ಮಹೀಂದ್ರ ಇ ವೆರಿಟೊ ವಿದ್ಯುತ್ ಚಾಲಿತ ಕಾರು ಭರ್ಜರಿ ಬಿಡುಗಡೆ

By Nagaraja

Published: Thursday, June 2, 2016, 17:25 [IST]

ಭಾರತೀಯ ಮುಂಚೂಣಿಯ ವಾಹನ ತಯಾರಿಕ ಸಂಸ್ಥೆ ಮಹೀಂದ್ರ ಆಂಡ್ ಮಹೀಂದ್ರ, ಅತಿ ನೂತನ ಇ ವೆರಿಟೊ ವಿದ್ಯುತ್ ಚಾಲಿತ ಕಾರನ್ನು ಭರ್ಜರಿಯಾಗಿ ಬಿಡುಗಡೆಗೊಳಿಸಿದೆ. ಇದು ಪರಿಸರ ಸ್ನೇಹಿ ವಾಹನಗಳ ಹುಡುಕಾಟದಲ್ಲಿರುವ ವಾಹನ ಜಗತ್ತಿಗೆ ಮಹೀಂದ್ರ ನೀಡುತ್ತಿರುವ ಕೊಡುಗೆಯಾಗಿರಲಿದೆ.

ಮೂರು ವೆರಿಯಂಟ್ ಗಳಲ್ಲಿ ಲಭ್ಯವಾಗಲಿರುವ ಮಹೀಂದ್ರ ಇ ವೆರಿಟೊ ಎಲೆಕ್ಟ್ರಿಕ್ ಕಾರಿನ ದೆಹಲಿ ಎಕ್ಸ್ ಶೋರೂಂ ಪ್ರಾರಂಭಿಕ ಬೆಲೆ 9.50 ಲಕ್ಷ ರು.ಗಳಾಗಿದ್ದು, ಟಾಪ್ ಎಂಡ್ 10 ಲಕ್ಷ ರು.ಗಳಷ್ಟು ದುಬಾರಿಯೆನಿಸಲಿದೆ.

ವೆರಿಯಂಟ್, ಬೆಲೆ ಮಾಹಿತಿ (ಎಕ್ಸ್ ಶೋ ರೂಂ ದೆಹಲಿ)

ಡಿ2: 9.50 ಲಕ್ಷ ರು.
ಡಿ4: 9.75 ಲಕ್ಷ ರು.
ಡಿ6: 10 ಲಕ್ಷ ರು.

ಮಹೀಂದ್ರ ಇ ವೆರಿಟೊ ವಿದ್ಯುತ್ ಚಾಲಿತ ಕಾರು ಭರ್ಜರಿ ಬಿಡುಗಡೆ

ದೆಹಲಿ, ಮುಂಬೈ ಸೇರಿದಂತೆ ಬೆಂಗಳೂರು, ಕೋಲ್ಕತ್ತಾ, ಚಂಡೀಗಡ, ಹೈದರಾಬಾದ್, ಜೈಪುರ, ನಾಗ್ಪುರಗಳಂತಹ ನಗರಗಳನ್ನು ತಲುಪಿರುವ ಮಹೀಂದ್ರ ಇ ವೆರಿಟೊ ಕ್ರಮೇಣ ಇತರ ನಗರಗಳಿಗೂ ವಿಸ್ತರಿಸಲಿದೆ.

ಕೇವಲ 1.45 ನಿಮಿಷಗಳಲ್ಲಿ ಶೇಕಡಾ 80ರಷ್ಟು ತ್ವರಿತ ಚಾರ್ಜ್ ಮಾಡಿಸಬಹುದಾದ ಮಹೀಂದ್ರ ಇ ವೆರಿಟೊ ಸಂಪೂರ್ಣವಾಗಿ ಚಾರ್ಜ್ ಮಾಡಿಸಿದಾಗ 110 ಕೀ.ಮೀ. ವರೆಗೆ ಸಾಗಬಹುದಾಗಿದೆ.

ಮಹೀಂದ್ರ ಇ ವೆರಿಟೊ ಪರಿಸರ ಸ್ನೇಹಿ ಕಾರಿನಲ್ಲಿ ಒಂದು ಕೀ.ಮೀ. ದೂರ ಚಲಿಸಲು ತಗಲುವ ಖರ್ಚು 1.15 ರುಪಾಯಿ ಮಾತ್ರವಾಗಿದೆ.

