ಪರಿಸರ ಸ್ನೇಹಿ ಕಾರುಗಳಿಗೆ ಚೈತನ್ಯ ತುಂಬಲು ಬರುತ್ತಿದೆ ಮಹೀಂದ್ರ ಇ-ವೆರಿಟೊ

2014 ದೆಹಲಿ ಆಟೋ ಎಕ್ಸ್ ಪೋದಲ್ಲಿ ಮೊದಲ ಬಾರಿಗೆ ಪ್ರದರ್ಶನ ಕಂಡಿರುವ ಮಹೀಂದ್ರ ಇ-ವೆರಿಟೊ ಕಳೆದ ವಾಹನ ಪ್ರದರ್ಶನ ಮೇಳದಲ್ಲೂ ತನ್ನ ಸಾನಿಧ್ಯವನ್ನು ಮೆರೆದಿತ್ತು.

ಮಹೀಂದ್ರ ಇ-ವೆರಿಟೊ ವಿದ್ಯುತ್ ಚಾಲಿತ ಸೆಡಾನ್ ಕಾರು ಏಳರಿಂದ ಎಂಟು ಲಕ್ಷ ರು.ಗಳಷ್ಟು ದುಬಾರಿಯೆನಿಸಲಿದೆ. ಇದು ಡಿ2, ಡಿ4 ಮತ್ತು ಡಿ6 ವೆರಿಯಂಟ್ ಗಳಲ್ಲಿ ಬಿಡುಗಡೆಯಾಗಲಿದೆ.

72ವಿ 3 ಫೇಸ್ ಎಸಿ ಇಂಡಕ್ಷನ್ ಮೋಟಾರು ಹೊಂದಲಿರುವ ಮಹೀಂದ್ರ ಇ-ವೆರಿಟೊ 3,500 ಆರ್‌ಪಿಎಂನಲ್ಲಿ ಗರಿಷ್ಠ 41 ಅಶ್ವಶಕ್ತಿಯನ್ನು (30.5 ಕೆಡಬ್ಲ್ಯು) ಉತ್ಪಾದಿಸಲಿದೆ. ಹಾಗೆಯೇ 3000 ಆರ್ ಪಿಎಂ ನಲ್ಲಿ 91 ಎನ್ ಎಂ ತಿರುಗುಬಲ ನೀಡಲಿದೆ.

ಗಂಟೆಗೆ ಗರಿಷ್ಠ 86 ಕೀ.ಮೀ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿರುವ ಮಹೀಂದ್ರ ಇ-ವೆರಿಟೊ ಮುಂಭಾಗದಲ್ಲಿ ಡಿಸ್ಕ್ ಬ್ರೇಕ್ ಮತ್ತು ಹಿಂಭಾಗದಲ್ಲಿ ಡ್ರಮ್ ಬ್ರೇಕ್ ಇರಲಿದೆ.

ಅಂತೆಯೇ 4,277 ಎಂಎಂ ಉದ್ದ, 1740 ಎಂಎಂ ಅಗಲ ಮತ್ತು 1540 ಎಂಎಂ ಎತ್ತರ ಮತ್ತು 2630 ಎಂಎಂ ಚಕ್ರಾಂತರವನ್ನು ಹೊಂದಿರಲಿದೆ.

ಇನ್ನುಳಿದಂತೆ 185/70 ಆರ್14 ಟ್ಯೂಬ್ ಲೆಸ್ ಚಕ್ರ, ರೂಫ್ ರೈಲ್, 10 ಸ್ಪೋಕ್ ಅಲಾಯ್ ವೀಲ್, ಕ್ರೋಮ್ ಗ್ರಿಲ್ ಪ್ರಮುಖ ಆಕರ್ಷಣೆಯಾಗಿರಲಿದೆ.

ಎಂಟು ತಾಸಿನಲ್ಲಿ ಸಂಪೂರ್ಣವಾಗಿ ಚಾರ್ಜ್ ಮಾಡಿಸಬಹುದಾದ ಮಹೀಂದ್ರ ಇ-ವೆರಿಟೊ ಏಕ ಮಾತ್ರ ಚಾರ್ಜ್ ನಲ್ಲಿ 100 ಕೀ.ಮೀ. ವ್ಯಾಪ್ತಿಯ ವರೆಗೂ ಸಾಗಬಹುದಾಗಿದೆ.

ಅದೇ ಹೊತ್ತಿಗೆ ಶಿಪ್ರವಾಗಿ ಚಾರ್ಜ್ ಮಾಡಿಸಬಹುದಾದ ಟಾಪ್ ಎಂಡ್ ಡಿ6 ವೆರಿಯಂಟ್ ಆರು ತಾಸಿನಲ್ಲೇ ಸಂಪೂರ್ಣವಾಗಿ ಚಾರ್ಜ್ ಆಗಲಿದೆ.

ಕೇಂದ್ರ ಸರಕಾರದ ಫೇಮ್ (Faster Adoption & Manufacturing of Electric vehicles) ಯೋಜನೆಯಡಿಯಲ್ಲಿ ಪ್ರಯೋಜನ ಗಿಟ್ಟಿಸಿಕೊಳ್ಳಲು ಸಾಧ್ಯತೆಯಿರುವ ಪರಿಸರ ಸ್ನೇಹಿ ಮಹೀಂದ್ರ ಇ-ವೆರಿಟೊ ವಿದ್ಯುತ್ ಚಾಲಿತ ಕಾರನ್ನು ಸ್ಪರ್ಧಾತ್ಮಕ ಬೆಲೆಗಳಲ್ಲಿ ಬಿಡುಗಡೆ ಮಾಡಲು ಸಾಧ್ಯವಾಗಲಿದೆ.