ಜೂನ್ ತಿಂಗಳಿನಲ್ಲಿ ಏರಿಕೆ ಕಂಡ ಕಾರುಗಳ ರಫ್ತು ಪ್ರಮಾಣ

2021ರ ಜೂನ್‌ ತಿಂಗಳಿನಲ್ಲಿ ಭಾರತದಿಂದ ಒಟ್ಟು 52,935 ಯುನಿಟ್ ಕಾರುಗಳನ್ನು ರಫ್ತು ಮಾಡಲಾಗಿದೆ. 2020ರ ಜೂನ್ ತಿಂಗಳಿನಲ್ಲಿ ಭಾರತದಿಂದ ಒಟ್ಟು 24,561 ಯುನಿಟ್ ಕಾರುಗಳನ್ನು ರಫ್ತು ಮಾಡಲಾಗಿತ್ತು. ಈ ಪಟ್ಟಿಯಲ್ಲಿರುವ ಹೆಚ್ಚಿನ ಕಾರುಗಳು ಹ್ಯುಂಡೈ ಹಾಗೂ ಮಾರುತಿ ಸುಜುಕಿ ಕಂಪನಿಗೆ ಸೇರಿವೆ.

ಈ ಟಾಪ್ 10 ಪಟ್ಟಿಯಲ್ಲಿ ಹ್ಯುಂಡೈ ಕಂಪನಿಯ ನಾಲ್ಕು ಕಾರುಗಳಿದ್ದರೆ, ಮಾರುತಿ ಸುಜುಕಿ ಕಂಪನಿಯ ಮೂರು ಕಾರುಗಳಿವೆ. ಇವುಗಳ ಜೊತೆಗೆ ನಿಸ್ಸಾನ್, ಫೋಕ್ಸ್‌ವ್ಯಾಗನ್ ಹಾಗೂ ಕಿಯಾ ಮೋಟಾರ್ಸ್‌ ಕಂಪನಿಯ ತಲಾ ಒಂದು ಕಾರುಗಳು ಈ ಪಟ್ಟಿಯಲ್ಲಿವೆ.

ಈ ಪಟ್ಟಿಯಲ್ಲಿ ನಿಸ್ಸಾನ್‌ ಕಂಪನಿಯ ಸನ್ನಿ ಸೆಡಾನ್ ಕಾರು ಮೊದಲ ಸ್ಥಾನದಲ್ಲಿದೆ. ಕಳೆದ ತಿಂಗಳು ಸನ್ನಿ ಸೆಡಾನ್ ಕಾರಿನ ಒಟ್ಟು 4,310 ಯುನಿಟ್‌ಗಳನ್ನು ರಫ್ತು ಮಾಡಲಾಗಿದೆ. 2020ರ ಜೂನ್ ತಿಂಗಳಿನಲ್ಲಿ ಈ ಕಾರಿನ 1,327 ಯುನಿಟ್‌ಗಳನ್ನು ರಫ್ತು ಮಾಡಲಾಗಿತ್ತು.

ಸನ್ನಿ ಕಾರಿನ ರಫ್ತು ಪ್ರಮಾಣವು 2020ರ ಜೂನ್ ತಿಂಗಳಿಗೆ ಹೋಲಿಸಿದರೆ, ಈ ವರ್ಷದ ಜೂನ್ ತಿಂಗಳಿನಲ್ಲಿ 224.79% ನಷ್ಟು ಹೆಚ್ಚಾಗಿದೆ. ಈ ಪಟ್ಟಿಯಲ್ಲಿ ಹ್ಯುಂಡೈ ಕಂಪನಿಯ ಜನಪ್ರಿಯ ಕಾಂಪ್ಯಾಕ್ಟ್ ಎಸ್‌ಯುವಿಯಾದ ಕ್ರೆಟಾ ಎರಡನೇ ಸ್ಥಾನದಲ್ಲಿದೆ.

ಕಳೆದ ತಿಂಗಳು ಕ್ರೆಟಾ ಎಸ್‌ಯುವಿಯ 4,141 ಯುನಿಟ್‌ಗಳನ್ನು ವಿದೇಶಕ್ಕೆ ರಫ್ತು ಮಾಡಲಾಗಿದೆ. 2020ರ ಜೂನ್‌ ತಿಂಗಳಿನಲ್ಲಿ ಈ ಎಸ್‌ಯುವಿಯ ಕೇವಲ 154 ಯುನಿಟ್‌ಗಳನ್ನು ಮಾತ್ರ ರಫ್ತು ಮಾಡಲಾಗಿತ್ತು.

