ದೇಶದ ಮೊದಲ ಸಿಎನ್‌ಜಿ ಚಾಲಿತ ಟ್ರಾಕ್ಟರ್ ಬಿಡುಗಡೆಗೊಳಿಸಿದ ನಿತಿನ್ ಗಡ್ಕರಿ

ಈ ಸಿಎನ್‌ಜಿ ಟ್ರಾಕ್ಟರ್ ಅನ್ನು ರಾಮಾತ್ ಟೆಕ್ನೋ ಸೊಲ್ಯೂಷನ್ಸ್ ಹಾಗೂ ಟೊಮಾಸಿಟೊ ಅಚಿಲ್ಲೆ ಇಂಡಿಯಾ ಜಂಟಿಯಾಗಿ ವಿನ್ಯಾಸಗೊಳಿಸಿವೆ. ಈ ಟ್ರ್ಯಾಕ್ಟರ್'ನಿಂದ ವಾರ್ಷಿಕ ರೂ.1.50 ಲಕ್ಷ ಡೀಸೆಲ್ ಉಳಿತಾಯವಾಗಲಿದೆ. ಕೃಷಿ ವೆಚ್ಚವನ್ನು ಕಡಿಮೆ ಮಾಡುವುದು ಹಾಗೂ ಕೃಷಿಯಿಂದ ಬರುವ ಆದಾಯವನ್ನು ಹೆಚ್ಚಿಸುವುದು ಈ ಟ್ರಾಕ್ಟರ್ ಉತ್ಪಾದನೆಯ ಹಿಂದಿರುವ ಮುಖ್ಯ ಉದ್ದೇಶ.

ಈ ಸಿಎನ್‌ಜಿ ಟ್ರ್ಯಾಕ್ಟರ್ ಬಿಡುಗಡೆ ಸಮಾರಂಭದಲ್ಲಿ ಕೇಂದ್ರ ಸಚಿವರಾದ ನರೇಂದ್ರ ಸಿಂಗ್ ತೋಮರ್, ಧರ್ಮೇಂದ್ರ ಪ್ರಧಾನ್, ಪುರುಷೋತ್ತಮ್ ರೂಪಾಲ ಹಾಗೂ ನಿವೃತ್ತ ಸೇನಾ ಜನರಲ್ ವಿ.ಕೆ ಸಿಂಗ್ ಹಾಜರಿದ್ದರು.

MOST READ:ರಿಕ್ಷಾ ಕಳೆದುಕೊಂಡವನಿಗೆ ಹೊಸ ರಿಕ್ಷಾ ಕೊಡಿಸಿದ ಆಪದ್ಭಾಂಧವ

ಟ್ರಾಕ್ಟರುಗಳನ್ನು ಸಿಎನ್‌ಜಿಗೆ ಬದಲಿಸುವ ಕೇಂದ್ರಗಳನ್ನು ಸರ್ಕಾರವು ಸ್ಥಾಪಿಸುತ್ತಿದೆ. ಅಲ್ಲಿ ಸಿಎನ್‌ಜಿ ಕಿಟ್‌ಗಳನ್ನು ಟ್ರಾಕ್ಟರುಗಳಲ್ಲಿ ಅತ್ಯಂತ ಕಡಿಮೆ ಬೆಲೆಗೆ ಅಳವಡಿಸಬಹುದು ಎಂದು ನಿತಿನ್ ಗಡ್ಕರಿ ಹೇಳಿದರು. ದೇಶದ ಪ್ರತಿ ಜಿಲ್ಲೆಯಲ್ಲೂ ಇಂತಹ ಕೇಂದ್ರಗಳನ್ನು ತೆರೆಯುವ ಯೋಜನೆ ಸಿದ್ಧಪಡಿಸಲಾಗಿದೆ ಎಂದು ಅವರು ಹೇಳಿದರು.

ಸಿಎನ್‌ಜಿ ಕಿಟ್‌ ಅಳವಡಿಸಲಾದ ಮೊದಲ ಟ್ರ್ಯಾಕ್ಟರ್ ಸ್ವತಃ ನಿತಿನ್ ಗಡ್ಕರಿರವರಿಗೆ ಸೇರಿದೆ. ಈ ಕಾರ್ಯಕ್ರಮದಲ್ಲಿ ಕೇಂದ್ರ ಪೆಟ್ರೋಲಿಯಂ ಸಚಿವ ಧರ್ಮೇಂದ್ರ ಪ್ರಧಾನ್ ಅವರು ಟ್ರಾಕ್ಟರ್ ನೋಂದಣಿ ಪ್ರಮಾಣಪತ್ರವನ್ನು ನಿತಿನ್ ಗಡ್ಕರಿ ಅವರಿಗೆ ಹಸ್ತಾಂತರಿಸುವ ಮೂಲಕ ಟ್ರ್ಯಾಕ್ಟರ್ ಅನ್ನು ಅನಾವರಣಗೊಳಿಸಿದರು.

