ಆಟೋ ಎಕ್ಸ್‌ಪೋ 2020: ಬಿಡುಗಡೆಯಾಗಲಿದೆ ಮರ್ಸಿಡಿಸ್ ಬೆಂಝ್ ವಿ ಕ್ಲಾಸ್ ಮಾರ್ಕೊ ಪೊಲೊ

ಮರ್ಸಿಡಿಸ್ ಬೆಂಝ್ ಕಂಪನಿಯು ಮಾರ್ಕೊ ಪೊಲೊ ಕ್ಯಾಂಪರ್ ಕಾರ್ ಅನ್ನು ದೇಶಿಯ ಮಾರುಕಟ್ಟೆಯಲ್ಲಿ ಬಿಡುಗಡೆಗೊಳಿಸಲು ಸಜ್ಜಾಗಿದೆ. ಈ ಕಾರ್ ಅನ್ನು ಫೆಬ್ರವರಿ ತಿಂಗಳಿನಲ್ಲಿ ದೆಹಲಿಯಲ್ಲಿ ನಡೆಯಲಿರುವ 2020ರ ಆಟೋ ಎಕ್ಸ್ ಪೋದಲ್ಲಿ ಬಿಡುಗಡೆಗೊಳಿಸಲಾಗುವುದು.

ಮರ್ಸಿಡಿಸ್ ಬೆಂಝ್ ಕಂಪನಿಯು ಈ ಕಾರ್ ಅನ್ನು ಮೊಬೈಲ್ ಮಿನಿ ಹೋಂ ಎಂದು ಕರೆಯುತ್ತದೆ. ಇದರಿಂದಾಗಿ ಕಂಪನಿಯು ಈ ಕಾರಿನಲ್ಲಿ ಮನೆಯಲ್ಲಿರುವಂತಹ ಸೌಕರ್ಯಗಳನ್ನು ನೀಡುವುದು ತಿಳಿದು ಬರುತ್ತದೆ.

ಈ ಕಾರಿನ ಹಿಂಭಾಗದಲ್ಲಿರುವ ಸೀಟ್ ಅನ್ನು ಬೆಡ್‍‍ನಂತೆ ಮಡಚಬಹುದಾಗಿದೆ. ಈ ಕಾರಿನ ಮುಂಭಾಗದಲ್ಲಿರುವ ಸೀಟುಗಳನ್ನು ಹಿಂದಕ್ಕೆ ಎಳೆಯಬಹುದು. ಈ ಕಾರು ಚಿಕ್ಕ ಗಾತ್ರದ ಕಿಚನ್, ಫೋಲ್ಡಿಂಗ್ ಟೇಬಲ್‍‍ಗಳನ್ನು ಹೊಂದಿದೆ.

ಸಾಮಗ್ರಿಗಳನ್ನು ತುಂಬಿಡಲು ಈ ಕಾರಿನಲ್ಲಿ ಚಿಕ್ಕ ವಾರ್ಡ್‍‍ರೋಬ್ ಸಹ ನೀಡಲಾಗಿದೆ. ಇದರ ಜೊತೆಗೆ ಮರ್ಸಿಡಿಸ್ ಬೆಂಝ್ ಕಂಪನಿಯು ಈ ಕಾರಿನಲ್ಲಿ ಹಲವಾರು ಹೆಚ್ಚುವರಿ ಆಕ್ಸೆಸರೀಸ್‍‍ಗಳನ್ನು ಸಹ ನೀಡಲಿದೆ.

ಈ ಕಾರ್ ಅನ್ನು ವಿಶ್ರಾಂತಿ ಪಡೆಯುವ ಉದ್ದೇಶಕ್ಕಾಗಿಯೂ ಅಭಿವೃದ್ಧಿಪಡಿಸಲಾಗಿದ್ದು, ದೂರ ಸಂಚಾರ ಮಾಡುವವರು ಹಾಗೂ ಸಾಹಸ ಪ್ರಿಯರು ಈ ಕಾರ್ ಅನ್ನು ಬಳಸಿ ತಮ್ಮ ರಾತ್ರಿ ವೇಳೆಯನ್ನು ಈ ಕಾರಿನಲ್ಲಿಯೇ ಕಳೆಯಬಹುದಾಗಿದೆ.

ಈ ಕಾರಿನಲ್ಲಿ ವಿ ಕ್ಲಾಸ್ ಕಾರಿನಲ್ಲಿರುವಂತಹ 2.0 ಲೀಟರಿನ ಡೀಸೆಲ್ ಎಂಜಿನ್ ಅಳವಡಿಸಲಾಗಿದೆ. ಈ ಎಂಜಿನ್ 161 ಬಿ‍‍ಹೆಚ್‍‍‍ಪಿ ಪವರ್ ಹಾಗೂ 380 ಎನ್‍ಎಂ ಟಾರ್ಕ್ ಉತ್ಪಾದಿಸುತ್ತದೆ. ಈ ಎಂಜಿನ್‍‍ನಲ್ಲಿ 9 ಸ್ಪೀಡಿನ ಆಟೋಮ್ಯಾಟಿಕ್ ಗೇರ್‍‍ಬಾಕ್ಸ್ ಅಳವಡಿಸಲಾಗಿದೆ.

ಟೊಯೊಟಾ ಕಂಪನಿಯು ತನ್ನ ವೆಲ್‍‍ಫೈರ್ ಲಗ್ಷುರಿ ಎಂಪಿವಿಯನ್ನು ಬಿಡುಗಡೆಗೊಳಿಸಿದ ನಂತರ ಮರ್ಸಿಡಿಸ್ ಬೆಂಝ್ ತನ್ನ ವಿ-ಕ್ಲಾಸ್ ಸರಣಿಯಲ್ಲಿರುವ ಎಲ್ಲಾ ಮಾದರಿಯ ಕಾರುಗಳನ್ನು ಬಿಡುಗಡೆಗೊಳಿಸುತ್ತಿದೆ.

ಆಟೋ ಎಕ್ಸ್ ಪೋದಲ್ಲಿ ಬಿಡುಗಡೆಯಾಗಲಿರುವ ಲಗ್ಷುರಿ ಕ್ಯಾಂಪರ್, ಕಾರು ಪ್ರಿಯರ ನಿರೀಕ್ಷೆಯನ್ನು ಪೂರ್ತಿಗೊಳಿಸುವ ಸಾಧ್ಯತೆಗಳಿವೆ. ಈ ಕಾರಿನ ಜೊತೆಗೆ ಮರ್ಸಿಡಿಸ್ ಬೆಂಝ್ ಆಟೋ ಎಕ್ಸ್ ಪೋದಲ್ಲಿ ಇನ್ನೂ ಹಲವಾರು ಕಾರುಗಳನ್ನು ಬಿಡುಗಡೆಗೊಳಿಸಲಿದೆ.