚಲ ಕ್ರೀಡಾ ಕಾರು ಬಿಡುಗಡೆ: ಡಿಸಿ ಅವಂತಿ

ಈ ಸಂದರ್ಭದಲ್ಲಿ ಪ್ರತಿಕ್ರಿಯಿಸಿರುವ ಡಿಸಿ ಡಿಸೈನ್ ಮಾಲಿಕ ಹಾಗೂ ಖ್ಯಾತ ವಿನ್ಯಾಸಗಾರ ದಿಲೀಪ್ ಛಾಬ್ರಿಯಾ, "ದೇಶದ ಯುವ ಮನಸ್ಕರನ್ನು ಗುರಿಯಾಗಿರಿಸಿಕೊಂಡು ಅವಂತಿ ಕ್ರೀಡಾ ಕಾರನ್ನು ತಯಾರಿಸಲಾಗಿದೆ. ಸಂಪೂರ್ಣ ದೇಶಿಯವಾಗಿ ಕಾರನ್ನುಅಭಿವೃದ್ಧಿಪಡಿಸಲು ಸಾಧ್ಯವಾಗಿರುವುದರಲ್ಲಿ ಹೆಮ್ಮೆಯಿದೆ" ಎಂದಿದ್ದಾರೆ.

ಮಾತು ಮುಂದುವರಿಸಿದ ಸಾಮಾನ್ಯವಾಗಿ ಯುವ ಜನಾಂಗ ಕ್ರೀಡಾ ಕಾರನ್ನು ಖರೀದಿ ಮಾಡುವುದು ತುಂಬಾನೇ ಕಷ್ಟ. ಯಾಕೆಂದರೆ ಇವುಗಳು ಕೋಟಿಗಟ್ಟಲೆ ದುಬಾರಿಯೆನಿಸುತ್ತದೆ. ಆದರೆ ಇದೀಗ ಪರಿಸ್ಥಿತಿ ಬದಲಾಗಿದ್ದು, ಡಿಸಿ ಅವಂತಿ ಕಡಿಮೆ ಬೆಲೆಯಲ್ಲಿ ನಿಮ್ಮ ನೆಚ್ಚಿನ ಆಯ್ಕೆಯಾಗಿರಲಿದೆ ಎಂದಿದ್ದಾರೆ.

ಡಿಸಿ ಅವಂತಿಯಲ್ಲಿ ರೆನೊದಿಂದ ಆಮದು ಮಾಡಲಾಗಿರುವ 2.0 ಲೀಟರ್ ಟರ್ಬೊ ಯುರೋ 5 ಮಾನ್ಯತೆಯ ಪೆಟ್ರೋಲ್ ಎಂಜಿನ್ ಆಳವಡಿಸಲಾಗಿದ್ದು, ಸಿಕ್ಸ್ ಸ್ಪೀಡ್ ಮ್ಯಾನುವಲ್ ಗೇರ್ ಬಾಕ್ಸ್ ಇದರಲ್ಲಿರುತ್ತದೆ. ಅಲ್ಲದೆ 340 ತಿರುಗುಬಲದಲ್ಲಿ 250 ಅಶ್ವಶಕ್ತಿ ಉತ್ಪಾದಿಸಲಿದೆ.