MOST READ:ಶೋಚನೀಯ ಸ್ಥಿತಿಯಲ್ಲಿವೆ ದುಬಾರಿ ಬೆಲೆಯ ಐಷಾರಾಮಿ ರೋಲ್ಸ್ ರಾಯ್ಸ್ ಕಾರುಗಳು

ಸಿಎನ್‌ಜಿ ಕಿಟ್ ಅಳವಡಿಸಿದ ನಂತರ ಈ ಟ್ರಾಕ್ಟರ್ ಅನ್ನು 6 ತಿಂಗಳ ಕಾಲ ಜಮೀನುಗಳಲ್ಲಿ ಪರೀಕ್ಷಿಸಲಾಗಿದೆ ಎಂದು ನಿತಿನ್ ಗಡ್ಕರಿ ತಿಳಿಸಿದರು. ಈ ಟ್ರಾಕ್ಟರ್ ಡೀಸೆಲ್‌ನಲ್ಲಿ ಚಲಿಸುವ ಟ್ರಾಕ್ಟರ್‌ನಂತೆ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ಪರೀಕ್ಷೆಯಲ್ಲಿ ತಿಳಿದುಬಂದಿದೆ.

ಈ ಟ್ರಾಕ್ಟರ್ ಡೀಸೆಲ್ ಟ್ರಾಕ್ಟರುಗಳಿಗಿಂತ 75%ನಷ್ಟು ಕಡಿಮೆ ಮಾಲಿನ್ಯವನ್ನು ಹೊರಸೂಸುತ್ತದೆ. ಸಿಎನ್‌ಜಿ ಟ್ರಾಕ್ಟರುಗಳು ರೈತರಿಗೆ ಹಲವು ವಿಧಗಳಲ್ಲಿ ಪ್ರಯೋಜನಕಾರಿಯಾಗಿವೆ. ಸಿಎನ್‌ಜಿ ಟ್ರಾಕ್ಟರ್ ಡೀಸೆಲ್ ಟ್ರ್ಯಾಕ್ಟರ್‌ಗೆ ಸಮನಾದ ಅಥವಾ ಹೆಚ್ಚಿನ ಶಕ್ತಿಯನ್ನು ಉತ್ಪಾದಿಸುವ ಸಾಮರ್ಥ್ಯವನ್ನು ಹೊಂದಿದೆ.

MOSTREAD: ಇನ್ನು ಮುಂದೆ ಈ ನಗರಗಳಲ್ಲಿ ಡೀಸೆಲ್ ವಾಹನಗಳನ್ನು ಮಾರಾಟ ಮಾಡುವಂತಿಲ್ಲ

ಸಿಎನ್‌ಜಿ ಟ್ರಾಕ್ಟರುಗಳಿಂದ ಇಂಧನ ವೆಚ್ಚದ ಮೇಲೂ 50%ನಷ್ಟು ಉಳಿತಾಯ ಮಾಡಬಹುದು ಎಂದು ಅವರು ಹೇಳಿದರು. ಈಗ ಒಂದು ಲೀಟರ್ ಡೀಸೆಲ್ ಬೆಲೆ ಸುಮಾರು ರೂ.77.43ಗಳಾದರೆ, 1 ಕೆಜಿ ಸಿಎನ್‌ಜಿ ಬೆಲೆ ರೂ.42 ಗಳಾಗಿದೆ. ಒಬ್ಬ ರೈತ ವರ್ಷದಲ್ಲಿ ಡೀಸೆಲ್‌ಗಾಗಿ ರೂ.3 ಲಕ್ಷದಿಂದ ರೂ.3.5 ಲಕ್ಷಗಳವರೆಗೆ ಖರ್ಚು ಮಾಡಬೇಕಾಗುತ್ತದೆ. ಸಿಎನ್‌ಜಿ ಟ್ರಾಕ್ಟರ್‌ ಬಳಸುವುದರಿಂದ ವಾರ್ಷಿಕವಾಗಿ ರೂ.1.5 ಲಕ್ಷ ಉಳಿತಾಯವಾಗುತ್ತದೆ.

ಸಿಎನ್‌ಜಿ, ಡೀಸೆಲ್'ನಂತೆಯೇ ಭಾರವಾದ ಲೋಹಗಳನ್ನು ಹೊಂದಿರುವುದಿಲ್ಲ. ಇದರಿಂದ ಟ್ರಾಕ್ಟರ್‌ ಎಂಜಿನ್‌ಗೆ ತೀರಾ ಕಡಿಮೆ ಹಾನಿಯಾಗುತ್ತದೆ. ಜೊತೆಗೆ ಮಾಲಿನ್ಯ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ. ವಿಶ್ವಾದ್ಯಂತ 1.20 ಲಕ್ಷಕ್ಕೂ ಹೆಚ್ಚು ಸಿಎನ್‌ಜಿ ವಾಹನಗಳು ಕಾರ್ಯನಿರ್ವಹಿಸುತ್ತಿವೆ ಎಂದು ನಿತಿನ್ ಗಡ್ಕರಿ ಹೇಳಿದರು. ಸಿಎನ್‌ಜಿ ಟ್ರಾಕ್ಟರುಗಳು ಭಾರತದಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ಆರಂಭವಾದರೆ ರೈತರಿಗೆ ಸಾಕಷ್ಟು ಪ್ರಯೋಜನವಾಗುತ್ತದೆ. ಸಿಎನ್‌ಜಿ ಟ್ರಾಕ್ಟರುಗಳಿಗೆ ಮಾನದಂಡಗಳನ್ನು ನಿಗದಿಪಡಿಸಲಾಗಿದೆ ಎಂದು ನಿತಿನ್ ಗಡ್ಕರಿ ಹೇಳಿದರು. ಶೀಘ್ರದಲ್ಲೇ ಸಿಎನ್‌ಜಿ ಟ್ರಾಕ್ಟರುಗಳು ಮಾರಾಟಕ್ಕೆ ಲಭ್ಯವಾಗಲಿವೆ.