ಭಾರತಕ್ಕೆ ಮರಳಿ ಬರುತ್ತಿದೆ ಐಕಾನಿಕ್ 'ಹೋಂಡಾ ಸಿವಿಕ್'

ವಿನ್ಯಾಸ

ನೂತನ ಹೋಂಡಾ ಸಿವಿಕ್ ಕಾರಿನಲ್ಲಿ ನಯವಾಗಿಯೂ ನುಣುಪಾಗಿಯೂ ಹಾಗೂ ಹೊಳಪಗಾಗಿರುವ ವಿನ್ಯಾಸ ತಂತ್ರಗಾರಿಕೆಯನ್ನು ಅನುಸರಿಸಲಾಗಿದೆ. ಮುಂಭಾಗದಿಂದ ಹಿಡಿದು ಕಾರಿನೆಲ್ಲ ರಚನೆಯಲ್ಲೂ ಕ್ರೀಡಾತ್ಮಕ ವಿನ್ಯಾಸಕ್ಕೆ ಆಸ್ಪದ ಕೊಡಲಾಗಿದೆ. ಒಟ್ಟಾರೆಯಾಗಿ 10ನೇ ತಲೆಮಾರಿನ ಹೋಂಡಾ ಸಿವಿಕ್ ಕಾರು ಹೆಚ್ಚು ಕೂಪೆ ಶೈಲಿಯನ್ನು ಆವರಿಸಿಕೊಳ್ಳಲಿದೆ.

10ನೇ ತಲೆಮಾರಿನ ಸಿವಿಕ್

ಎಂಟನೇ ತಲೆಮಾರಿನ ಹೋಂಡಾ ಸಿವಿಕ್ ಕಾರನ್ನು ಭಾರತದಲ್ಲಿ ಬಿಡುಗಡೆಗೊಳಿಸಿತ್ತಾದರೂ 2013ನೇ ಸಾಲಿನಲ್ಲಿ ಹಿಂದಕ್ಕೆ ಪಡೆಯಲಾಗಿತ್ತು. ಈಗ 10ನೇ ತಲೆಮಾರಿನ ಸಿವಿಕ್ ಕಾರು ಜಾಗತಿಕ ಮಾರುಕಟ್ಟೆಯನ್ನು ತಲುಪಿರುವಂತೆಯೇ ಪೆಟ್ರೋಲ್ ಸೇರಿದಂತೆ ಡೀಸೆಲ್ ಆವೃತ್ತಿಯಲ್ಲೂ ಮೋಡಿ ಮಾಡುವ ಇರಾದೆಯನ್ನು ಹೋಂಡಾ ಹೊಂದಿದೆ.

ಎಂಜಿನ್ ತಾಂತ್ರಿಕತೆ

ನೂತನ ಹೋಂಡಾ ಸಿವಿಕ್ ಪೆಟ್ರೋಲ್ ಹಾಗೂ ಡೀಸೆಲ್ ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಾಗಲಿದೆ. ಇದರ 1.8 ಲೀಟರ್ ಪೆಟ್ರೋಲ್ ಮತ್ತು 1.6 ಲೀಟರ್ ಡೀಸೆಲ್ ಎಂಜಿನ್ ಗಳು ಅನುಕ್ರಮವಾಗಿ 143 ಹಾಗೂ 120 ಅಶ್ವಶಕ್ತಿಗಳನ್ನು ಉತ್ಪಾದಿಸಲಿದೆ. ಇವೆಲ್ಲದರ ಜೊತೆಗೆ 175 ಅಶ್ವಶಕ್ತಿ ಉತ್ಪಾದಿಸಬಲ್ಲ ಹೆಚ್ಚು ಶಕ್ತಿಶಾಲಿ 1.5 ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಜೋಡಣೆಯಾಗುವ ಸಾಧ್ಯತೆಯು ಇದೆ.

ಸುಧಾರಿತ ಚಾಸೀ

ನೂತನ ಸಿವಿಕ್ ಕಾರಿನಲ್ಲಿ ಅಲ್ಟ್ರಾ ಹೈ ಸ್ಟ್ರೆಂಗ್ತ್ ಸ್ಟೀಲ್ ಜೋಡಣೆ ಮಾಡಲಾಗುತ್ತಿದ್ದು, ಇದು ಹೆಚ್ಚು ಬಿಗಿತ ಹಾಗೂ ಹ್ಯಾಂಡ್ಲಿಂಗ್ ನೀಡುವುದರೊಂದಿಗೆ, ಗರಿಷ್ಠ ನಿರ್ವಹಣೆಯನ್ನು ಕಾಪಾಡಿಕೊಳ್ಳಲು ನೆರವಾಗಲಿದೆ.

ಪ್ರತಿಸ್ಪರ್ಧಿ

ನೂತನ ಹೋಂಡಾ ಸಿವಿಕ್ ಪ್ರಮುಖವಾಗಿಯೂ ಟೊಯೊಟಾ ಕರೊಲ್ಲಾ, ಸ್ಕೋಡಾ ಒಕ್ಟಾವಿಯಾ, ಫೋಕ್ಸ್ ವ್ಯಾಗನ್ ಜೆಟ್ಟಾ ಮತ್ತು ಇನ್ನಷ್ಟೇ ಬಿಡುಗಡೆಯಾಗಲಿರುವ ಹ್ಯುಂಡೈ ಎಲಂಟ್ರಾ ಮತ್ತು ಷೆವರ್ಲೆ ಕ್ರೂಝ್ ಮಾದರಿಗಳಿಗೆ ಪ್ರತಿಸ್ಪರ್ಧಿಯಾಗಲಿದೆ.

ಅಂದಾಜು ಬೆಲೆ

ಅಂದ ಹಾಗೆ ಹೊಸ ತಲೆಮಾರಿನ ಹೋಂಡಾ ಸಿವಿಕ್ ದೇಶದಲ್ಲಿ 15 ಲಕ್ಷ ರು.ಗಳಿಂದ 18 ಲಕ್ಷ ರು.ಗಳಷ್ಟು ದುಬಾರಿಯೆನಿಸಿಕೊಳ್ಳುವ ಸಾಧ್ಯತೆಯಿದೆ.