ಈ ವರ್ಷ ಕ್ರೆಟಾ ಎಸ್‌ಯುವಿಯ ರಫ್ತು ಪ್ರಮಾಣವು 2,589% ನಷ್ಟು ಹೆಚ್ಚಾಗಿದೆ. ಮಾರುತಿ ಸುಜುಕಿ ಕಂಪನಿಯ ಬಲೆನೊ ಪ್ರೀಮಿಯಂ ಹ್ಯಾಚ್‌ಬ್ಯಾಕ್ ಕಾರು ಈ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದೆ.

ಕಳೆದ ತಿಂಗಳು ಈ ಕಾರಿನ ಒಟ್ಟು 3,901 ಯುನಿಟ್‌ಗಳನ್ನು ರಫ್ತು ಮಾಡಲಾಗಿದೆ. 2020ರ ಜೂನ್ ತಿಂಗಳಿನಲ್ಲಿ ಈ ಕಾರಿನ 512 ಯುನಿಟ್‌ಗಳನ್ನು ರಫ್ತು ಮಾಡಲಾಗಿತ್ತು. ಈ ಬಾರಿ ಬಲೆನೊ ಕಾರಿನ ರಫ್ತು ಪ್ರಮಾಣವು 661.91% ನಷ್ಟು ಹೆಚ್ಚಾಗಿದೆ.

ಫೋಕ್ಸ್‌ವ್ಯಾಗನ್ ಕಂಪನಿಯ ವೆಂಟೊ ಕಾರು ಈ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿದೆ. ಕಳೆದ ತಿಂಗಳು ಈ ಕಾರಿನ 3,193 ಯುನಿಟ್‌ಗಳನ್ನು ರಫ್ತು ಮಾಡಲಾಗಿದೆ. ಕಳೆದ ವರ್ಷ ಜೂನ್‌ ತಿಂಗಳಿನಲ್ಲಿ ಈ ಕಾರಿನ 2,526 ಯುನಿಟ್‌ಗಳನ್ನು ರಫ್ತು ಮಾಡಲಾಗಿತ್ತು. ವೆಂಟೊ ಕಾರಿನ ರಫ್ತು ಪ್ರಮಾಣವು 26.41% ನಷ್ಟು ಹೆಚ್ಚಾಗಿದೆ.

ಈ ಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿರುವ ಮಾರುತಿ ಸುಜುಕಿ ಕಂಪನಿಯ ಡಿಜೈರ್ ಕಾಂಪ್ಯಾಕ್ಟ್ ಸೆಡಾನ್ ಕಾರಿನ 3,024 ಯುನಿಟ್‌ಗಳನ್ನು ಕಳೆದ ತಿಂಗಳು ರಫ್ತು ಮಾಡಲಾಗಿದೆ. ಕಳೆದ ವರ್ಷ ಜೂನ್‌ ತಿಂಗಳಿನಲ್ಲಿ ಈ ಕಾರಿನ 1,006 ಯುನಿಟ್‌ಗಳನ್ನು ರಫ್ತು ಮಾಡಲಾಗಿತ್ತು.

ಈ ವರ್ಷ ಡಿಜೈರ್ ಕಾರಿನ ರಫ್ತು ಪ್ರಮಾಣವು 200.60% ನಷ್ಟು ಹೆಚ್ಚಾಗಿದೆ. ಹ್ಯುಂಡೈ ಗ್ರ್ಯಾಂಡ್ ಐ 10 ಕಾರು 2,999 ಯುನಿಟ್‌ ರಫ್ತಿನೊಂದಿಗೆ ಈ ಪಟ್ಟಿಯಲ್ಲಿ 6ನೇ ಸ್ಥಾನದಲ್ಲಿದೆ. ಕಿಯಾ ಸೆಲ್ಟೋಸ್ 2,848 ಯುನಿಟ್‌ ರಫ್ತಿನೊಂದಿಗೆ 7ನೇ ಸ್ಥಾನದಲ್ಲಿದೆ.

ಮಾರುತಿ ಎಸ್ ಪ್ರೆಸ್ಸೊ 2,674 ಯುನಿಟ್‌ ರಫ್ತಿನೊಂದಿಗೆ 8ನೇ ಸ್ಥಾನದಲ್ಲಿದೆ. ಹ್ಯುಂಡೈ ವೆರ್ನಾ 2,463 ಯುನಿಟ್‌ಗಳೊಂದಿಗೆ 9ನೇ ಸ್ಥಾನದಲ್ಲಿದ್ದರೆ, ಹ್ಯುಂಡೈ ಓರಾ 1,794 ಯುನಿಟ್‌ಗಳೊಂದಿಗೆ ಹತ್ತನೇ ಸ್ಥಾನದಲ್ಲಿದೆ.