ಕರೋನಾ ವೈರಸ್ ವಿರುದ್ಧ ಹೋರಾಡಲು ರೂ.50 ಕೋಟಿ ದೇಣಿಗೆ ನೀಡಿದ ಐಷರ್

ಉಳಿದ ವಾಹನ ಕಂಪನಿಗಳು ಕರೋನಾ ವೈರಸ್ ಹರಡದಂತೆ ತಡೆಗಟ್ಟಲು ಹಣಕಾಸಿನ ನೆರವು ಹಾಗೂ ಇತರ ಸಹಾಯವನ್ನು ನೀಡುತ್ತಿವೆ. ಈಗ ಜನಪ್ರಿಯ ವಾಹನ ತಯಾರಕ ಕಂಪನಿಯಾದ ಐಷರ್ ಗ್ರೂಪ್ ಕರೋನಾ ವಿರುದ್ಧ ಹೋರಾಡಲು ರೂ.50 ಕೋಟಿ ನೀಡಿದೆ.

ಈ ಹಣವನ್ನು ವೈದ್ಯಕೀಯ ಉಪಕರಣಗಳು ಹಾಗೂ ಚಿಕಿತ್ಸಾ ಕೇಂದ್ರಗಳಿಗಾಗಿ ಬಳಸಲಾಗುವುದು. ಸಂಕಷ್ಟದ ಈ ಸಮಯದಲ್ಲಿ ಈ ಹಣಕಾಸಿನ ನೆರವಿನಿಂದ ಹೆಚ್ಚು ಅನುಕೂಲವಾಗಲಿದೆ.

ಮುಂಬರುವ ದಿನಗಳಲ್ಲಿ ಕರೋನಾ ವಿರುದ್ಧ ಹೋರಾಡಲು ಇನ್ನೂ ಹೆಚ್ಚಿನ ಹಣಕಾಸಿನ ನೆರವನ್ನು ಒದಗಿಸುವುದಾಗಿ ಐಷರ್ ಗ್ರೂಪ್ ಹೇಳಿದೆ. ಕರೋನಾದಿಂದ ಉಂಟಾಗುವ ಪರಿಣಾಮಗಳಿಂದ ಚೇತರಿಸಿಕೊಳ್ಳಲು ದೀರ್ಘಾವಧಿಯ ಪುನರ್ ರಚನೆ ಯೋಜನೆಗಳಿಗೆ ಸಹಕರಿಸುವುದಾಗಿ ಐಷರ್ ಹೇಳಿದೆ.

ಬಡ ಜನರಿಗೆ ಹಾಗೂ ಕೂಲಿ ಕಾರ್ಮಿಕರಿಗೆ ಆಹಾರ ಹಾಗೂ ದಿನಸಿ ಸಾಮಗ್ರಿಗಳನ್ನು ಒದಗಿಸುವುದರ ಬಗ್ಗೆ ಹೆಚ್ಚು ಗಮನ ಹರಿಸುವುದಾಗಿ ಐಷರ್ ಗ್ರೂಪ್ ಹೇಳಿದೆ. ಈ ಹಣವನ್ನು ಸೋಂಕುನಿವಾರಕ ಹಾಗೂ ಸ್ವಚ್ವಗೊಳಿಸುವ ಕಾರ್ಯಾಚರಣೆಗಳಿಗೆ ಸಹ ಬಳಸಲಾಗುವುದು.

ಕರೋನಾದಿಂದ ಪೀಡಿತವಾಗಿರುವ ಪ್ರದೇಶಗಳ ಜನರಿಗೆ ವೈದ್ಯಕೀಯ ಆರೈಕೆಯನ್ನು ನೀಡಲು ಐಷರ್ ಕಂಪನಿಯು ಮುಂದಾಗಿದೆ. ಚೆನ್ನೈನಲ್ಲಿರುವ ಆಸ್ಪತ್ರೆಗಳಿಗೆ ಅಗತ್ಯವಾಗಿರುವ ಉಪಕರಣಗಳನ್ನು ಖರೀದಿಸಲು ನಿರ್ಧರಿಸಿದೆ.

ತನ್ನ ಕಂಪನಿಯ ನೌಕರರ ಪರವಾಗಿ ಪ್ರಧಾನ ಮಂತ್ರಿಗಳ ಪರಿಹಾರ ನಿಧಿಗೆ ಹಣಕಾಸಿನ ನೆರವನ್ನು ನೀಡುತ್ತಿರುವುದಾಗಿ ಐಷರ್ ಕಂಪನಿ ಹೇಳಿದೆ.

ಐಷರ್ ಕಂಪನಿಯು ತನ್ನ ಕಂಪನಿಯ ವತಿಯಿಂದ ಕರೋನಾ ಸಂತ್ರಸ್ತರಿಗೆ ತಜ್ಞ ವೈದ್ಯಕೀಯ ಕೇಂದ್ರ, ಕ್ವಾರಂಟೈನ್ ಸೆಂಟರ್ ಹಾಗೂ ರೋಗಿಗಳ ಆರೈಕೆಗಾಗಿ ಸೇವೆಗಳನ್ನು ಒದಗಿಸಲಿದೆ.

ಐಷರ್ ಗ್ರೂಪ್ ಅಡಿಯಲ್ಲಿ ಎರಡು ವಾಹನ ತಯಾರಕ ಕಂಪನಿಗಳು ಕಾರ್ಯನಿರ್ವಹಿಸುತ್ತಿವೆ. ರಾಯಲ್ ಎನ್ ಫೀಲ್ಡ್ ಹಾಗೂ ವೋಲ್ವೋ ಕಂಪನಿಗಳು ಐಷರ್ ಕಂಪನಿಯಡಿಯಲ್ಲಿ ಕಾರ್ಯ ನಿರ್ವಹಿಸುತ್ತವೆ. ಐಷರ್ ಕಂಪನಿಯು ಚೆನ್ನೈನಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿದೆ.