ರೆನೊ ಕ್ವಿಡ್ ಅವಿಶ್ವಸನೀಯ ಸಾಧನೆ; ಏನದು ಗೊತ್ತಾ?

By Nagaraja

Published: Monday, January 18, 2016, 18:11 [IST]

ಕಳೆದ ವರ್ಷದಲ್ಲಿ ಭಾರತಕ್ಕೆ ಕಾಲಿರಿಸಿರುವ ಅತಿ ನೂತನ ರೆನೊ ಕ್ವಿಡ್ ಮಗದೊಂದು ಸಾಧನೆಯ ಮೈಲುಗಲ್ಲುನ್ನು ದಾಟಿದೆ. ಅದೇನೆಂದರೆ 2015 ಸೆಪ್ಟೆಂಬರ್ ತಿಂಗಳಲ್ಲಿ ಬಿಡುಗಡೆಯಾಗಿರುವ ಈ ಪುಟ್ಟ ಕಾರೀಗ 85,000ಕ್ಕೂ ಹೆಚ್ಚು ಮುಂಗಡ ಬುಕ್ಕಿಂಗ್ಸ್ ಗಳನ್ನು ದಾಖಲಿಸಿಕೊಂಡಿದೆ.

Also Read: ರೆನೊ ಕ್ವಿಡ್ ಚಾಲನಾ ವಿಮರ್ಶೆ; ಪುಟ್ಟ ಕಾರಿನ ಹಿರಿಮೆ!

ಪ್ರಮುಖವಾಗಿಯೂ ಮಾರುತಿ ಆಲ್ಟೊ ಪ್ರತಿಸ್ಪರ್ಧಿಯಾಗಿ ಮಾರುಕಟ್ಟೆಗೆ ಎಂಟ್ರಿ ಕೊಟ್ಟಿರುವ ರೆನೊ ಕ್ವಿಡ್ ಹ್ಯಾಚ್ ಬ್ಯಾಕ್ ಮಾಡಿರುವ ಸಾಧನೆ ನಿಜಕ್ಕೂ ಶ್ಲಾಘನೀಯ.

85,000 ಬುಕ್ಕಿಂಗ್ ಸಂಖ್ಯೆ ದಾಟಿದ ರೆನೊ ಕ್ವಿಡ್

ಬಿಡುಗಡೆಯಾದ ಒಂದು ವಾರದಲ್ಲೇ 25,000ಕ್ಕೂ ಹೆಚ್ಚು ಬುಕ್ಕಿಂಗ್ ದಾಖಲಿಸಿಕೊಂಡಿರುವ ರೆನೊ ಕ್ವಿಡ್ ಈಗ ನಾಲ್ಕು ತಿಂಗಳೊಳಗೆ 85,000ಕ್ಕೂ ಹೆಚ್ಚು ವಾಹನ ಪ್ರೇಮಿಗಳನ್ನು ಆಕರ್ಷಿಸುವಲ್ಲಿ ಯಶ ಕಂಡಿದೆ.

ಈ ನಡುವೆ 2016 ವರ್ಷಾರಂಭದಲ್ಲಿ ರೆನೊ ಕ್ವಿಡ್ ಬೆಲೆಯಲ್ಲಿ ಕೊಂಚ ಏರಿಕೆಯಾಗಿತ್ತು. ನಿರ್ಮಾಣ ವೆಚ್ಚ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ 3,000 ರು.ಗಳಷ್ಟು ಬೆಲೆ ಏರಿಕೆಗೊಳಿಸಲು ಫ್ರಾನ್ಸ್ ತಳಹದಿಯ ರೆನೊ ಸಂಸ್ಥೆ ನಿರ್ಧರಿಸಿತ್ತು.

ಇನ್ನೊಂದೆಡೆ ಬೇಡಿಕೆ ಗಣನೀಯವಾಗಿ ವರ್ಧನೆಯಾಗಿರುವ ಬೆನ್ನಲ್ಲೇ ರೆನೊ ಕ್ವಿಡ್ ಕಾಯುವಿಕೆ ಅವಧಿಯು ಆರು ತಿಂಗಳಷ್ಟು ಕಾಲ ವಿಸ್ತರಿಸಿತ್ತು. ಚೆನ್ನೈದ್ಯಾಂತ ಸುರಿದ ಭಾರಿ ಮಳೆಯಿಂದಾಗಿ ಪ್ರವಾಹದ ಸ್ಥಿತಿಯುಂಟಾಗಿರುವುವುದು ನಿರ್ಮಾಣಕ್ಕೆ ಅಡ್ಡಿಯನ್ನುಂಟು ಮಾಡಿತ್ತು.

ನಿಸ್ಸಾನ್ ಹಾಗೂ ರೆನೊ ಸಂಸ್ಥೆಯು ಜಂಟಿಯಾದ ಸಿಎಂಎಂಫ್ (ಕಾಮನ್ ಮೊಡ್ಯುಲ್ ಫ್ಯಾಮಿಲಿ) ತಳಹದಿಯಲ್ಲಿ ಇದು ಅಭಿವೃದ್ಧಿಗೊಂಡಿದೆ. ಮುಂಬರುವ ರೆನೊ-ನಿಸ್ಸಾನ್ ಬಜೆಟ್ ಕಾರುಗಳಿಗೆ ವೇದಿಕೆಯಾಗಲಿದೆ.