ಭಾರತೀಯ ಸರಕಾರದ ಫೇಮ್ (Faster Adoption & Manufacturing of Electric vehicles) ಯೋಜನೆಯಡಿಯಲ್ಲಿ ಗುರುತಿಸಿಕೊಂಡಿರುವ ಇ ವೆರಿಟೊ ಸ್ಪರ್ಧಾತ್ಮಕ ಬೆಲೆ ಕಾಪಾಡಿಕೊಳ್ಳಲು ನೆರವಾಗಿದೆ.

ಸಂಪೂರ್ಣ ಮಾಲಿನ್ಯ ಮುಕ್ತವಾಗಿರುವ ಇ ವೆರಿಟೊದಲ್ಲಿ ರಿಜನರೇಟಿವ್ ಬ್ರೇಕಿಂಗ್ ತಂತ್ರಜ್ಞಾನವನ್ನು ಆಳವಡಿಸಲಾಗಿದೆ. ಇದರಂತೆ ಪ್ರತಿಯೊಂದು ಬಾರಿಯೂ ಬ್ರೇಕ್ ಅದುಮಿದಾಗ ಮೋಟಾರ್ ಗೆ ಚೈತ್ಯನ್ಯ ತುಂಬಲಿದೆ.

ಟೆಲಿಮ್ಯಾಟಿಕ್ಸ್ ತಂತ್ರಗಾರಿಕೆಯ ನೆರವಿನಿಂದ ಇ ವೆರಿಟೊ ನಿರ್ವಹಣೆಗೆ ಸಂಬಂಧಪಟ್ಟಂತೆ ಪ್ರತಿ ತಿಂಗಳ ಮಾನದಂಡಗಳು ಗ್ರಾಹಕರಿಗೆ ಲಭ್ಯವಾಗಲಿದೆ. ಈ ಮೂಲಕ ಚಾಲನೆಗೆ ಸಂಬಂಧಪಟ್ಟಂತೆ ನಿಖರವಾದ ಮಾಹಿತಿಯನ್ನು ಕಲೆ ಹಾಕಬಹುದಾಗಿದೆ.

ಜಗತ್ತಿನಲ್ಲಿ ಮೊದಲ ಬಾರಿಗೆ ಮಹೀಂದ್ರ ಇ ವೆರಿಟೊ ಕಾರಿನಲ್ಲಿ ರಿವೈವ್ ತಂತ್ರಜ್ಞಾನವನ್ನು ಆಳವಡಿಸಲಾಗಿದ್ದು, ತನ್ಮೂಲಕ ಕಡಿಮೆ ಚೈತನ್ಯದಲ್ಲಿ ಕಾರು ಸಂಚರಿಸುತ್ತಿದ್ದಲ್ಲಿ, ರಿವೈವ್ ಸಕ್ರಿಯವಾಗಲಿರುವುದರಿಂದ ಹೆಚ್ಚುವರಿ 8 ಕೀ.ಮೀ. ವರೆಗೆ ಸಾಗಬಹುದಾಗಿದೆ. ಈ ಮೂಲಕ ಹತ್ತಿರದ ಚಾರ್ಜಿಂಗ್ ಪಾಯಿಂಟ್ ವರೆಗೆ ತೆರಳಲು ಸಹಕಾರಿಯಾಗಲಿದೆ.

ಇದರಲ್ಲಿರುವ ಡೈರಕ್ಟ್ ಡ್ರೈವ್ ಗೇರ್ ಬಾಕ್ಸ್ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ನಂತೆ ಕೆಲಸ ಮಾಡಲಿದ್ದು, ಆರಾಮದಾಯಕ ಚಾಲನೆಯನ್ನು ಖಾತ್ರಿಪಡಿಸಲಿದೆ.

ಮಹೀಂದ್ರ ಇ ವೆರಿಟೊ ಕಾರನ್ನು ಮನೆಯಲ್ಲೂ ಮೊಬೈಲ್ ಚಾರ್ಜ್ ಮಾಡಿಸುವಷ್ಟು ಸುಲಭವಾಗಿ ಚಾರ್ಜ್ ಮಾಡಿಸಬಹುದಾಗಿದೆ. ಇಂದು ಸಂಪೂರ್ಣವಾಗಿ ಚಾರ್ಜ್ ಆಗಲು ಎಂಟು ತಾಸು 45 ನಿಮಿಷಗಳಷ್ಟು ಸಮಯ ತಗುಲಲಿದೆ.